អង់គ្លេសចំណាយប្រាក់២០លានដុល្លារ គ្រាន់តែយាមមិនឲ្យ Julian Assange ចេញពីស្ថានទូត
ប៉ូលិសអង់គ្លេសនិយាយថា ពួកគេកំពុងតែពិនិត្យសើរើឡើងវិញចំពោះធនធានចំណាយទៅលើការយាមការ ពារកុំឲ្យលោក Julian Assange ស្ថាបនិកអង្គការ Wikileaks ចាកចេញពីស្ថានទូតមួយនៅក្រុងឡុងដ៍។
អង់គ្លេសចំណាយប្រាក់២០លានដុល្លារគ្រាន់តែយាមមិនឲ្យ Julian Assange ចេញពីស្ថានទូត (Credit: Reuters)
អង្គការ Wikileaks គឺជាស្ថាប័នមួយដែលផ្សាយទម្លាយរឿងសម្ងាត់របស់បណ្ដារដ្ឋាភិបាលក្នុងពិភពលោកតាមអ៊ីនធើរណិត ហើយលោក Julian Assange ដែលជាជនជាតិអូស្រ្ដាលីបានជ្រកកោននៅក្នុងស្ថានទូតអេក្វាឌ័រនៅក្រុងឡុងដ៍អស់ពេល២ឆ្នាំកន្លះហើយ ដោយលោកមិនហ៊ានចេញពីស្ថានទូតទេ ដើម្បីកុំឲ្យប៉ូលិសចាប់ខ្លួន។
ស្នងការប៉ូលិសក្រុងឡុងដ៍មិនបានបញ្ជាក់ច្បាស់លាស់អំពីការផ្លាស់ប្ដូរដែលអាជ្ញាធរនឹងធ្វើឡើងនោះទេ ប៉ុន្ដែបាននិយាយថា កងកម្លាំងប៉ូលិសកំពុងតែធ្វើការវាយតម្លៃលើជម្រើសជាច្រើនពីព្រោះការយាមកាមឃ្លាំមើលលោក Julian Assange ២៤ម៉ោង១ថ្ងៃបានធ្វើឲ្យមានការចំណាយធនធានសន្ដិសុខច្រើនណាស់។
មានការឲ្យដឹងថា គេបានចំណាយប្រាក់២០លានដុល្លារសម្រាប់ប៉ូលិសឈរជើងយាមឃ្លាំមើលលោក Julian Assange ខ្លាចលោកគេចចេញពីស្ថានទូត។
លោកចូលជ្រកកោននៅស្ថានទូតអេក្វាឌ័រដើម្បីគេចពីការបញ្ជូនខ្លួនលោកទៅឲ្យប្រទេសស៊ុយអែដ ដែលគេចង់បានលោកទៅប្រឈមមុខនឹងបទចោទបំពានផ្លូវភេទ ជាអ្វីដែលលោកនិយាយថា ជាលេសដើម្បីប្រគល់លោកទៅឲ្យសហរដ្ឋអាម៉េរិកជុំវិញរឿងដែលលោកបានទម្លាយឯកសារសម្ងាត់ថ្នាក់កំពូល៕ ប្រភពៈ Radioaustralia
