Huawei បញ្ជាក់ថា មិនប្រើអេក្រង់ 4K Display បំពាក់លើស្មាតហ្វូនទេព្រោះស៊ីថ្ម
ថ្មីៗនេះក្រុមហ៊ុន Huawei បានអះអាងនូវការយល់ឃើញចំពោះការអភិវឌ្ឍស្មាតហ្វូនបំពាក់អេក្រង់ high-definition (HD) ថា រាល់ស្មាតហ្វូនរបស់ខ្លួន នឹងមិនប្រើបច្ចេកវិទ្យាអេក្រង់រហូតដល់ 4K នោះឡើយព្រោះវាមានតម្រូវការថាមពលច្រើនដើម្បីផ្គត់ផ្គង់ឱ្យដំណើរការបាន។
លោក Kevin Ho ប្រធានផ្នែកផលិតផល Handset Product Line នៅក្នុងក្រុមហ៊ុន Huawei បាននិយាយលាតត្រដាងនូវគោលជំហររបស់ខ្លួនថា ក្រុមហ៊ុនមិនមានគម្រោងប្រើប្រាស់បច្ចេកវិទ្យាអេក្រង់ 4K display នៅលើស្មាតហ្វូននោះឡើយ ហេតុផលចម្បងនោះគឺដោយសារអេក្រង់ប្រភេទនេះអាចធ្វើឱ្យឆាប់មានបញ្ហាថ្មទូរស័ព្ទបាន។ អេក្រង់ high-definition display នឹងបង្កផលប៉ះពាល់អវិជ្ជមានទៅលើថ្ម ដែលអាចប៉ះពាល់ដល់ពាណិជ្ជកម្មស្មាតហ្វូនរបស់ក្រុមហ៊ុន ដូច្នេះក្រុមហ៊ុនពុំមានបំណងប្រើប្រាស់ 4K display នេះទេ។
លោក Kevin Ho បានថ្លែងឡើងដូច្នេះថា៖ «អេក្រង់ 4K ពិតជាមានគុណភាពណាស់ហើយ ប៉ុន្តែចំពោះអេក្រង់ស្មាតហ្វូនតូចៗប្រហែល ៥អ៊ីញ ទៅ៦អ៊ីញ នោះប្រហែលជាភ្នែករបស់យើងរាល់គ្នាមិនអាចកំណត់ភាពខុសប្លែកគ្នារវាង 4K និង 2K បានឡើយ ម្យ៉ាងប្រើ 4K គឺត្រូវប្រើប្រាស់ថាមពលថ្មច្រើន»។ «ថ្មរបស់ស្មាតហ្វូនអេក្រង់ 4K អាចប្រើបានតែប្រហែល កន្លះថ្ងៃ ខណៈ ដែលអេក្រង់ 2K វិញប្រើបានរយៈពេល ១ថ្ងៃឬយូរជាងនេះ»។ «4K មានភិចហ្សែលខ្ពស់ជាង Full HD ៤ដង ដូច្នេះតម្រូវការថាមពលក៏ច្រើនជាងប្រហែលចន្លោះពី ៤ ទៅ ៨ដងឯណោះ»៕
ប្រែសម្រួល៖ លី ឈៀន
ប្រភព៖ FoneArena
