បច្ចុប្បន្ន​ប្រព័ន្ធ​ប្រតិបត្តិ​ទូរស័ព្ទ (mobile OS) ដែល​ក្ដាប់​ចំណែក​ទីផ្សារ​ច្រើន​ជាង​គេ គឺ​បាន​លើ Android ហើយ iOS ស្ថិត​នៅ​លំដាប់​លេខ​២ លើ​លោក។ ដោយសារ​តម្រូវការ​ប្រើប្រាស់​ស្មាតហ្វូន​របស់​ប្រជាជន​នៅ​តាម​បណ្ដា​ប្រទេស​នានា​លើ​ពិភពលោក​មាន​កំណើន ក្រុមហ៊ុន​បច្ចេកវិទ្យា​ជាច្រើនបាន​នាំ​គ្នា​ប្រឡូក​ខ្លួន​ក្នុង​ទីផ្សារ​ស្មាតហ្វូន​បណ្ដើរៗ​ហើយ។ ក្នុង​នោះ​ការ​បង្កើត​ប្រព័ន្ធ​ប្រតិបត្តិ mobile OS ថ្មី​កំពុង​ឡើង​កម្ដៅ មាន​ឧទាហរណ៍​ក្រុមហ៊ុន Samsung ចេញ Tizen OS ស្រាប់។ ចំណែក​ពេល​នេះ​វិញ ដល់​វេន Ubuntu OS ទៀត​ហើយ។

ស្មាតហ្វូន Ubuntu ម៉ូដែល BQ Aquaris E4.5 នឹង​សម្រេច​រួចរាល់​ជា​ស្ថាពរ ចេញ​លក់​លើ​ទីផ្សារ​នៅ​សប្ដាហ៍​ខាង​មុខ​នេះ​ហើយ។ នេះ​គឺ​ជា​ជំនាន់​ស្មាតហ្វូន​ថ្មី​មួយ​ទៀត​បន្ទាប់​ពី​ក្រុមហ៊ុន Canonical ដែល​ជា​អ្នក​អភិវឌ្ឍ Ubuntu Linux distribution បាន​ដាក់​ចេញ​គម្រោង​អភិវឌ្ឍ OS នេះ​តាំងពី​ឆ្នាំ២០១៣ ម្ល៉េះ។ ទឹកប្រាក់​ដែល​ក្រុមហ៊ុន​ចំណាយ​លើ​គម្រោង​មាន​ប្រមាណ ៣២លាន​ដុល្លារ​អាមេរិក។

មក​ដល់​ពេល​នេះ ក្រុមហ៊ុន Canonical ​សម្រេច​បាន​ស្មាតហ្វូន​មាន​ឈ្មោះ​ថា Ubuntu Edge ជា​ស្ថាពរ ហើយ​ក៏​មាន​គម្រោង​ចេញ​លក់​លើ​ទីផ្សារ​នៅ​សប្ដាហ៍​ក្រោយ​នេះ​តែ​ម្ដង។ លក្ខណៈ​សម្បត្តិ​ត្រួសៗ​មាន​នៅ​លើ Ubuntu Edge នេះ​រួម​មាន៖ អេក្រង់ ៤,៥អ៊ីញ (540×960)px, បំពាក់​អង្គ​ប្រតិបត្តិ quad-core MediaTek Cortex-A7 ល្បឿន 1.3GHz, RAM 1GB, អង្គ​ចងចាំ​ទំហំ 8GB និង​មាន​កាមេរ៉ា 8MP។ ក្រុមហ៊ុន​នឹង​ដាក់​លក់​ស្មាតហ្វូន​ប្រើ Ubuntu OS នេះ​នៅ​លើ​ទីផ្សារ​អឺរ៉ុប​ក្នុង​តម្លៃ​ធូរ​ថ្លៃ​ត្រឹមតែ ១៩៥ដុល្លារ ជាមួយ​ក្ដី​រំពឹង​ពី​ការ​លក់​ខ្ពស់ ខណៈ​ទីផ្សារ​អាមេរិក​មិន​ទាន់​ចេញ​លក់​នៅ​ឡើយ៕

ប្រែ​សម្រួល៖ លី ឈៀន

ប្រភព៖​ techspot