​ឆាកជីវិត​ជា​អ្នក​បើក​យន្តហោះ​ដឹក​អ្នក​ដំណើរ​គឺ​ស្ដាប់​មើល​ទៅ​ហាក់​ដូច​ជា​រំភើប​ណាស់ និង​ពោរពេញ​ដោយ​ជីវិត​ស៊ីវិល័យ និង​ប្រណីតភាព។ ខាងក្រោម​នេះ ជា​ការ​រៀបរាប់​អំពី​អារម្មណ៍​ពិត​របស់​អ្នក​បើក​យន្តហោះ​ឲ្យ​ក្រុមហ៊ុន​ដឹក​អ្នកដំណើរ​ធំៗ នៅ​ក្នុង​ពិភពលោក។ តើ​ពិបាក ឬ​ស្រណុក​យ៉ាង​ណា​ខ្លះ?

​ស្ដាប់​ការ​រៀបរាប់​របស់​លោក Mike Lowes
​លោក Mike Lowes ជា​ពីឡុត​ធំ ឬ​កាពីទែន (Captain) របស់​ក្រុមហ៊ុន​អាកាសចរណ៍ Cathay Pacific។ លោក​ប្រាប់​ថា​ក្នុង​ឆាកជីវិត​តាំង​ពីក្មេង​មក​ទល់​នឹង​ពេល​នេះ លោក​បាន​បម្រើការ​ខាង​វិស័យ​នេះ​អស់​ជាង​ ៤៥ ឆ្នាំ។ លោក​ពេញ​ចិត្ត​នឹង​បម្រើ​ការ​នេះ ហើយ​រំភើប​នឹង​គយគន់​ទេសភាព​ដ៏​ស្រស់​បំព្រង​នៅ​លើ​ដី។ លោក​ហោះ​កាត់​វាលលំហ​ហ្គោប៊ី (Gobi Desert) – ប្រទេស​ម៉ុងហ្គោលី – ហោះ​កាត់​វាលស្មៅ​ខៀវខ្ចី​ដូច​ក្រាលព្រំ​នៅ​ប្រទេស​ម៉ុងហ្គោលី ហោះ​កាត់​មហា​កំផែង​នៅ​ប្រទេស​ចិន។ល។​

ស្ដាប់​លោក Jim McAuslan រៀប​រាប់​អំពី​ប្រាក់​ឈ្នួល​អប្បបរមា​របស់​ពីឡុត
​នៅ​ចក្រភព​អង់គ្លេស មាន​ស្ថាប័ន​មួយ​គេ​ឲ្យ​ឈ្មោះ​ថា «​សមាគម​អាកាសយានិក​អង់គ្លេស – British Airline Pilots’ Association (Balpa)»។ លោក Jim McAuslan ជា​អគ្គលេខាធិការ Balpa ឲ្យ​ដឹង​ថា​ លើកលែង​តែ​ក្រុមហ៊ុន​អាកាសចរណ៍​ធំៗ ដូចជា​ក្រុមហ៊ុន British Airways។ល។ ចំពោះ​ពីឡុត​ថ្មីថ្មោង​ដែល​ទើប​ចូល​បម្រើ​ការ​ទទួល​បាន​ប្រាក់​បៀវត្ស​គោល​ប្រចាំ​ឆ្នាំ ​ចន្លោះ​ពី​ជាង ៤១០០០ – ៤៤០០០ ដុល្លារ។ ​ចំពោះ​ពីឡុត​ធំ (កាពីទែន – captain) ដែល​មាន​ពិសោធន៍​បើក​យន្តហោះ​ចាប់​ពី ២០ ឆ្នាំ​ឡើង​លើ និង​កាន់​តំណែង​កាពីទែន ចាប់ពី ៤- ៨ ឆ្នាំ ទទួល​បាន​ប្រាក់​បៀវត្ស​គោល​ប្រចាំ​ឆ្នាំ​ជាង ៨៥០០០ – ១០ ម៉ឺន​ដុល្លារ។

​លោក​បន្ត​ថា​ការងារ​ជា​អ្នក​បើក​យន្តហោះ​មិន​មែន​ងាយស្រួល​ដូច​មនុស្ស​ទូទៅ​គិត​នោះ​ទេ។ ប្រសិនបើ​អ្នក​តាំង​ចិត្ត​ថា​ចាប់​អាជីព​បើក​យន្តហោះ ត្រូវ​ចាប់​យក​អាជីព​នេះ​ទៅ​មិន​ខុស​ទេ ប៉ុន្តែ​ត្រូវ​ត្រៀម​ចិត្ត​ទុក​ឲ្យ​ហើយ។ អ្នក​បើក​យន្តហោះ​អាច​ប្រឈម​នឹង​បញ្ហា​ពិបាកៗ – ហេវហត់​អស់​កម្លាំង – មាន​សម្ពាធ​ផ្លូវ​ចិត្ត​ – គ្មាន​ពេល​វេលា​គ្រប់​គ្រាន់​បាន​ជួប​ជុំ​ក្រុម​គ្រួសារ ឬ​មិត្តភក្ដិ។ល។ យ៉ាងហោចណាស់ អាកាសយានិក​ត្រូវ​អង្គុយ​បញ្ជា​យន្តហោះ​ពី​បី​ម៉ោង រហូត​ដល់​ ១២ ម៉ោង ហើយ​ពេល​វេលា​ចេញ​ដំណើរ​មិន​អាច​កំណត់​បាន​ទេ ជួន​កាល ចេញ​ពេល​ថ្ងៃ ពេល​យប់​មិន​ទៀង។ ពេល​ខ្លះ រក​ពេក​ដេក​ពួន​គ្មាន​៕

ប្រែ​សម្រួល ៖ អន សំអាង

ប្រភព៖​ telegraph និង New York Times