អាយុ ១២ឆ្នាំខ្លាំងមិនធម្មតាខាងសរសេរកម្មវិធីកុំព្យូទ័រ រហូត Google ជួលទាំងក្មេងខ្ចី
កុមារម្នាក់អាយុ ១២ ឆ្នាំជនជាតិក្រិក មានសមត្ថភាពខ្ពស់អាចសរសេរកម្មវិធីសម្រាប់ដំណើរការលើម៉ាស៊ីនកុំព្យូទ័រ ហើយត្រូវក្រុមហ៊ុន Googleផ្ដល់ការងារឲ្យធ្វើ។ ក្រុមហ៊ុន Google បានទទួលកុមារអាយុ ១២ ឆ្នាំជាបុគ្គលិកពេញសិទ្ធិរបស់ក្រុមហ៊ុនតែម្ដង។ កុមាររូបនេះ ការងាររបស់គេត្រូវធ្វើខាងផ្នែករៀបចំគូសវាសប្លង់បណ្ដាញសង្គម (social network) ដែលការងារត្រូវផ្ដល់សេវាសម្រាប់អ្នកកម្សាន្តតាមអ៊ីធឺណិតផ្នែកហ្គែម (game) និងកិច្ចការមួយទៀត គេមានភារកិច្ចត្រូវមើលការខុសត្រូវលើប្រព័ន្ធសន្តិសុខអ៊ីនធឺណិត។
កុមារា Nikos Adam ដែលទើបតែចូលរៀនថ្នាក់ទី៦ នៅក្នុងឆ្នាំនេះ ត្រូវក្រុមហ៊ុន Google ស្គាល់ស្នាដៃរបស់គេនៅក្នុងកម្មវិធីប្រកួតប្រជែងមួយឈ្មោះ International Fair of Thessalonica នៅពេលរូបគេមានសមត្ថភាពអាចបង្កើតប្រព័ន្ធការពារ ដើម្បីទប់ទល់នឹងការវាយប្រហារតាមអ៊ីនធឺណិត។
បន្ទាប់ពីស្គាល់ស្នាដៃរបស់ Adam ថារូបគេខ្លាំងកម្រិតណា ក្រុមហ៊ុន Google បានចុះទៅទាក់ទងដល់ឪពុកម្ដាយរបស់គេ ដើម្បីសុំឲ្យគេបានទៅធ្វើការនៅក្នុងក្រុមហ៊ុន ព្រោះអាយុត្រឹមប៉ុណ្ណេះ កំពុងស្ថិតក្រោមអាណាព្យាបាលរបស់ឪពុកម្ដាយ។ បច្ចុប្បន្ន Adam កំពុងធ្វើការឲ្យក្រុមហ៊ុន Google ខាងសរសេរកម្មវិធីកុំព្យូទ័រច្រើនប្រភេទ។ ក្នុងចំណោមនោះកម្មវិធីសម្រាប់ផ្ដល់សេវាបណ្ដាញសង្គម «Tech is Social»។
ប្រែសម្រួល ៖ អន សំអាង
