ISIS បញ្ចេញវីដេអូថ្មី៖ ឱ្យកូនក្មេងហាត់ក្បាច់គុន និងអប់រំសតិអារម្មណ៍ ឲ្យក្លាយជាអ្នកចម្បាំងឈានមុខ (មានវីដេអូ)
កាលពីយប់មិញ ISIS បានបង្ហោះវីដេអូដ៏ថ្មីសន្លាងមួយឈុតទៀត និយាយអំពីការបណ្ដុះបណ្ដាល និងបំពាក់បំប៉នខាងស្មារតី និងសម្ភារៈចំពោះកុមារឈានមុខរបស់គេ ដើម្បីក្លាយជាគ្រាប់ពូជ ស្នងតំណែងពីអ្នកជំនាន់ចាស់។ នៅក្នុងវីដេអូ គេឃើញក្រុមភេរវជន កំពុងបញ្ចូលមនោគមវិជ្ជាក្មេងៗ ដោយបង្រៀន ក្បាច់គុន និងអប់រំសតិអារម្មណ៍។
អ្នកជំនាញខាងវិស័យសន្តិសុខជាតិ លោក Alex Kassirer វិភាគឃើញថាវីដេអូនោះថតនៅប្រទេសស៊ីរី នៅក្នុងមណ្ឌលហ្វឹកហ្វឺនឈ្មោះ Al Farouk។ វីដេអូនេះមិនដឹងថតនៅពេលណាឲ្យពិតប្រាកដនោះទេ។ គ្រូបង្គោលសម្រាប់មើលការខុសត្រូវកុមារទាំងនោះ ឲ្យដឹងថាក្នុងចំណោមកុមារទាំង ៨០ នាក់នោះ មានខ្លះជាកូនសាសន៍បរទេស ដែលជាកងប្រដាប់អាវុធទៅពីស្រុកក្រៅទៅចូលរួមក្នុងក្រុមជ្រុលនិយមនិកាយស៊ុននី (Sunni extremists)។
ការបណ្ដុះបណ្ដាលនេះចែកជាវគ្គៗ។ កុមារទាំងនោះបានឆ្លងកាត់វគ្គទីមួយរួចហើយ រយៈពេលបណ្ដុះបណ្ដាល ៤ ខែ។ គ្រូបង្ហាត់នោះចាត់ទុកកុមារទាំងនេះ ជាអ្នកដែលត្រូវបានសម្រិតសម្រាំងយ៉ាងពិសេសជាអ្នកស្នងត្រកូល ឬអ្នកបន្តវេន (the next generation of ISIS)។ កុមារនៅក្នុងវីដេអូដែលក្រុម ISIS បំពាក់បំប៉នទាំងនោះសុទ្ធតែជាកុមារាទាំងអស់។
កាលពីពេលកន្លងទៅ ISIS បានប្រកាសរើសក្មេងៗអាយុក្រោម ១៥ ឆ្នាំ ដើម្បីយកទៅ «បញ្ចូលមនោគមវិជ្ជាឲ្យក្លាយជាមនុស្សថ្មី ឬលាងខួរក្បាល – brainwash» ព្រោះក្មេងៗ ខួរក្បាលនៅខ្ចី ចង់ឲ្យគេបត់ទៅតាមផ្លូវណា គឺគេបត់ទៅតាមផ្លូវនោះ។ នៅក្នុងវីដេអូដែល ISIS បង្ហោះកាលពីខែមករា គេឃើញកុមារម្នាក់ដែលទទួលមនោគមវិជ្ជាពី ISIS បានលើកកាំភ្លើងបាញ់ស្លាប់ឈ្លើយសឹកពីរនាក់ ដែលត្រូវក្រុមនេះសង្ស័យជាគិញសម្ងាត់ ឬភ្នាក់ងារបង្កប់របស់ប្រទេសរុស្ស៊ី (Russian spy)៕
ប្រែសម្រួល ៖ អន សំអាង
ប្រភព៖ The Daily Mail និង NBC
