ស្ពានស៊ូបាសា (ស្ពានអ្នកលឿង) នឹងដាក់ឱ្យដំណើរការនៅថ្ងៃទី១ ខែមេសា ខាងមុខនេះ
ស្ពានបែបទំនើបប្រើប្រាស់ខ្សែកាបទម្រ និងជាស្ពានវែងជាគេបង្អស់នៅកម្ពុជា ស្ពានស៊ូបាសា (ស្ពានអ្នកលឿង) នឹងត្រូវដាក់ឲ្យដំណើរការប្រើប្រាស់នៅថ្ងៃទី១ ខែមេសា ខាងមុខនេះ មុនបុណ្យចូលឆ្នាំខ្មែរប្រពៃណីជាតិ ។
តាមទំព័រហ្វេសបុកផ្ទាល់ខ្លួនរបស់លោក គឹម គុណវឌ្ឍន៍ អគ្គនាយកទូរទស្សន៍ជាតិកម្ពុជា ឲ្យដឹងថា ប្រជាពលរដ្ឋដែលអ្នកជាអ្នកស្រុកព្រៃវែង អ្នកស្រុកស្វាយរៀង នឹងបានប្រើប្រាស់ស្ពានស៊ូបាសា ឬ ស្ពានអ្នកលឿងដែលជាចំណងដៃជំនួយដ៏ពិសិដ្ឋពីរដ្ឋាភិបាល និងប្រជាជនជប៉ុននឹងបើកសម្ពោធជាផ្លូវការនៅដើមខែមេសាខាងមុខ ក្រោមអធិបតីភាពដ៏ខ្ពង់ខ្ពស់របស់ប្រមុខរាជរដ្ឋាភិបាលកម្ពុជា។
ស្ពានលឿងដែលជាជំនួយឥតសំណងពីរដ្ឋាភិបាលជប៉ុន ហើយបើតាមគម្រោងនឹងចំណាយថវិកាអស់ប្រមាណជាង ៩៥ លានដុល្លារអាមេរិក ត្រូវបានចាប់ផ្តើមបើកដំណើរការសាងសង់នៅចុងឆ្នាំ២០១០ ហើយគ្រោងបញ្ចប់រួចរាល់នៅថ្ងៃទី ៣១ ខែមីនា ឆ្នាំ២០១៥ ។ រូបស្ពានអ្នកលឿង(ស៊ូបាសា)ត្រូវបានយកទៅដាក់ក្នុងក្រដាសប្រាក់៥០០រៀលចេញថ្មីនាដើមឆ្នាំ២០១៥នេះ ។
ស្ពានអ្នកលឿង ជាច្រកសេដ្ឋកិច្ចដែលត្រូវបានតភ្ជាប់ពីផ្លូវជាតិលេខ១ ឆ្លងកាត់តាមទន្លេមេគង្គ ត្រង់ចំណុចព្រំប្រទល់រវាងខេត្តកណ្តាល និង ខេត្តព្រៃវែង ដែលមានបណ្តោយប្រវែង ២២១០ ម៉ែត្រនិងទទឹងចំនួន ១៣,៥០ ម៉ែត្រកម្ពស់ ៣៧,៥ម៉ែត្រពីទឹក៕
អត្ថបទ ៖ ចាន់ សុខ នាង
