ការពិត iPhone មានរូបមន្តសំខាន់ ៩យ៉ាងទើបឈ្នះទូរស័ព្ទ Android ល្បីដូចសព្វថ្ងៃ
ប្រសិនលោកអ្នកទិញស្មាតហ្វូនស៊េរីខ្ពស់ អ្នកនឹងមានអារម្មណ៍កក់ក្ដៅ ព្រមជាមួយទំនុកចិត្តខ្លាំងទៅលើគុណភាព និងមុខងារពិសេស បច្ចេកវិទ្យាចុងក្រោយនៅលើនោះ។ យ៉ាងណា គេនៅតែមានការប្រៀបធៀបស្មាតហ្វូនដែលខ្លួនកំពុងកាន់ក្នុងដៃ ទៅនឹងស្មាតហ្វូនទំនើបៗជាច្រើនទៀតនៅលើទីផ្សារ។ ជាក់ស្ដែង អ្នកមានទូរស័ព្ទ iPhone តែងមានការប្រៀបធៀបទៅនឹងទូរស័ព្ទ Galaxy ឬស្មាតហ្វូន Android ស៊េរីខ្ពស់ៗដ៏ទៃទៀត ឬអ្នកមានស្មាតហ្វូន Android មួយចំនួន យល់ថាទូរស័ព្ទរបស់ខ្លួនកំពុងប្រើ គឺល្អជាង iPhone។
ចុះមិត្តអ្នកអានវិញ តើយល់យ៉ាងណារវាង iPhone និងស្មាតហ្វូន Android? តើមួយណាល្អជាងមួយណា? នៅទំព័រមុន ស្មាតហ្វូន Android មាន ១៥ចំណុចយកឈ្នះ iPhone ចំណែកពេលនេះវិញ iPhone មាន ៩ចំណុចសម្រាប់តតាំងវិញ។ ខាងក្រោមនេះ គឺជាលក្ខណៈលេចធ្លោ ៩ចំណុចដែល iPhone ល្អជាងទូរស័ព្ទប្រើ Android OS៖
១) ទូរស័ព្ទ iPhone មានកម្មវិធី (app) ល្អៗមុនទូរស័ព្ទ Android
បើទោះបី ចំណែកទីផ្សារ iPhone នៅតូចជាងស្មាតហ្វូន Android ក្ដី ក៏ប៉ុន្តែអ្នកអភិវឌ្ឍកម្មវិធី (developer) បច្ចុប្បន្ននៅតែសម្រុកបង្កើត app សម្រាប់ដំណើរការនៅលើប្រព័ន្ធប្រតិបត្តិការ iOS មុន Android។ អ្នកអាចស្វែងរក និងប្រៀបធៀប app ដូចគ្នានៅលើ iPhone និងទូរស័ព្ទ Android ប៉ុន្តែមុខងារ និងការឌីហ្សាញនៅចាស់ app ដែលបង្កើតសម្រាប់ iOS។
២) ការឌីហ្សាញរូបរាង iPhone ស្អាតជាងស្មាតហ្វូន Android
ក្រៅពីស្មាតហ្វូនពីរម៉ូដែលគឺ HTC One និង Xiaomi Mi Note ដែលត្រូវបានសាធារណជនជាច្រើនដាក់ពិន្ទុខ្ពស់លើការរចនាស្អាត ទាន់សម័យនោះ ដូចជាពុំមានស្មាតហ្វូនណាទៀតអាចប្រៀបធៀបនឹង iPhone បាននៅឡើយ។ iPhone ទទួលបានការពេញនិយមដូចសព្វថ្ងៃក៏ព្រោះតែការឌីហ្សាញរូបរាងមានលក្ខណៈល្អស្អាតខុសពីទូរស័ព្ទ Android ដែលតែងមានរូបរាងប្លែកៗពីគ្នា។
៣) ប្រព័ន្ធបង់ប្រាក់តាមទូរស័ព្ទ (mobile-payments system) Apple Pay ដែលបំពាក់នៅលើ iPhone 6/6 Plus គឺមានលក្ខណៈទំនើប និងពិសេស
មុខងារ Apple Pay ទោះបីទើបចាប់ផ្ដើមបើទំព័រប្រវត្តិសាស្ត្រក្ដី ប៉ុន្តែក្នុងនោះ Apple គឺជាក្រុមហ៊ុនដំបូងគេដែលបង្កើតឡើងសម្រាប់ផ្ដល់ភាពងាយស្រួលដល់អ្នកប្រើ អាចទូទាត់ថ្លៃទំនិញដោយប្រើទូរស័ព្ទដៃ។ iPhone 6/6 Plus មាន NFC ដែលអាចគាំទ្រមុខងារ Apple Pay នេះ ហើយបច្ចុប្បន្នក្រុមហ៊ុន Apple កំពុងទាក់ទងទៅក្រុមហ៊ុន និងធនាគារហិរញ្ញវត្ថុដើម្បីសហការផ្ដល់ការគាំទ្រជាមួយមុខងារ Apple Pay របស់ខ្លួន។
៤) បុគ្គលិកនៅ Apple Store ផ្ដល់សេវាកម្មល្អ និងរាក់ទាក់ រង់ចាំឆ្លើយរាល់ចម្ងល់របស់អតិថិជន
តើអ្នកនឹងទិញសុំជំនួយពីនរណា នៅពេលទូរស័ព្ទ Android របស់អ្នកមានបញ្ហាម្ដងៗ? យោងតាមសារព័ត៌មាន Business Insider ឱ្យដឹងថា តាមបណ្ដាក្រុមហ៊ុន និងហាងចែកចាយស្មាតហ្វូន Android គឺមិនមានផ្ដល់ការណែនាំនៅពេលទូរស័ព្ទ Android មានបញ្ហាទាំងអស់ឡើយ។ ដោយឡែក ចំពោះគ្រប់ហាង Apple Store ទាំងអស់ គឺមាននូវបុគ្គលិករួសរាយរាក់ទាក់ រង់ចាំឆ្លើយនឹងសំណួរ និងចម្ងល់ទាំងឡាយរបស់អតិថិជនទាំងអស់។
៥) ឆាប់ៗនេះ អ្នកនឹងអាចបញ្ជាសម្ភារៈប្រើប្រាស់ក្នុងផ្ទះជាច្រើន ដោយគ្រាន់តែប្រើ iPhone
ប្រព័ន្ធ Platform ប្រភេទ smart-home របស់ Apple ដែលហៅឈ្មោះថា HomeKit នឹងត្រូវក្រុមហ៊ុនដាក់ចេញឱ្យប្រើប្រាស់ប្រកបដោយភាពឆ្លាតវៃ បច្ចេកវិទ្យាខ្ពស់ ដើម្បីផ្ដល់ភាពងាយស្រួលបញ្ជាសម្ភារៈប្រើប្រាស់ក្នុងផ្ទះជូនអតិថិជន និងកាន់តែសម្បូរបែបថែមទៀតក្នុងពេលឆាប់ៗខាងមុខ។
HomeKit គឺជា platform ដែលនឹងអនុញ្ញាតឱ្យអ្នកប្រើ គ្រប់គ្រង និងបញ្ជាឧបករណ៍អេឡិចត្រូនិកមួយចំនួននៅក្នុងផ្ទះ ពីចម្ងាយដូចជា អំពូលភ្លើង និងប្រដាប់ប្រើប្រាស់ជាច្រើនទៀត ដោយប្រើ iPhone ឬ iPad។ គេរំពឹងថា នៅចុងឆ្នាំ២០១៥ នេះ HomeKit នឹងបំពេញមុខងារបានពេញលេច នឹងត្រូវបានដាក់ឱ្យប្រើទូលំទូលាយ។
៦) ឪពុកម្ដាយ មានភាពងាយស្រួលក្នុងការត្រួតពិនិត្យកម្មវិធី (app) ដែលកូនៗប្រើប្រាស់បានល្អជាងទូរស័ព្ទ Android
នៅលើ iOS 8 ត្រូវបាន Apple បន្ថែមមុខងារមួយឈ្មោះថា Family Sharing ដែលអាចឱ្យអ្នកចែកចាយ (share) កម្មវិធី (apps), សៀវភៅ (book) និងមាតិកាផ្សេងៗឆ្លងកាត់ឧបករណ៍ (device) ផ្សេងៗគ្នារបស់សមាជិកគ្រួសារបាន។
មុខងារ Family Sharing ថែមទាំងអាចឱ្យអ្នកដាក់កម្រិតនៃការប្រើប្រាស់ app របស់កូនៗ ដោយគិតថា app ទាំងនោះមិនស័ក្ដិសមសម្រាប់ក្មេងៗប្រើ។
៧) គ្មានទូរស័ព្ទ Android ណា យកឈ្នះបច្ចេកវិទ្យាស្កេនក្រយៅដៃ fingerprint sensor របស់ iPhone នៅឡើយ ខណៈ Samsung និង HTC កំពុងអភិវឌ្ឍដែរ
ក្រុមហ៊ុនផលិតស្មាតហ្វូន Android ចំនួនពីរគឺ Samsung និង HTC បានខិតខំ និងបានអភិវឌ្ឍមុខងារស្កេនក្រយៅដៃបំពាក់លើទូរស័ព្ទរបស់ខ្លួន។ ប៉ុន្តែ fingerprint នៅលើទូរស័ព្ទទាំងនោះ មិនទាន់មានសារប្រយោជន៍ និងដំណើរការទៀងទាត់ដូច TouchID sensor នៅលើ iPhone 6/6 Plus នៅឡើយ។
ប៉ុន្មានឆ្នាំមុន ក្រុមហ៊ុន Apple បានទិញក្រុមហ៊ុន Authentec ដែលមានឯកទេសបង្កើត fingerprint sensor សមត្ថភាពខ្ពស់សម្រាប់បំពាក់លើទូរស័ព្ទ។ មកដល់ពេលនេះ គ្មាននរណាអាចប្រកួតជាមួយ TouchID បាននោះទេ។
៨) កាមេរ៉ាទូរស័ព្ទ Android ចំនួនតិចតួចណាស់ ដែលអាចប្រៀបធៀបនឹងកាមេរ៉ា iPhone 6 (ផ្ដោតលើគុណភាព មិននិយាយចំពោះទំហំ MP)
ស្មាតហ្វូន Android ស៊េរីខ្ពស់មួយចំនួនបានបំពាក់កាមេរ៉ាមានគុណភាពល្អ មិនចាញ់ iPhone 6 នោះទេ ជាក់ស្ដែង Galaxy Note 4 ជាដើម។ កាមេរ៉ា iPhone 6 មានសមត្ថភាពថតរូបបានច្បាស់ល្អ ជាមួយមុខងារកាមេរ៉ាថតវីដេអូពិសេសៗ ដូចជា slow-motion និង time-lapse ជាដើម។ មានពាក្យចចាមអារ៉ាមមកថា iPhone ជំនាន់ថ្មីនឹង បំពាក់បច្ចេកវិទ្យា DSLRs កាមេរ៉ាទៀត។
៩) Software តែងទទួលបានការធ្វើបច្ចុប្បន្នភាពជានិច្ច មិនដូចទូរស័ព្ទ Android ដែលកម្របាន ឬមិនអាចអាប់ដេត (Update) ព្រោះតែស៊េរីចាស់ពេក
Google បានធ្វើបច្ចុប្បន្នភាពលើប្រព័ន្ធប្រតិបត្តិការទូរស័ព្ទ Android ក្នុងមួយឆ្នាំម្ដង ដូចជា iOS របស់ Apple អីចឹងដែរ។ ម្ចាស់ស្មាតហ្វូន Android មួយចំនួន មិនសុទ្ធតែអាចធ្វើបច្ចុប្បន្នភាព Software ចុងក្រោយនោះទេ លុះត្រាតែទិញស្មាតហ្វូនថ្មីមួយទៀត។ នោះដោយសារតែ ក្រុមហ៊ុនជាម្ចាស់ម៉ាកទូរស័ព្ទ មិនផ្ដល់កញ្ចប់គាំទ្រការអាប់ដេត (Update) ផ្ទុយគ្នាពី ម្ចាស់ iPhone ដែលតែងតែអាច Update បាននៅពេល Apple ដាក់ចេញជំនាន់ iOS ថ្មីៗ។
ប្រែសម្រួល៖ លី ឈៀន
ប្រភព៖ businessinsider
