ឡាន​ជា​យានជំនិះ​ដែល​កំពុង​ពេញ​និយម​បំផុត​នៅ​លើ​លោក​នេះ។ ទន្ទឹម​នឹង​នេះ​ដែរ ទោះ​ជា​វា​ល្អ​យ៉ាង​នេះ​ក្ដី ក៏​មាន​ប្រភេទ​ឡាន​ខ្លះ​ដែល​អ្នក​គ្រប់គ្នា​មិន​គួរ​ទិញ​ជិះ​ដែរ ព្រោះ​វា​អាច​បង្ក​ឱ្យ​មាន​ហានិភ័យ​ខ្ពស់។ ខាង​ក្រោម​នេះ​ Sabay ​នឹង​បង្ហាញ​ឡាន​៥​ប្រភេទ​ដែល​គេហទំព័រ carophile បាន​ចាត់​ទុក​ថា​ជា​ឡាន​មិន​គួរ​ឱ្យ​ទិញ​ជិះ​នោះ​ទេ ទោះ​ជា​វា​មាន​តម្លៃ​ថោក​យ៉ាង​ណា​ក៏​ដោយ៖

១. ឡាន​ម៉ាក Scion IQ

Scion IQ ​ជា​ប្រភេទ​ឡាន​ដែល​មាន​តម្លៃ​ថោក​បំផុត ហើយ​វា​មាន​ភាព​ងាយស្រួល​ខ្លាំង​ណាស់​ក្នុង​ការ​បើក​បរ​ក៏​ដូចជា​មិន​ពិបាក​រក​កន្លែង​ចត​នោះ​ទេ ប៉ុន្តែ​បើ​និយាយ​ពី​សុវត្ថិភាព​វិញ​គឺ​មិន​ល្អ​ទាល់តែ​សោះ។ ឡាន​ប្រភេទ​នេះ ទោះ​ជា​មាន​ពោង​ការពារ​ដូច​ឡាន​ដទៃ​ក៏​ដោយ ប៉ុន្តែ​វា​មិន​អាច​គ្រប់គ្រាន់​សម្រាប់​រក្សា​ជីវិត​របស់​អ្នក​​ទេ ប្រសិន​បើ​មាន​គ្រោះ​ថ្នាក់​អ្វី​នោះ។ ហេតុ​តែ​និយាយ​ដូច្នេះ​ព្រោះ​ថា​ប្រព័ន្ធ​ប្រេងហ្វ្រាំង លំនឹង​នៅ​ពេល​បើកបរ​និង​ទម្ងន់​របស់​ឡាន​គឺ​មិន​មាន​ស្តង់ដារ​នោះ​ទេ។ ប្រសិន​បើ​ហ៊ាន​តែ​បើក​លឿន​បន្តិច​ដឹង​តែ​យ៉ាប់​ហើយ។

២. ឡាន​ម៉ាក Smart fortwo

ឡាន​ប្រភេទ​នេះ​គឺ​កាន់​តែ​មិន​បាច់​និយាយ​ទៀត​ហើយ ព្រោះ Smart fortwo ​មិន​មែន​ជា​ប្រភេទ​ឡាន​ដែល​អាច​បើកបរ​ទៅ​ណា​បាន​ឆ្ងាយ​នោះ​ទេ ពោល​គឺ​អាច​បើក​ត្រឹម​ជិត​ៗ​អី​ប៉ុណ្ណោះ។ មួយ​វិញ​ទៀត ឡាន​ប្រភេទ​នេះ​មិន​អាច​បើកបរ​នៅ​លើ​ផ្លូវ highway ​បាន​នោះ​ទេ។

៣. ឡាន​ម៉ាក Vauxall (Opel) Adam

ឡាន​ម៉ាក​នេះ​មើល​ទៅ​ស្អាត​ណាស់ ប៉ុន្តែ​បើ​និយាយ​ពី​គុណភាព​វិញ​គឺ​ចប់​តែ​ម្ដង ព្រោះ​មិន​អាច​បើក​លឿន​បាន​នោះ​ទេ។ មួយ​វិញ​ទៀត ប្រសិន​បើ​អ្នក​ត្រូវ​បើកបរ​នៅ​ពេល​យប់​វិញ បើ​ជិះ​ឡាន​នេះ​គឺ​មិន​អាច​ទៅ​ណា​បាន​នោះ​ទេ ព្រោះ​ចង្កៀង​ឡាន​នេះ​មិន​អាច​ចាំង​ពន្លឺ​បាន​គ្រប់គ្រាន់​ឡើយ។  Vauxall (Opel) Adam ​ជា​ឡាន​ជិះ​បាន​តែ​២​នាក់​ប៉ុណ្ណោះ។
៤. ឡាន​ម៉ាក Chevrolet Spark

Chevrolet Spark ត្បិត​ជា​ឡាន​របស់​ក្រុមហ៊ុន​អាមេរិក​ក៏​ដោយ ប៉ុន្តែ​វា​មិន​សាកសម​សម្រាប់​ក្រុម​គ្រួសារ​ដែល​មាន​សមាជិក​ច្រើន​ឬ​ត្រូវ​ធ្វើ​ដំណើរ​ឆ្ងាយ​ៗ​នោះ​ទេ។ វា​មាន​ប្រព័ន្ធ​ការពារ​សុវត្ថិភាព​មែន ប៉ុន្តែ​ប្រព័ន្ធ​នេះ​គឺ​មិន​អាច​រក្សា​ផាសុកភាព​ឱ្យ​អ្នក​បាន​គ្រប់​គ្រាន់​នោះ​ឡើយ ប្រសិន​បើ​មាន​រឿង​អ្វី​កើត​ឡើង។ ជា​ពិសេស​ម៉ាស៊ីន​ឡាន​នេះ បើ​ហ៊ាន​តែ​បើកបរ​លឿន​គឺ​ក្ដៅ​ខ្លាំងណាស់ ពោល​គឺ​អាច​រលត់​បាន។

៥. ឡាន​ម៉ាក Dacia Duster

Duster ​ជា​ឡាន​ដែល​អ្នក​មើល​ឃើញ​ភ្លាម​ស្រលាញ់​ភ្លែត​តែ​ម្ដង។ តែ​បើ​យើង​ពិនិត្យ​វា​ឱ្យ​បាន​ម៉ត់ចត់​ទៅ​នោះ អ្នក​ប្រហែល​ជា​ឃើញ​ចំណុច​មិន​ល្អ​ច្រើន​ហើយ តួយ៉ាង​ដូចជា ឡាន​នេះ​គ្មាន​ប្រព័ន្ធ​ការពារ​អាកាស​ធាតុ​ពុល​នោះ​ទេ ខាង​ក្នុង​និង​ខាង​ក្រៅ​ឡាន​គឺ​ហ៊ុម​ព័ទ្ធ​​ដោយ​ប្លាស្ទិក​ច្រើន​ពេក​ដែល​បង្ក​ហានិភ័យ​ច្រើន​ពេល​មាន​គ្រោះ​ថ្នាក់។ មួយ​វិញ​ទៀត​នោះ ឡាន​ប្រភេទ​នេះ​ពិបាក​បើកបរ​ខ្លាំង​ណាស់។

ចុចអាន៖ម៉ូតូ​ម៉ូដែល​ថ្មី​ៗ​​ឆ្នាំ​២០១៥​ ​ឃើញ​ហើយ​​​ចង់​បានអត់?

ប្រែសម្រួល៖ មុន្នី រម្យ
ប្រភព៖ carophile