WhatsApp ប្រហែល​កាន់តែ​ជិត​ចេញ​មុខងារ​និយាយ​ឆ្លើយឆ្លង voice calling មែនទែន​ហើយ។ នេះ​បើ​តាម​គេហទំព័រ mashable។ ក្រុមហ៊ុន​ដែល​ត្រូវ​បាន Facebook ទិញ​យក​ផ្ដាច់​កាលពី​ចុង​ឆ្នាំ​២០១៤ ក្នុង​ទឹកប្រាក់ ១៩ពាន់​លាន​ដុល្លារ​នេះ បច្ចុប្បន្ន​កំពុង​ដាក់​មនុស្ស​មួយ​ក្រុម​ដើម្បី​​ពួក​គេ​ធ្វើតេស្ត​មុខងារ voice calling នេះ​នៅ​លើ​ប្រព័ន្ធ​ប្រតិបត្តិការ Android។

ពុំ​ទាន់​មាន​សេចក្ដី​រាយការណ៍​ណា​មួយ​បញ្ជាក់​អំពី តើ​នៅ​ពេល​ណា​មុខងារ​នឹង​នឹង​ចេញ​ឱ្យ​ប្រើ​បាន​ទូលំទូលាយ ឬ​នៅ​ពេល​ណា​អ្នក​ប្រើ iPhone អាច​ប្រើ​បាន​ដែរ​នោះ​ទេ។ អ្នក​បញ្ចេញ​មតិ​មួយ​ចំនួន​នៅ​លើ​គេហទំព័រ reddit បាន​របាយការណ៍​ថា ពួកគេ​បាន​ឃើញ​មុខងារ​ថ្មី voice calling កាលពី​ដើម​សប្ដាហ៍​នេះ ហើយ user ម្នាក់​ក្នុង​ចំណោម​នោះ​បាន​បង្ហោះ​វីដេអូ​នៅ​លើ Youtube បង្ហាញ​អំពី​មុខងារ​នេះ​ថែមទៀត។ Voice calling លើ WhatsApp ដែល​ត្រូវ​បាន​បង្ហោះ​នោះ មាន​លក្ខណៈ​ដូច​គ្នា​ច្រើន​ទៅ​នឹង voice calling លើ Viber, Facebook Messenger ឬ WeChat ដែរ។

នាយក​ប្រតិបត្តិ​ក្រុមហ៊ុន WhatsApp ធ្លាប់​បាន​ប្រកាស​ជា​សាធារណៈ ថា មុខងារ​ខល​សំឡេង​ បាន​កំពុង​ត្រូវ​បាន​អភិវឌ្ឍ​តាំងពី​ឆ្នាំ២០១៤ ក្នុង​សមាជ​ទូរស័ព្ទ​ពិភពលោក MWC 2014 មក​ហើយ។ យ៉ាងណា ក្រុមហ៊ុន​បាន​ឱ្យ​ដឹង​ទៀត​ថា ការ​ធ្វើតេស្ត​មាន​តែ​នៅ​លើ​ស្មាតហ្វូន Android ប៉ុណ្ណោះ ចំពោះ iPhone នៅ​ពុំ​ទាន់​ទេ។

ក្រុមហ៊ុន​បណ្ដាញ​ផ្ញើ​សារ​ល្បី​ឈ្មោះ​នេះ បាន​ប្រកាស​របាយការណ៍​ចំនួន​អ្នក​ប្រើ WhatsApp ​កាលពី​ខែ​មករា ២០១៥ ថា មក​ដល់​ពេល​នេះ​មាន active user ប្រមាណ ៧០០លាន​នាក់​ហើយ ដែល​ពួក​គេ​បាន​ផ្ញើ​សារ​ប្រមាណ ៣០ពាន់​លាន​សារ​ក្នុង​មួយ​ថ្ងៃៗ៕

ប្រែ​សម្រួល៖ លី ឈៀន

ប្រភព៖​ mashable