អារ៉ាប៊ីសាអ៊ូឌីតមានអន់ឯណា! ទិញអាវុធចូលច្រើនជាងគេក្នុងពិភពលោក វ៉ាដាច់ទាំងឥណ្ឌាទៅទៀត
អស់រយៈពេលជាងមួយទសវត្សកន្លងទៅនេះ ឥណ្ឌាជាប្រទេសដែលទិញចូលអាវុធច្រើនជាងគេក្នុងពិភពលោក ជាមួយនឹងទឹកប្រាក់បញ្ជាទិញជាងមួយពាន់លានដុល្លារកាលពីឆ្នាំទៅមិញ។ ប៉ុន្តែឥណ្ឌាអង្គុយតំណែងនេះមិនបានតទៅទៀតទេ ព្រោះកាលពីឆ្នាំ២០១៤ និងនៅឆ្នាំ២០១៥ នេះផ្ទាល់តែម្ដង ប្រទេសអារ៉ាប៊ីសាអ៊ូឌីតបានវ៉ាដាច់ឥណ្ឌាទៅហើយ ខាងទិញអាវុធចូល។
អារ៉ាប៊ីសាអ៊ូឌីតជាប់លេខមួយនេះ ដោយសារប្រទេសនេះបានទិញចូលអាវុធសម្រាប់ប្រើប្រាស់ក្នុងវិស័យការពារជាតិ ច្រើនឡើងៗ រហូតដល់ ៦ ឆ្នាំជាប់ៗគ្នាជាមួយ និងទំហំទឹកប្រាក់ ៦៤,៤ ពាន់លានដុល្លារ។ នេះបើយោងតាមក្រុមហ៊ុន HIS ខាងស្រាវជ្រាវអំពីការទិញ/លក់អាវុធ។ ក្រុមហ៊ុនបានវាយតម្លៃថាមូលហេតុដែលអារ៉ាប៊ីសាអ៊ូឌីតបញ្ជាទិញគ្រឿងសព្វាវុធ យ៉ាងច្រើនលើសលប់ដល់ថ្នាក់នេះ ព្រោះស្ថានការណ៍ថ្មីៗបានប្រែប្រួលជាបន្តបន្ទាប់ ជាពិសេសវិបត្តិនៅមជ្ឈិមបូព៌ា ឬដើមបូព៌ា (Middle East) និងនៅអាស៊ីប៉ាស៊ីហ្វិក (Asia Pacific)។
តាមមើលទៅ ពីនេះទៅមុខយូរអង្វែង ក៏អារ៉ាប៊ីសាអ៊ូឌីតនៅតែនាំមុខគេខាងទិញអាវុធចូលជានិច្ច ព្រោះការបញ្ជាទិញថ្មីៗនៅតែបន្តកុងត្រាទៅមុខទៀត។ នេះជាការឲ្យដឹងពីលោក Ben Moores ជាអ្នកវិភាគ និងដឹងកិច្ចការរាក់ជ្រៅក្នុងបញ្ហាទិញអាវុធរបស់អារ៉ាប៊ីសាអ៊ូឌីត។ គ្រាន់តែចន្លោះឆ្នាំ២០១៣ ដល់ ២០១៤ អារ៉ាប៊ីសាអ៊ូឌីតទិញអាវុធចូលលើសមុនរហូតដល់ ៥៤%។ ឆ្នាំ២០១៥ ចំនួននេះនឹងកើន ៥២% ជាមួយនិងទឹកប្រាក់ ៩,៨ ពាន់លានដុល្លារ។ ប្រទេសដែលនាំចូលអាវុធច្រើនដាច់គេទាំងប្រាំមាន៖ អារ៉ាប៊ីសាអ៊ូឌីត – ឥណ្ឌា – ចិន – សហភាពអារ៉ាប់រួម – និងតៃវ៉ាន់៕
ប្រែសម្រួល ៖ អន សំអាង
ប្រភព៖ Reuters
