GMAC៖ ប្រាក់ឈ្នួលខ្ពស់ ការបញ្ជាទិញធ្លាក់
ភ្នំពេញៈ របាយការណ៍ដែលលើកឡើងថា ការបញ្ជាទិញរបស់អតិថិជននៅក្នុងវិស័យកាត់ដេរកម្ពុជាមានដំណើរការ យឺតកាលពីចុង ឆ្នាំ២០១៤ បានបង្កឲ្យមានប្រតិកម្មផ្សេងៗគ្នាចេញពីតំណាងឧស្សាហកម្ម។
កម្មករកំពុងធ្វើការក្នុងរោងចក្រកាត់ដេរសម្លៀកបំពាក់មួយនៅទីក្រុងភ្នំពេញ។ ម៉ៃ វីរៈ
កាលពីថ្ងៃ ទី២ ខែកុម្ភៈ Bloomberg រាយការណ៍ថា ក្នុងរយៈពេល ១១ ខែដំបូងនៃ ឆ្នាំ២០១៤ ការបញ្ជាទិញសម្រាប់រោងចក្រសម្លៀកបំពាក់ និង រោងចក្រស្បែកជើងរបស់កម្ពុជាបានកើនឡើងតែ ១ ភាគរយប៉ុណ្ណោះ បើធៀបនឹងរយៈពេលដូចគ្នាកាលពីឆ្នាំមុន។
លោក ខេន លូ អគ្គលេខាធិការសមាគមរោងចក្រកាត់ដេរនៅកម្ពុជា (GMAC) បានប្រាប់ Bloomberg ថាដំណើរការយឺតនេះគឺដោយសារតែប្រាក់ឈ្នួលកើនឡើងលឿន ការធ្វើកូដកម្មញឹកញាប់ អស្ថិរភាពផ្នែកនយោបាយ និងប្រព័ន្ធផ្សព្វផ្សាយព័ត៌មានអវិជ្ជមានដែលបាន «ធ្វើឲ្យខូចដល់ការប្រកួតប្រជែងរបស់រោងចក្រកម្ពុជា»។
លោកអះអាងថា តួលេខការបញ្ជាទិញរបស់អ្នកទិញក្នុងរយៈពេល ១១ ខែមានចំនួន ១ ភាគរយ ប៉ុន្តែបានបដិសេធមិនធ្វើអត្ថាធិប្បាយជាមួយ ភ្នំពេញ ប៉ុស្ដិ៍។
លោក កាំង មូនីកា អគ្គលេខាធិការរងរបស់ GMAC បានថ្លែងថា៖ «នេះមិនមែនជាការធ្វើឲ្យអ្នករាល់គ្នាមានការភ្ញាក់ផ្អើល ដោយសារអ្វីដែលបានកើតឡើងនៅក្នុងរយៈពេល ១៨ ខែចុងក្រោយនេះនោះទេ»។
ទិន្នន័យ GMAC បង្ហាញថា ការនាំចេញសម្លៀកបំពាក់របស់ប្រទេសកម្ពុជាបានកើនឡើងពីរដងចាប់ពី ឆ្នាំ២០០៩ ដល់ចុង ឆ្នាំ២០១៣។
ប្រាក់ឈ្នួលអប្បបរមានៅកម្ពុជាកើនឡើងពីរដងបន្ទាប់ពីការធ្វើ កូដកម្មទូទាំងប្រទេសរបស់កម្មករកាត់ដេរកាលពី ខែមករា ឆ្នាំ២០១៥ ដែលនាំឲ្យមនុស្ស ៥ នាក់ត្រូវបានសម្លាប់ដោយកងកម្លាំងរដ្ឋាភិបាល។
ប្រាក់ឈ្នួលអប្បបរមាបានកើនឡើងដល់ ១២៨ ដុល្លារក្នុងមួយខែ។
សញ្ញានៃការធ្លាក់ចុះការបញ្ជាទិញរបស់ឧស្សាហកម្មដ៏ធំនេះ បានកើតឡើងពីចុងត្រីមាស ទី៣ ឆ្នាំ២០១៤ នៅពេលការនាំចេញសម្លៀកបំពាក់បានធ្លាក់ចុះមកនៅត្រឹម ១,៦១ ពាន់លានដុល្លារ ដែលធ្លាក់ចុះ ៤ ភាគរយធៀបនឹង ១,៦៨ ពាន់លានដុល្លារក្នុងអំឡុងត្រីមាស ទី៣ ឆ្នាំ២០១៣។
យោងតាមលោក Dave Welsh នាយកប្រចាំប្រទេសសម្រាប់មជ្ឈមណ្ឌលសាមគ្គីភាពក្រុមសិទ្ធិពលកម្ម បានជំទាស់នឹងហេតុផលរបស់ GMAC ថាការធ្លាក់ចុះនេះមួយផ្នែកធំដោយសារតែការបង្កើនប្រាក់ឈ្នួល និងការតវ៉ាប្រឆាំងកាលពីដើម ឆ្នាំ២០១៤។
លោកបានលើកឡើងថា៖ «ការគណនាដ៏សំខាន់ក្នុងការធ្លាក់ចុះនេះគឺជាព័ត៌មានមួយដ៏អាក្រក់ និងការឆ្លើយតបរបស់រដ្ឋាភិបាលដែលបានចេញបន្ទាប់ពីការតវ៉ាប្រឆាំង នៅដើម ឆ្នាំ២០១៤»។
លោកថ្លែងថា ការឆ្លើយតបរបស់រដ្ឋាភិបាលកម្ពុជា និងកង្វះការស៊ើបអង្កេតអំពីការតវ៉ាប្រឆាំងកាលពី ខែមករា ឆ្នាំ២០១៤ ហើយច្បាប់សហជីពនៅមិនទាន់បានដោះស្រាយនៅឡើយគឺជាបញ្ហាដ៏សំខាន់ផង ដែរក្នុងការធ្វើឲ្យប៉ះពាល់ដល់ការបញ្ជាទិញរបស់អ្នកទិញ៕ ប្រភពៈ ភ្នំពេញប៉ុស្តិ៍
