វីដេអូ ISIS កាត់ក្បាលជនជាតិអេហ្ស៊ីប ២១នាក់ មិនមែនជាការពិត ១០០%ទេ
កាលពីថ្ងៃទី១៧ កុម្ភៈ ២០១៥ ក្រុម ISIS បានបង្ហោះវីដេអូមួយដែលមានរយៈពេល ៥ នាទី ស្ដីពីសកម្មភាពកាត់ក្បាលជនជាតិអេហ្ស៊ីប ២១ នាក់ជាគ្រិស្តបរិស័ទ។ ខ្សែវីដេអូនេះត្រូវគេសង្ស័យថាទំនងមិនមែនជាការពិត ១០០% ទេ ព្រោះអ្នកជំនាញបានអះអាងកាលពីពេលថ្មីៗយ៉ាងដូច្នេះ បន្ទាប់ពីយកវីដេអូនោះមកពិនិត្យមើលឡើងវិញ ហើយវិភាគលើខ្លឹមសារវីដេអូ ធៀបនឹងទិដ្ឋភាពជាក់ស្ដែង។ ខាងក្រោមនេះជាការរៀបរាប់ត្រួសៗ ដែលបញ្ជាក់ថាវីដេអូនោះមិនពិតទាំងស្រុង ហើយត្រូវគេយកទៅថែមថយត្រង់ចំណុចខ្លះ។
ខ្សែវីដេអូ ដែលក្រុម ISIS បង្ហោះតាមបណ្ដាញសង្គម កាលពីសប្ដាហ៍មុន បង្ហាញថាជនជាតិអេហ្ស៊ីប ២១ នាក់នៅប្រទេសលីប៊ី (Libya) ត្រូវក្រុមនេះកាត់ក្បាលក្បែរមាត់សមុទ្រ ជាមួយនិងផ្ទៃសមុទ្រក្រហមច្រាល ក្រាលដោយឈាម។ នៅក្នុងវីដេអូ គេឃើញចំណាប់ខ្មាំងត្រូវគេបណ្ដើរម្នាក់មួយៗ តាមបណ្ដោយឆ្នេរសមុទ្រ។ តាមពិត វីដេអូនេះមិនមែនជាការពិតទាំងស្រុងទេ គឺមានឈុតខ្លះ ត្រូវ ISIS កែច្នៃបន្ថែមតាមបច្ចេកទេសទំនើប។ នេះជាការអះអាងរបស់អ្នកជំនាញខាងវិភាគវីដេអូ។
តាមពិត វីដេអូនេះថ្វីត្បិតមិនពិតត្រង់ផ្នែកខ្លះ ក៏មិនមែនមានន័យថាគ្មានការពិត ១០០% នោះដែរ។ អ្នកជំនាញអះអាងថាក្រុម ISIS យកវីដេអូដើម មកកែច្នៃក្នុងកម្មវិធីកុំព្យូទ័រមួយចំនួន តាមបច្ចេកវិទ្យាទំនើប ហើយមិនមែនប្រើកម្មវិធីធម្មតាៗដូចជា៖ Photoshop ឬ Adobe After Effect ទេប៉ុន្តែប្រើសុទ្ធតែកម្មវិធីទំនើបមិនចាញ់ហូលីវូដប៉ុន្មានឡើយ។ ឧទាហរណ៍ ផ្ទៃសមុទ្រទូទៅ ទូទាំងពិភពលោក គឺមានពណ៌ខៀវ ប៉ុន្តែផ្ទៃសមុទ្រនៅក្នុងវីដេអូ ត្រូវគេកែច្នៃឲ្យទៅជាពណ៌ក្រហមច្រាលដូចឈាម។ ចំណុចមួយទៀត ឆ្នេរខ្សាច់ និងមាត់សមុទ្រនោះ មិនមែនជាការពិតទេ។ អ្នកជំនាញសង្ស័យថាវីឌីអូនោះថតក្នុងស្ទូឌីយោ និងសម្រាំងរូបភាព (edit) តាមបច្ចេកវិទ្យាទំនើប។
វីដេអូដែលគេកែច្នៃ បង្ហាញថា ISIS មាឌធំជាងចំណាប់ខ្មាំងឆ្ងាយណាស់ (ប្រភព៖ The Daily Mail)
អ្នកជំនាញខាងវិស័យភាពយន្ត និងវីដេអូ អះអាងថាមនុស្សធម្មតាៗ មិនមានសមត្ថភាពផលិតខ្សែវីដេអូ បានល្អដល់កម្រិតនេះទេ ព្រោះនេះជាបច្ចេកវិទ្យាខ្ពស់ ដែលមានតែក្រុមហ៊ុនផលិតភាពយន្តហូលីវូត (Hollywood) របស់សហរដ្ឋអាមេរិកទេ ទើបធ្វើបានល្អដល់ថ្នាក់ហ្នឹង។ ចំពោះរូបវាលខ្សាច់ ត្រូវ ISIS កាត់តបន្ថែមជាផ្ទៃខាងក្រោយ (background)។
អ្នកស្រី Veryan Khan ជាអ្នកជំនាញខាងវិភាគ និងប្រមូលព័ត៌មានអំពីភេរវកម្ម។ អ្នកស្រីអះអាងថា៖ ទោះបី ISIS ពូកែសម្រាំងរូបភាព និងកែច្នៃតាមបច្ចេកវិទ្យាភាពយន្តទំនើបបែបនេះក្ដី ក៏គង់នៅមានចំណុចខុសឆ្គងខ្លះ ដែលអ្នកជំនាញអាចចាប់ថ្នាក់បាន។ ឧទាហរណ៍ វីដេអូបង្ហាញថាក្រុមជីហាត (Jihadis) ដែលបណ្ដើរចំណាប់ខ្មាំងនោះ កម្ពស់រហូតដល់ជាង ២ ម៉ែត្រ បើគិតមើលទៅ ខ្ពស់ជាងចំណាប់ខ្មាំងជាងកន្លះម៉ែត្រ។ សមិទ្ធិករភាពយន្តហូលីវូត (Hollywood director) អ្នកស្រី Mary Lambert ក៏យល់យ៉ាងដូច្នេះដែរ។ លោកស្រីយល់ថានៅក្នុងវីដេអូ អ្នកបណ្ដើរចំណាបខ្មាំងកម្ពស់ណាណី ចំណែកចំណាប់ខ្មាំងទាបកន្តឿៗ។ ចំណុចហ្នឹងហើយ ដែលជាភស្តុតាងថាវីដេអូនេះ ជាវីដេអូកែច្នៃ។
សរុបសេចក្ដីមក សកម្មភាពកាត់ក្បាលនោះ គឺពិតជាបានកាត់មែន ហើយកាត់ក្បាល និងថតក្នុងស្ទូឌីយោ។ បន្ទាប់មក វីដេអូដើម ត្រូវ ISIS យកទៅកែច្នៃ ដោយបន្ថែមរូបផ្ទៃសមុទ្រ និងឆ្នេរខ្សាច់ ដើម្បីធ្វើឲ្យវីដេអូមានលក្ខណៈរស់រវើក និងអច្ឆរិយ៕
ប្រែសម្រួល ៖ អន សំអាង
ប្រភព៖ The Daily Mail , Fox News , CNN
