ដំណឹងប្រាំពីរ អប់រំ ដឹងហើយប្រវត្តិទិវានៃក្ដីស្រលាញ់ ចុះប្រវត្តិអាទិទេពនៃក្ដីស្រលាញ់ Cupid វិញមានប្រវត្តិបែបណា?

ដឹងហើយប្រវត្តិទិវានៃក្ដីស្រលាញ់ ចុះប្រវត្តិអាទិទេពនៃក្ដីស្រលាញ់ Cupid វិញមានប្រវត្តិបែបណា?

2/15/2015 Aohyi Gamer 0 Comments A⁺ a^-

អាទិទេពនៃក្ដីស្រលាញ់ដែលមានឈ្មោះហៅថា Cupid

Domneng7 ជឿថាប្រិយមិត្តភាគច្រើនប្រហែលជាបានដឹងប្រវត្តិទិវានៃក្ដីស្រលាញ់ ប៉ុន្តែប្រិយមិត្តមានធ្លាប់ចាប់អារម្មណ៍ពីប្រវត្តិនៃអាទិទេពនៃក្ដីស្រលាញ់ដែលមានឈ្មោះហៅថា Cupid ដែរឬទេ? ថ្ងៃនេះ Domneng7 នឹងលើកយកប្រវត្តិអាទិទេពរ៉ូម៉ាំងរូបនេះ មកបង្ហាញជូនប្រិយមិត្តអ្នកអាន។

Cupid គឺជានិមិត្តសញ្ញាដ៏ល្បីល្បាញបំផុតសម្រាប់ទិវានៃក្ដីស្រលាញ់ មនុស្សជាច្រើនសុទ្ធតែស្គាល់ថាក្មេងប្រុសដុះស្លាបមានព្រួញក្នុងដៃនិងគ្រាប់ព្រួញស្ពាយជាប់ខ្នងគឺជាអាទិទេពស្នេហា។ គ្រាប់ព្រួញរបស់ Cupid តំណាងឱ្យអារម្មណ៍ស្នេហា ហើយព្រួញរបស់អាទិទេព Cupid បាញ់ទម្លុះបេះដូងទាំងមនុស្សនិងទេព្តា បាញ់ចំអ្នកណាបណ្ដាលឱ្យអ្នកទាំងនោះធ្លាក់ជ្រៅទៅក្នុងស្នេហា។

អាទិទេព Cupid មានតួនាទីបង្កើតស្នេហានិងគូស្នេហ៍ ហើយបើតាមប្រវត្តិសាស្ត្រក្រិចបុរាណ Cupid ត្រូវបានគេហៅថា Eros កូនប្រុសរបស់ Aphrodite អាទិទេពនៃស្នេហានិងសម្រស់ ប៉ុន្តែសម្រាប់រ៉ូម៉ាំងឈ្មោះអាទិទេពស្នេហានេះហៅថា Cupid ចំណែកមាតាហៅថា Venus ។

អាទិទេពដែលបង្កើតស្នេហាឱ្យមនុស្សលោកនេះក៏មានរឿងរ៉ាវស្នេហាផ្ទាល់ខ្លួនគួរជាទីចាប់អារម្មណ៍មិនចាញ់មុខងាររបស់ខ្លួនផងដែរ។ តាមតំណាលតៗគ្នាបាននិយាយថា Venus មាតា Cupid ដែលជាអាទិទេពសម្រស់ច្រណែននឹងសម្រស់ដ៏ត្រកាលរបស់ Psyche ដែលបុរសៗណាបានឃើញហើយសុទ្ធតែលង់នឹងសម្រស់នាង ដូច្នេះទ្រង់បានបញ្ជាឱ្យ Cupid ទៅដាក់ទោសស្ត្រីជាមនុស្សធម្មតារូបនេះ ដោយឱ្យ Cupid ទៅបាញ់ព្រូញស្នេហ៍ឱ្យនាងបានបុរសដែលអាក្រក់បំផុតក្នុងលោកជាគូអនាគត ប៉ុន្តែនៅពេល Cupid ហោះទៅដល់ប្រាសាទឃើញរូបពិត Psyche ធ្វើឱ្យ Cupid ភាន់ភាំងរបូតព្រួញស្នេហ៍ចាក់ចូលបេះដូងខ្លួនឯងហើយពេលនោះ Cupid បានយក Psyche ជាភរិយាប៉ុន្តែដោយសារតែនាងជាមនុស្សធម្មតា Cupid បានហាមមិនអោយនាងមើលមុខរបស់គេនោះទេ។

ជីវិតស្នេហា Cupid និង Psyche រីករាយណាស់រហូតដល់ថ្ងៃមួយ បងប្អូនស្រី Psyche ច្រណែននឹងនាងបានបញ្ចេះឱ្យនាងលួចមើលមុខ Cupid គ្រាន់តែនាងឃើញរូបស្វាមីដែលស្រស់សង្ហាមិនបានអាក្រក់ដូចជាបិសាចនោះភ្លាម Cupid បានហោះទៅចោលនាងភ្លាមដើម្បីជាការដាក់ទោស ចំណែកប្រាសាទនិងឧទ្យានរបស់ពួកគេរលាយសាបសូន្យដូចគ្នា បន្ទាប់មក Psyche បានធ្វើដំណើរទៅកាន់វិមានអាទិទេពសម្រស់ Venus ហើយនៅទីនោះ Psyche បានទទួលកាតព្វកិច្ចការងារដើម្បីដកពិសោធន៍ស្នេហ៍ពិតចំពោះ Cupid ពីមួយទៅមួយកាន់តែពិបាកនិងគ្រោះថ្នាក់ឡើង។

កាតព្វកិច្ចចុងក្រោយដែល Venus ឱ្យ Psyche ធ្វើគឺឱ្យនាងយកកូនប្រអប់ទៅកាន់ឋានក្រោមដើម្បីទៅសុំភាពស្រស់ស្អាតខ្លះពី Proserpine ភរិយារបស់ Pluto ហើយយកមកដាក់ក្នុងប្រអប់មកឱ្យ Venus នៅតាមផ្លូវ Psyche បានបើកប្រអប់នោះហើយត្រូវមន្ដសណ្ដំក៏ស្លាប់ ហើយនៅពេលនោះដែរ Cupid បានមកជួបនឹងរូបរាងគ្មានវិញ្ញាណរបស់ Psyche ហើយបានស្រូបយកវេទមន្តទៅដាក់ក្នុងប្រអប់វិញធ្វើឱ្យ Psyche រស់រានឡើងវិញ។

ស្នេហាស្មោះស្ម័គ្ររបស់ Psyche ចំពោះ Cupid ធ្វើឱ្យអាទិទេពនានារួមទាំង Venus រំភើបចិត្តហើយអាទិទេពទាំងអស់បានជួយគ្នាធ្វើឱ្យ Psyche ក្លាយជាអាទិទេពដូចជា Cupid ចាប់ពីពេលនោះមកអ្នកទាំងពីរបានរស់នៅជាមួយគ្នាយ៉ាងសុខសាន្ត។

បច្ចុប្បន្នអាទិទេព Cupid និង គ្រាប់ព្រួញរបស់គាត់បានក្លាយជានិមិត្តសញ្ញាស្នេហាដ៏ពេញនិយមបំផុតក្នុងលោក ហើយមនុស្សជាច្រើនយល់ថាព្រួញទម្លុះបេះដូងនេះបានចាក់ចូលក្នុងបេះដូងកំលោះក្រមុំជាច្រើនឱ្យក្លាយជាគូនឹងគ្នា៕

ប្រែសម្រួល៖ សុខានីកា

Aohyi Gamer