ក្លាយជា​រឿង​ល្បី​ និង​មានការ​ចាប់អារម្មណ៍​ច្រើន​នៅពេល​សារព័ត៌មាន​កូរ៉េ បាន​ចុះផ្សាយ​ព័ត៌មាន​ប្រែ​សម្រួល​ពី​ព័ត៌មាន​ប្រទេស​ចិន​ស្ដីពី​រឿង Tao សមាជិក​ជនជាតិ​ចិន​ម្នាក់ទៀត​របស់​ក្រុម EXO មានបំណង​ចាកចេញ​ពី​ក្រុម។ ​នេះ​​បើ​តាម​ការ​បង្ហើប​ឱ្យ​ដឹង​ពី​​អតីត​សមាជិក​២​រូប​​ផ្សេង​ទៀត​។​

​ព័ត៌មាន​នោះបាន​ចុះផ្សាយ​ថា ​មាន​ពាក្យ​ចចាមអារ៉ាម​លេចចេញ​ពី Weibo បណ្ដាញ​សង្គម​ប្រទេស​ចិន​ថា Tao មាន​គំរោង​ចាក​ចេញពី EXO និង​ផលិតកម្ម SME តាម​មិត្ត​សមាជិក​ក្រុម​ជនជាតិ​ពីររូប​ដូចជា Kris និង Luhan ក្នុងពេល​ឆាប់ៗ​នេះ ដោយ Tao កំពុង​ត្រៀមខ្លួន​សម្ដែង​ភាពយន្ត​រឿង​ថ្មី​មាន​ចំណងជើង​ថា “My Sunshine” ជាមួយ​កំពូល​តារា​សម្ដែង​ចិន​ដ៏​ល្បីល្បាញ Huang Xiaoming ផងដែរ​។​

​ក្រោយ​លេចចេញ​ព័ត៌មាន​នេះ​ធ្វើឱ្យ​មានការ​ចេញមក​ប​ក​ស្រាយ​ពី​អ្នកចាត់ការ​ទូទៅ Huang Xiaoming ថា Tao មិនបាន​ចូលរួម​សម្ដែង​ភាពយន្ត​នោះទេ ហើយ Tao ក៏​គ្មាន​បំណង​ចាក​ចេញពី​ក្រុម EXO ដែរ​ប៉ុន្តែ Tao គ្រាន់តែ​ទៅ​ចូលរួម​កម្មវិធី​សម្ពោធ​ភាពយន្ត​ក្នុងឋានៈ​អ្នក​រាប់អាន​ជិតស្និទ្ធ​​ជាមួយ Huang Xiaoming ប៉ុណ្ណោះ​។​

​យ៉ាងណាមិញ​ក្នុងខណៈ​នេះ EXO កំពុងតែ​ត្រៀម​សម្រាប់​ការ​ត្រលប់មក​ឡើង​ឆាក​សម្ដែង​ជាថ្មី​ជាមួយនឹង​ខន​សឺត EXO PLANET #2 – The EXO’luXion៕ 

​ប្រែ​សម្រួល​៖ សុខា នី​កា​

ប្រភព៖​ www.koreaboo.com