លោកពូទីនបញ្ជូនទ័ព ៣៨ ០០០ នាក់ឲ្យទៅធ្វើសមយុទ្ធយោធានៅតំបន់អាកទិច ស្របពេលអាមេរិកកំពុងធ្វើសមយុទ្ធយោធានៅអឺរ៉ុប
នៅក្នុងខណៈដែលអាមេរិក និង សម្ព័ន្ធមិត្តរបស់ខ្លួនមួយចំនួនទៀតនៅតំបន់អឺរ៉ុបកំពុងធ្វើសមយុទ្ធយោធានៅក្បែរព្រំដែនរុស្ស៊ី កាលពីម្សិលមិញលោកពូទីនបានបញ្ជាឲ្យបញ្ជូនកងទ័ពរបស់លោកប្រមាណ៣៨ ០០០ នាក់ទៅធ្វើយមយុទ្ធយោធាទ្រង់ទ្រាយធំដូចគ្នានៅភាគខាងជើងប្រទេស។
យោងតាមសារព័ត៌មានក្នុងស្រុក ការធ្វើសមយុទ្ធយោធារបស់រុស្ស៊ីនឹងធ្វើឡើងនៅតំបន់អាកទិចដែលជាភូមិសាស្ត្រនយោបាយថ្មីរបស់ទីក្រុងមូស្គូនូវអ្វីដែលប្រមុខមេដឹកនាំយោធារបស់មហាអំណាចមួយនេះអះអាងថា មិនពាក់ព័ន្ធទៅនឹងស្ថានភាពណាមួយរបស់ពិភពលោកនៅពេលបច្ចុប្បន្ននោះឡើយ។
លោក Gen. Sergey Shoigu រដ្ឋមន្ត្រីក្រសួងការពារជាតិរុស្ស៊ីបានមានប្រសាសន៍ដូច្នេះថា៖« ការធ្វើសមយុទ្ធយោធាននៅពេលនេះប្រព្រឹត្តទៅតាមធម្មតា គ្មានអ្វីពាក់ព័ន្ធទៅនឹងស្ថានការណ៍នយោបាយអន្តរជាតិនោះឡើយ។ សមយុទ្ធយោធាលើកនេះ គឺដើម្បីពង្រឹងកងទ័ព និង សន្តិសុខរបស់រុស្ស៊ីតែប៉ុណ្ណោះ»។
រដ្ឋមន្ត្រីរូបនេះបានឲ្យដឹងទៀតថា កងទ័ពរុស្ស៊ីប្រមាណ ៣៨ ០០០ នាក់ នាវាច្បាំង ៤១ គ្រឿង នាវាមុជទឹក ១៥ គ្រឿង និង យន្តហោះចម្បាំងប្រមាណ ១១០ គ្រឿងបានបញ្ជូនទៅធ្វើសមយុទ្ធយោធានៅពេលនេះ។
យ៉ាងណាមិញ ការធ្វើសមយុទ្ធយោធារបស់ទីក្រុងមូស្គូក្នុងស្ថានភាពតឹងតែងនេះ ត្រូវបានមជ្ឈដ្ឋានអន្តរជាតិយល់ឃើញថា អាចជាការសម្ញែងយោធាដាក់គ្នារវាងរុស្ស៊ី និង លោកខាងលិចដឹកនាំដោយអាមេរិកដែលកំពុងធ្វើសមយុទ្ធយោធានៅប៉ូឡូញក្បែរព្រំដែនរបស់ខ្លួនស្រាប់៕
ប្រែសម្រួល៖ ខេវិន
ប្រភព ពី thebnews
ប្រភព៖ CNN
