អ្នកបំពុលត្រីងាប់រាប់រយគីឡូក្រាម ៥ថ្ងៃហើយមិនទាន់ត្រូវបានចាប់ខ្លួននៅឡើយ
ខេត្តកំពង់ចាម ៖ ត្រីជាច្រើនប្រភេទតូចធំ ត្រូវបានគេសង្ស័យមានជនមិនស្គាល់មុខលួចបំពុលបណ្តាលឲ្យងាប់អណ្តែតហូរតាមទឹកព្រែកគៀនជ្រៃ ស្ថិតនៅភូមិឥន្ទនេល ឃុំគៀនជ្រៃ ស្រុកកំពង់សៀម មកដល់ព្រឹកថ្ងៃទី១៥ មីនា ២០១៥នេះ នៅមិនទាន់ត្រូវបានសមត្ថកិច្ចស្រាវជ្រាវចាប់បានជនកំហូចណាម្នាក់នៅឡើយទេ ដោយត្រីងាប់មានរហូតដល់ទៅរាប់រយគីឡូក្រាមឯណោះ ។
លោកអ៊ុក ណារិន នាយខណ្ឌរដ្ឋបាលជលផលខេត្តប្រាប់ឲ្យដឹងថា ក្រោយពីមានបាតុភាពកើតឡើងដោយត្រីងាប់រាប់រយគីឡូក្រាមនោះ រូបលោក និងសហការីបានចុះទៅប្រជុំជាបន្ទាន់ កាលពីថ្ងៃទី១៤ មីនា ដោយកោះហៅសហគមន៍នេសាទមកពីឃុំហាន់ជ័យ ឃុំស្រក និងឃុំគៀនជ្រៃ មានប្រធានភូមិ និងប៉ុស្តិ៍រដ្ឋបាលឃុំគៀនជ្រៃ បើកការស៊ើបអង្កេតឃ្លាំមើលអ្នកដែលត្រូវបានដាក់ការសង្ស័យ លួចបំពុលបណ្តាលឲ្យត្រីងាប់នៅក្នុងទឹកព្រែកនោះ ។
លោកអ៊ុក ណារិន នាយខណ្ឌរដ្ឋបាលជលផលខេត្តប្រាប់បន្តថា កាលពីថ្ងៃទី១០ មីនា កន្លងទៅត្រីនៅក្នុងព្រែកគៀនជ្រៃ ត្រូវបានពុលងាប់ជាបន្តបន្ទាប់នៅកន្លែងទឹករាក់ហើយល្អក់ ហើយអាកាសធាតុក៏ក្តៅផងដែរ ។ ចំពោះមូលហេតុដែលបណ្តាលឲ្យត្រីងាប់នោះត្រូវបានរូបលោកដាក់ការសង្ស័យថា មានជនណាម្នាក់បំពុលដើម្បីចាប់យកត្រីនៅក្នុងភូមិឥន្ទនេល ។
សមត្ថកិច្ចក៏ដូចជាជំនាញបានចុះទៅស្រាវជ្រាវ ដល់កន្លែងកើតមានបញ្ហានោះ ។ ទើបនៅថ្ងៃទី១៤ មីនា រូបលោកបានប្រជុំផ្សព្វផ្សាយពង្រឹងដល់សហគម៍នេសាទដើម្បីឃ្លាំមើលតាមរកជនទុច្ចរិត ដែលបានបំពុលឲ្យត្រីងាប់រហូតដល់រាប់រយគីឡូក្រាម ។ លោកថា យោងតាមមាត្រា៩៨ នៃច្បាប់ជលផលចំពោះជនណាដែលបានបំពុលត្រីឲ្យងាប់ដូចខាងលើ ស្ថិតនៅក្នុងលំដាប់ថ្នាក់លេខ១ បើសិនជាចាប់បានត្រូវតែផ្តន្ទាទោសពី៣ទៅ៥ឆ្នាំ៕
