ព័ត៌មានក្ដៅៗ៖ យន្តហោះក្រុមហ៊ុន TransAsia មួយគ្រឿងធ្លាក់ចូលទន្លេនៅទីក្រុងតៃប៉ិព្រឹកនេះ (មានវីដេអូ)
យោងតាមសេចក្ដីរាយការណ៍ពីសារព័ត៌មានក្នុងស្រុកតៃវ៉ាន់ ដែលចេញផ្សាយប៉ុន្មាននាទីមុននេះ បានឱ្យដឹងថា យន្តហោះមួយគ្រឿងរបស់ក្រុមហ៊ុន TransAsia Airways ម៉ាក ATR-72 បានធ្លាក់នៅទន្លេ Keelung នៅទីក្រុងតៃប៉ិ បន្ទាប់ពីបើកបុកស្ពាន។ នេះបើតាមការបញ្ជាក់ពីលោក Sidney Lin អ្នកនាំពាក្យរដ្ឋាភិបាលក្រុងតៃប៉ិ នៅព្រឹកថ្ងៃពុធនេះ។
យន្តហោះខាងលើបានហោះចេញពីអាកាសយានដ្ឋាន Taipei Songshan ដោយឆ្ពោះទៅកាន់អាកាសយានដ្ឋាន Kinmen។
យន្តហោះក្រុមហ៊ុន TransAsia ជើងហោះហើរ B22816 បានធ្លាក់នៅម៉ោង ១០:៥៦នាទីព្រឹកម៉ោងក្នុងស្រុកត្រូវនឹងម៉ោង ៩:៥៦នាទីម៉ោងនៅកម្ពុជា។ ក្នុងចំណោមមនុស្សទាំង ៥៨នាក់នៅលើយន្តហោះនោះ មាន មនុស្សពេញវ័យ ៥១ នាក់ ក្មេង ២នាក់ និងបុគ្គលិកបម្រើការងារនៅលើយន្តហោះរួមទាំងអ្នកបើកបរ ៥នាក់។
គិតត្រឹមម៉ោង ១១ ជិត ១២ ម៉ោងនៅកម្ពុជា មានមនុស្សជាង ១០នាក់ត្រូវបានជួយសង្គ្រោះ និងបញ្ជូនទៅមន្ទីរពេទ្យ ខណៈមនុស្សជាច្រើននាក់ទៀតនៅជាប់ក្នុងយន្តហោះនៅឡើយ។
យន្តហោះម៉ាក ATR-72 ខាងលើ ទើបនឹងយកមកដល់ កោះតៃវ៉ាន់កាលពីឆ្នាំមុន។
សូមបញ្ជាក់ថា យន្តហោះរបស់ក្រុមហ៊ុនដដែលនេះមួយគ្រឿង បានជួបឧបទ្ទវហេតុធ្លាក់កាលពីឆ្នាំ២០១៤ ដែលបានសម្លាប់មនុស្សអស់ ៤៨នាក់បន្ទាប់ពីពីឡុតព្យាយាមចុះចត មិនបានសម្រេច ដោយសារបញ្ហាអាកាសធាតុ។ កាលណោះយន្តហោះ បានធ្លាក់ចំផ្ទះប្រជាពលរដ្ឋ៕
រង់ចាំតាមដានលម្អិតដែលនឹងធ្វើបច្ចុប្បន្នភាពជុំវិញព័ត៌មាននេះ៕
ដោយ៖ ឬទ្ធិ
យន្តហោះម៉ាក ATR របស់ក្រុមហ៊ុន TransAsia រូបតំណាង(ប្រភព ៖ atraircraft.com)
