ក្នុង​អាយុ ៥៤ ឆ្នាំ លោក Tim Cook គឺ​ជា​​នាយក​ប្រតិបត្តិ​របស់​ក្រុមហ៊ុន ​​Apple ដែល​ជា​​ក្រុមហ៊ុន​បច្ចេកវិទ្យា​​យក្ស​ដ៏​​​ល្បីល្បាញ​​​​​បំផុត​​មួយ​នៅ​លើ​ពិភពលោក​​នា​ពេល​បច្ចុប្បន្ន​​នេះ។ ក្រោយ​ចូល​កាន់កាប់​តំណែង​នេះ​ (CEO) ​នៅ​ក្នុង​ក្រុមហ៊ុន​នេះ​នា​ខែ សីហា ឆ្នាំ ២០១១ ពោល​គឺ​នៅ​ពេល​​ដែល​លោក​ Steve Jobs លាលែង​ពី​តំណែង​ខាងលើ​ ​លោក Cook​ នៅ​ពេល​បច្ចុប្បន្ន​នេះ​​​ត្រូវ​បាន​គេ​មើល​ឃើញ​​ថា ហាក់​​កំពុង​កសាង​ប្រជាប្រិយភាព​កាន់តែ​ខ្លាំង​ឡើង។ យ៉ាងណាមិញ ១១ ចំណុច​ខាងក្រោម​នេះ​នឹង​ធ្វើ​ឲ្យ​មិត្ត​អ្នកអាន​​ស្គាល់ CEO រូប​នេះ​កាន់តែ​ច្បាស់។​​​​

១) លោក​ Tim Cook ​គឺ​ជា​អតីត​​និស្សិត​សាកលវិទ្យាល័យ Auburn ជា​កន្លែង​ដែល​​លោក​បាន​សិក្សា​​បរិញ្ញាប័ត្រ​​ជំនាញ​វិស្វកម្ម​ឧស្សាហកម្ម​នៅ​ក្នុង​ឆ្នាំ ១៩៨២។ លោក​បាន​កើត​នៅ​​​កើត​នៅ​ទីក្រុង Robertsdale រដ្ឋ Alabama។

​២) ពី​មុន​មក​គ្មាន​អ្នកណា​​គិត​ថា លោក​ Cook អាច​ជា​មនុស្ស​ជំនិត​របស់​លោក Steve Jobs នោះ​ឡើយ ហើយ​ក៏​គ្មាន​អ្នកណា​ម្នាក់​​ជឿជាក់​ថា លោក​អាច​ក្លាយ​ជា CEO របស់​ Apple ដូច​នៅ​ពេល​នេះ​ដែរ។ ​

៣) មុន​មក​ធ្វើ​ការ​ឲ្យ​ក្រុមហ៊ុន Apple លោក​ធ្លាប់​បាន​បម្រើ​ការងារ​ឲ្យ​ក្រុមហ៊ុន IBM របស់​រយៈ​ពេល ១២ ឆ្នាំ។

៤) នៅ​ពេល​ដែល​លោក​កំពុង​បម្រើ​ការងារ​ឲ្យ​ក្រុមហ៊ុន IBM លោក​ក៏​​បាន​បញ្ចប់​ថ្នាក់​​បរិញ្ញាប័ត្រ​ជាន់​ខ្ពស់​នៅ​សាកលវិទ្យាល័យ Duke ​​នៅ​រដ្ឋ North Caronlina ផង​ដែរ​នា​ឆ្នាំ ១៩៨៨។

៥) លោក Steve Jobs និង លោក Cook ជា​ទូទៅ​ត្រូវ​បាន​គេ​មើល​ឃើញ​ថា មិនសូវ​ជា​​មាន​គំនិត​ដូច​​គ្នា​ប៉ុន្មាន​នោះ​ឡើយ ​លើកលែង​តែ​អ្នក​ទាំងពីរ​មិន​បាន​ធ្វើ​ការ​ជា​មួយ​គ្នា​​មុន​ពេល​លោក Tim Cook ចូល​មក​ធ្វើ​ការ​ឲ្យ​ក្រុមហ៊ុន Apple នៅ​ក្នុង​ឆ្នាំ ១៩៩៨។

៦) លោក Cook គឺ​ជា​អ្នក​ផ្ដួចផ្ដើម​ដ៏​សំខាន់​​ និង ជា​​មនុស្ស​​តែ​មួយ​គត់​ដែល​​បាន​​បើក​ផ្លូវ​ឲ្យ​Apple ​ឈាន​ជើង​កាន់​តែ​ជ្រៅ​​ពង្រីក​ទីផ្សារ​បច្ចេកវិទ្យា​​របស់​ខ្លួន​ចូល​ទៅ​​កាន់​​​ទឹកដី​ចិន។

៧) លោក Cook ត្រូវ​បាន​គេ​ចាត់ទុក​ថា ជា​​ CEO ​ដែល​មាន​ការ​សន្សំសំចៃ​​​មួយ​ផង​ដែរ។ កាល​ពី​ឆ្នាំ ២០១០ លោក​បាន​ទិញ​ផ្ទះ​មួយ​ក្នុង​តម្លៃ​ត្រឹមតែ ១,៩ លាន​ដុល្លារ​ប៉ុណ្ណោះ (តម្លៃ​នេះ​មិន​ថ្លៃ​​នោះ​ឡើយ​សម្រាប់​ទឹកដី​អាមេរិក) នៅ​​ក្រុង Palo Altoរដ្ឋ California។ កាល​នោះ​លោក​មាន​ទ្រព្យសម្បត្តិ​ប្រមាណ ១០០​លាន​ដុល្លារ។ ​

៨) ដូច​អ្វី​ដែល​លោក Cook ​បាន​លើកឡើង​នៅ​ក្នុង​បទសម្ភាសន៍​​ជា​ច្រើន​នៅ​លើ​កញ្ចក់ទូរទស្សន៍​ CNBC និង ESPN លោក​ជា​មនុស្ស​ដែល​ចូលចិត្ត​ធ្វើ​ឲ្យ​ខ្លួន​ឯង​រវល់​គ្រប់ពេល លើកលែង​តែ​ពេល​គេង។

៩) លោក Cook បាន​តែងតាំង​ជា CEO របស់ Appleនៅ​ក្នុង​ថ្ងៃ​តែ​មួយ​ដែល​លោក Steve Jobs លាលែង​ពី​តំណែង​នេះ។

១០) លោក Cook ត្រូវ​បាន​គេ​មើល​ឃើញ​ថា ជា​មនុស្ស​ដែល​ស្រលាញ់​មនុស្សជាតិ​បំផុត​មួយ​ផង​ដែរ។ ក្នុង​នាម​ជា​អ្នកដឹកនាំ​ក្រុមហ៊ុន ​លោក​បាន​បង្កើត​កម្មវិធី​ផ្តល់​មូលនិធិ​​​មួយ​នៅ​ក្រុមហ៊ុន​សម្រាប់​បុគ្គលិក​​គ្រប់រូប​បរិច្ចាគ​ថវិកា​របស់​ពួកគេ​លើ​សកម្មភាព​មនុស្ស​ធម៌​មួយ​ចំនួន។

​​១១) ដំបូន្មាន​របស់​លោក Steve Jobs ទៅ​កាន់​លោក Tim Cook នោះ​គឺ​ លោក Jobs មិន​ដែល​ស្នើ​ឲ្យ​លោក Cook គួរ​​ធ្វើ​អ្វី​នោះ​​ទេ។ លោក Jobs ​ គ្រាន់តែ​ចង់​ឲ្យ​លោក Cook ធ្វើ​អ្វី​ដែល​លោក Cook យល់​ថា ត្រឹមត្រូវ៕

ប្រែសម្រួល៖ ខេវិន​

ប្រភព៖​ Businessinsider