កម្ពុជាត្រៀមខ្ចីលុយពីចិន៣០០លានដុល្លារដើម្បីកសាងឃ្លាំងស្តុកទុកនិងឡសម្ងួតស្រូវ
កម្ពុជាត្រៀមខ្ចីលុយពីប្រទេសចិនចំនួន ៣០០លាន ដុល្លារអាមេរិកក្នុងការកសាងឃ្លាំងស្តុកទុកនិងឡសម្ងួតស្រូវចំនួន៤០កន្លែងដើម្បីជំរុញការនាំចេញឲ្យបាន ១លានតោននៅឆ្នាំ២០១៥នេះ ។
ថ្លែងប្រាប់អ្នកសារព័ត៌មានក្នុងមហាសន្និបាតប្រចាំឆ្នាំលើកទី១របស់សហព័ន្ធស្រូវអង្ករកម្ពុជាលោក ស៊ុន ចាន់ថុល រដ្ឋមន្ត្រីក្រសួងពាណិជ្ជកម្មឲ្យដឹងថា ក្រសួងពាណិជ្ជកម្មកំពុងតែសហការជាមួយក្រសួងសេដ្ឋកិច្ចនិងហិរញ្ញវត្ថុដើម្បីខ្ចីថវិកាចំនួន ៣០០លាន ដុល្លារអាមេរិកពីធនាគារចិនដើម្បីកសាងឃ្លាំងស្តុកនិងឡសម្ងួតស្រូវ ។
លោកមានប្រសាសន៍ថា៖«ថវិកា៣០០លានដុល្លារអាមេរិកខ្ចីពីប្រទេសចិននេះគឺដើម្បីកសាងឃ្លាំងស្តុកទុក ឡសម្ងួត៤០កន្លែងនៅខេត្ត៩របស់យើងដើម្បីឲ្យប្រជាកសិកររបស់យើងនេះ លោកអាចយកស្រូវរបស់លោកយកទៅប្រចាំ យកទៅទុកក្នុងឃ្លាំងដូច្នេះយើងអាចកិនស្រូវពីមួយឆ្នាំទៅមួយឆ្នាំបាន សព្វថ្ងៃនេះយើងខ្វះឃ្លាំងស្តុកទុក ខ្វះឡសម្ងួត ខ្វះថវិកាដើម្បីទិញស្រូវ ដូច្នេះស្រូវរបស់យើងហៀរទៅក្រៅប្រទេសច្រើនណាស់មិនបានកិននៅស្រុកយើងទេ »។
លោកមានប្រសាសន៍ថា៖«ថវិកា៣០០លានដុល្លារអាមេរិកខ្ចីពីប្រទេសចិននេះគឺដើម្បីកសាងឃ្លាំងស្តុកទុក ឡសម្ងួត៤០កន្លែងនៅខេត្ត៩របស់យើងដើម្បីឲ្យប្រជាកសិកររបស់យើងនេះ លោកអាចយកស្រូវរបស់លោកយកទៅប្រចាំ យកទៅទុកក្នុងឃ្លាំងដូច្នេះយើងអាចកិនស្រូវពីមួយឆ្នាំទៅមួយឆ្នាំបាន សព្វថ្ងៃនេះយើងខ្វះឃ្លាំងស្តុកទុក ខ្វះឡសម្ងួត ខ្វះថវិកាដើម្បីទិញស្រូវ ដូច្នេះស្រូវរបស់យើងហៀរទៅក្រៅប្រទេសច្រើនណាស់មិនបានកិននៅស្រុកយើងទេ »។
ចំពោះការសម្រេចឲ្យបាន១លានតោននៅក្នុងមួយឆ្នាំ២០១៥នេះ ទំនងជាមានការលំបាកខ្លះដែរដោយសារកំណើនការនាំចេញនៅឆ្នាំ២០១៤កើនឡើងតែ២% ប៉ុណ្ណោះ ។ លោករដ្ឋមន្រ្ដីថ្លែងថា៖«យើងខិតខំប្រឹងប្រែងប៉ុន្តែយើងត្រូវតែហ៊ាននិយាយថា អាចមានការលំបាកបន្តិចដើម្បីឲ្យបានមួយលានតោនដោយសារឆ្នាំមុននេះយើងលក់បានតែ ៣៨៧ពាន់តោនទេ ក្នុងឆ្នាំ២០១៣លក់បាន៣៧៨ពាន់តោនគឺកើនតែ២%ទេ អញ្ចឹងវាកើនពី២៨៧ពាន់ទៅ១លានតោនប្រហែលជាអាចមានការលំបាកបន្តិច » ។
ពាក់ព័ន្ធទៅលើកការនាំចេញអង្ករមួយលានតោននេះដែរ លោក សុខ ពុទ្ធីវុធ ប្រធានសហព័ន្ធស្រូវអង្ករកម្ពុជាលើកឡើងថា សហព័ន្ធស្រូវអង្ករកម្ពុជាបានរៀបចំផែនការមាសសឆ្នាំ២០១៥ដោយនៅក្នុងផែនការនេះផ្ដោតសំខាន់ទៅលើកផ្នែកសំខាន់ធំៗ៤យ៉ាង ។ លោកថា៖«តាមពិតការងារយើងចែកចេញជាបួនចំណែកធំៗគឺការងារទាក់ទងឥណទាន ការងារទាក់ទងរឿងទីផ្សារ(branding) ពូជ និងគោលនយោបាយកសិកម្មពាក់ព័ន្ធស្រូវអង្ករនេះ អញ្ចឹងចំណុះបួននេះគឺគ្របដណ្ដប់ទៅលើកលើកការងារដែលយើងនឹងធ្វើនៅឆ្នាំ២០១៥នេះ» ។
លោកបញ្ជាក់ទៀតថា អង្ករកម្ពុជាមានការចាប់អារម្មណ៍ពីបរទេស ប៉ុន្តែអ្វីដែលជាបញ្ហាសំខាន់គឺត្រូវរៀបចំការផ្គត់ផ្គង់ឲ្យបានគ្រប់គ្រាន់និងប្រព័ន្ធដឹកជញ្ជូនតាមផ្លូវទឹក ផ្លូវដែកឲ្យបានល្អប្រសើរជាមុនសិន ។
កាលពីពេលកន្លងទៅនេះ ប្រមុខរាជរដ្ឋាភិបាលកម្ពុជាសម្ដេចនាយករដ្ឋមន្ត្រី ហ៊ុន សែន លើកឡើងថា ទិសដៅនាំចេញអង្ករឲ្យបាន១លានតោននៅក្នុងឆ្នាំ២០១៥នេះ ទំនងជាមិនបានសម្រេចនោះទេ បើយោងទៅតាមតួលេខនៃការនាំចេញអង្ករនៅឆ្នាំ២០១៤ ។ សម្ដេចបញ្ជាក់ថា មូលហេតុដែលធ្វើឲ្យរាំស្ទះដល់ឧស្សាហកម្មនេះដោយសារកង្វះការវិនិយោគផ្នែកកែច្នៃអង្ករ និងកង្វះដើមទុនទិញស្រូវស្តុក ដើម្បីកែច្នៃនាំចេញរបស់ក្រុមហ៊ុនអង្ករ ។
គួរបញ្ជាក់ថាអង្កររបស់កម្ពុជា បានទទួលចំណាត់ថ្នាក់លេខ១ជាអង្ករឆ្ងាញ់ ជាងគេ(Worlds Best Rice) នៅលើពិភពលោកចំនួនបីឆ្នាំជាប់ៗគ្នាចាប់តាំងពីឆ្នាំ២០១២មក ក្រោមកម្មវិធីប្រកួតរសជាតិអង្ករឆ្ងាញ់ប្រចាំឆ្នាំ (Annual The Rice Trader World Rice Conference)។ កម្មវិធីប្រកួតប្រចាំឆ្នាំ ២០១២ បានប្រព្រឹត្តទៅនៅក្រុងបាលី នាប្រទេសឥណ្ឌូណេស៊ី និងឆ្នាំ២០១៣ នៅទីក្រុងហុងកុងហើយឆ្នាំ២០១៤សន្និសីទអង្ករពិភពលោកលើកទី៦ ត្រូវបានរៀបចំនៅសណ្ឋាគារសូហ្វីសតែលរាជធានីភ្នំពេញ ៕
អត្ថបទ ៖ ចាន់ សុខ នាង
