ធ្វើម៉េចខ្លះទើបឆាប់ឡើងតំណែង?
ប្រិយមិត្តធ្លាប់ឆ្ងល់ឬអត់
ថាហេតុអ្វីអ្នកមានចំណេះដឹងតិច ពេលខ្លះអាចឡើងតំណែង
ឬតួនាទីបានមុនអ្នកដែលរៀនជ្រៅជ្រះជាង?
ស្ដាប់មើលទៅហាក់បីដូចជាមិនយុត្តិធម៌
តែតាមការពិតការដំឡើងតំណែងបុគ្គលិកណាម្នាក់
មិនមែនមើលទៅលើចំណេះដឹងតែមួយមុខនោះទេ
គឺត្រូវមើលលើភាពស័ក្ដិសម
និងទិដ្ឋភាពទូទៅរបស់បុគ្គលិកនោះផងដែរ។ ខាងក្រោមនេះជា
តិកនិកមួយចំនួនដែលអាចជួយអ្នកឲ្យមានឈ្មោះក្នុងបញ្ជីឈ្មោះ
អ្នកត្រូវឡើងតំណែង៖
១. ជាបុគ្គលដែលស្មោះត្រង់៖
ត្រូវចាត់ទុកផលប្រយោជន៍របស់ក្រុមហ៊ុន
ដូចជាផលប្រយោជន៍របស់ខ្លួន ដោយលះបង់ទាំងកម្លាំងកាយ
និងកម្លាំងចិត្តដើម្បីភាពរីកចម្រើនរបស់ក្រុមហ៊ុន។
២. ជាបុគ្គលដែលគួរជាទីរាប់អាន៖
ក្រៅពីរួសរាយរាក់ទាក់ អ្នកត្រូវមានចិត្តទូលាយ
ដែលអាចផ្ដល់ភាពកក់ក្ដៅដល់សមាជិកដទៃទៀតក្នុងក្រុម។ ជាពិសេស
អ្នកក៏ត្រូវចេះបង្កើតបរិយាកាសរីករាយដល់សមាជិកក្នុងក្រុមផង
ដែរ។
៣. ត្រូវចេះរៀបចំខ្លួនឲ្យសមនឹងតំណែង៖
បើអ្នកចង់ឡើងទៅកាន់តំណែងណាមួយ អ្វីដែលត្រូវធ្វើជាចាំបាច់
គឺត្រូវចេះរៀបចំខ្លួនឲ្យសមនឹងតំណែងនោះ ទាំងការស្លៀកពាក់ ទង្វើ
និងការនិយាយស្ដី។
៤. សិក្សាពីអ្នកដទៃ៖
ត្រូវចេះសិក្សាពីអ្នកដែលកំពុងតែកាន់តំណែងដែលអ្នកពេញចិត្ត
តាមរយៈការសិក្សាពីរបៀបធ្វើការប្រាស្រ័យទាក់ទង
និងវិធីដោះស្រាយបញ្ហាជាដើម។
៥. ជាមនុស្សម៉ត់ចត់៖ អ្នកត្រូវធ្វើឲ្យប្រាកដថាអ្វីដែលអ្នកធ្វើ គឺត្រឹមត្រូវ ទាន់ពេល និងមានប្រសិទ្ធភាព មិនខ្ជះខ្ជាយ។
សរុបមកវិញ
អ្នកត្រូវធ្វើខ្លួនជាទ្រព្យដ៏មានតម្លៃនៅក្នុងក្រុមហ៊ុន។
យ៉ាងណាក្ដី យើងក៏មិនត្រូវភ្លេចខ្លួន មិនពង្រឹងសមត្ថភាព
ចំណេះដឹង និងជំនាញបន្ថែមនោះដែរ៕
