ការដាក់លិខិតប្រកាសបង់ពន្ធលើប្រាក់ចំណេញនឹងធ្វើតាមប្រព័ន្ធអេឡិចត្រូនិក (Internet)
អគ្គនាយកដ្ឋានពន្ធដារ នៃក្រសួងសេដ្ឋកិច្ច និងហិរញ្ញវត្ថុ នឹងដាក់ឲ្យដំណើរការនៃការដាក់លិខិតប្រកាសបង់ពន្ធលើប្រាក់ចំណេញតាមប្រព័ន្ធអេឡិចត្រូនិក (E-Filing) នៅពេលឆាប់ៗខាងមុខនេះ ដើម្បីឲ្យប្រព័ន្ធនេះក្លាយជាផ្នែកមួយនៃការបង្កើនប្រសិទ្ធភាព និងភាពស័ក្ដិសិទ្ធិនៃការផ្ដល់សេវា បង្កលក្ខណៈងាយស្រួលជូនអ្នកជាប់ពន្ធ កាត់បន្ថយបានការចំណាយពេលវេលា និងនីតិវិធីនៃការប្រកាសបង់ពន្ធរបស់អភិបាលបណ្ណាធិការ និងតំណាងសហគ្រាស។
យោងតាមសេចក្តីប្រកាសព័ត៌មានរបស់អគ្គនាយកដ្ឋានពន្ធដារស្ដីពី «ពន្ធលើប្រាក់ចំណេញនិងរបៀបបំពេញលិខិតប្រកាសពន្ធលើប្រាក់ចំណេញប្រចាំឆ្នាំ» ចុះថ្ងៃទី៣០ ខែមករា កន្លងមក ឲ្យដឹងថា គម្រោងដាក់ឲ្យដំណើរការនូវប្រព័ន្ធដាក់លិខិតប្រកាសពន្ធតាមប្រព័ន្ធអេឡិចត្រូនិក (E-Filing)នេះធ្វើឡើងដើម្បីជៀសវាងការស្នើសុំលើកលែងពន្ធ ដោយលើកហេតុផលផ្សេងៗ និងចូលរួមប្រែក្លាយការគោរពប្រតិបត្តិច្បាប់មិនបានខ្ជាប់ខ្ជួនពីអភិបាលបណ្ណាធិការ និងតំណាងសហគ្រាស ឲ្យបែរមកគោរពប្រតិបត្តិច្បាប់ឲ្យបានខ្ជាប់ខ្ជួន និងត្រឹមត្រូវ ដោយមកដាក់លិខិតប្រកាស និងបង់ពន្ធឲ្យបានទាន់ពេលវេលា និងបានត្រឹមត្រូវ។
សូមបញ្ជាក់ថា រដូវកាលនៃការប្រកាសបង់ពន្ធលើប្រាក់ចំណេញសម្រាប់ឆ្នាំ២០១៥ បានចាប់ផ្ដើមចាប់ពីទី១ ខែមករា ឆ្នាំ២០១៥នេះ រហូតដល់ថ្ងៃទី៣១ ខែមីនាខាងមុខ ដោយតម្រូវឲ្យអ្នកដែលជាប់ពន្ធជានិវាសនជន ដែលមានប្រភពចំណូលកម្ពុជា និងប្រភពចំណូលបរទេស និងអនិវាសនជនដែលមានប្រភពចំណូលកម្ពុជា ត្រូវជាប់កាតព្វកិច្ចបង់ពន្ធប្រភេទនេះ ដោយយោងតាមបទប្បញ្ញត្តិស្ដីពីពន្ធលើប្រាក់ចំណេញ ដែលមានចែងក្នុងជំពូកទី១ នៃច្បាប់ស្ដីពីសារពើព័ន្ធ៕
ដោយ៖ ចរិយា
