ស្មាតហ្វូន​ស៊េរី​ថ្មី​ម៉ូដែល Meizu M1 របស់​ក្រុមហ៊ុន​ទូរស័ព្ទ​ចិន Meizu ដែល​បាន​ប្រកាស​ចេញ​កាលពី​ចុង​ខែ​មករា ពេល​នេះ​ លក់​ដាច់​អស់​ពី​ស្តុក គ្មាន​សល់​ដោយ​​ចំណាយពេល​តែ ៦០វិនាទី​ប៉ុណ្ណោះ។ ក្រុមហ៊ុន​អាច​លក់ Meizu M1 ដាច់​អស់​ចំនួន ១០០.០០០​គ្រឿង (១០ម៉ឺន​គ្រឿង) ដោយ​ប្រើ​ពេល​យ៉ាង​ខ្លី​មិន​គួរ​ឱ្យ​ជឿ​ត្រឹមតែ ១នាទី បន្ទាប់​ពី​ក្រុមហ៊ុន​បាន​ដាក់​ឱ្យ​បញ្ជា​ទិញ​មុន​កន្លង​ទៅ។

ទូរស័ព្ទ​ដែល​ទទួល​បាន​ការ​ពេញ​និយម​លក់​ដាច់​ខ្លាំង​នេះ បាន​ភ្ជាប់​មក​ជាមួយ​លក្ខណៈ សម្បត្តិ​ដូច​ជា៖

-អេក្រង់ HD ប្រភេទ TFT ទំហំ ៥អ៊ីញាំ (1280×768)px
-កាមេរ៉ា​ក្រោយ 13MP មាន​ភ្លើង​ជំនួយ LED flash និង​កាមេរ៉ា​មុខ​ទំហំ 5MP
-អង្គ​ប្រតិបត្តិ Quad-core MT6732 64-bit ល្បឿន 1.5GHz
-RAM ទំហំ 1GB
-អង្គ​ចងចាំ​ទំហំ 8GB អាច​បន្ថែម microSD បាន​ទំហំ 128GB
-តំណភ្ជាប់៖ Wi-Fi 802.11 a/b/g/n, Wi-Fi Direct, hotspot, Bluetooth v4.0, GPS, microUSB v2.0

ពេល​នេះ ក្រុមហ៊ុន​មិន​ទាន់​បញ្ជាក់​ឱ្យ​ដឹង​នៅ​ឡើយ​ទេ​ថា តើ​ពេល​ណា​ទើប​ស្មាតហ្វូន M1 របស់​ខ្លួន​មាន​ក្នុង​ស្តុក​ទៀត​នោះ។

សូម​បញ្ជាក់​ថា គ្រាន់តែ​ក្រុមហ៊ុន Apple ប្រកាស​ចេញ iPhone 6/6 Plus ភ្លាម ក្រុមហ៊ុន Meizu ដែល​មាន​ស្នាក់ការ​នៅ​ចិន​នេះ បាន​ចំអក​ដាក់ Apple ថា បាន​ឌីហ្សាញ​ម៉ូដ​នៅ​លើ iPhone 6 មាន​រូបរាង​ស្រដៀង​នឹង​ស្មាតហ្វុន​របស់​ខ្លួន​ម៉ូដែល Meizu MX 4។ «តើ​នេះ​ជា​ចេតនា ឬ​មិន​មែន?» Meizu លើកឡើង៕

ប្រែ​សម្រួល៖ លី ឈៀន

ប្រភព៖​ Gizmochina, gsmarena