ពីថ្ងៃនេះតទៅ គ្មានឡើយ «រោងចក្រផលិតមនុស្ស» នៅប្រទេសថៃ (មានវីដេអូ)
នៅទីបំផុត រដ្ឋសភាថៃបានអនុម័តច្បាប់ស្ដីពីការហាមឃាត់ «អំពើស៊ីឈ្នួលពពោះបង្កើតកូនជំនួសគេ – surrogacy»។ ច្បាប់ថ្មីនេះ មានគោលដៅដាក់ទោសទណ្ឌចំពោះអ្នកទាំងឡាយណា ដែលជាប់ពាក់ព័ន្ធក្នុងអំពើនេះ មិនថាទីភ្នាក់ងារដើរទាក់ទងអ្នកស៊ីឈ្នួលពពោះ (promoting agent) – មិនថាអ្នកស៊ីឈ្នួលពពោះ – មិនថាអ្នកជួលគេទេ គឺសុទ្ធតែមានទោសទាំងអស់ ទៅតាមបទបញ្ញត្តិនៃច្បាប់។
អ្នកដែលមានសិទ្ធិ «ឲ្យអ្នកដទៃពពោះបង្កើតកូនជំនួសខ្លួន» ស្របទៅតាមច្បាប់ថ្មីនេះបាន គឺអ្នកដែល៖ ជាសហព័ទ្ធរៀបការជាប្ដីប្រពន្ធយ៉ាងហោចណាស់ ៣ ឆ្នាំឬលើសនេះ។ ប្ដីប្រពន្ធនោះទៀតសោត ត្រូវមានសញ្ជាតិថៃទាំងពីរនាក់ប្ដីប្រពន្ធ ឬយ៉ាងហោចណាស់ត្រូវប្ដីឬប្រពន្ធមានសញ្ជាតិថៃ។ ហ្នឹងទើបអាច«រកអ្នកស៊ីឈ្នួលពពោះបង្កើតកូនជំនួស» ដោយមិនខុសច្បាប់។ ប្រការសំខាន់មួយទៀត ត្រូវបានបានចាត់ទុកជាអំពើខុសច្បាប់ ចំពោះ «ការស៊ីឈ្នួលពពោះជាលក្ខណៈអាជីព ឬជាមុខជំនួញខ្នាតធំ មានអង្គការចាត់តាំង ឬរចនាសម្ព័ន្ធធំដុំ – commercial surrogacy»។
សូមរំឭកថយក្រោយបន្តិច ពាក់ព័ន្ធនឹងដំណើរដើមទង ដែលនាំទៅដល់ការបង្កើតច្បាប់នេះឡើង។ នៅប្រទេសថៃ កាលពីឆ្នាំ២០១៤ មានរឿងអាស្រូវស្ដីពី «រោងចក្រផលិតទារក – baby factory» ដ៏ល្បី កក្រើកមួយពិភពលោក។ កាលណោះ ប្ដីប្រពន្ធជនជាតិអូស្ត្រាលីបានជួលនារីជនជាតិថៃ ឲ្យស៊ីឈ្នួលពពោះបង្កើតកូនឲ្យខ្លួន។ ក្រោយមក នារីស៊ីឈ្នួលពពោះនោះ ប្រសូត្របានទារកភ្លោះ ស្រីមួយ ប្រុសមួយ។ ប្ដីប្រពន្ធអូស្ត្រាលីនោះ យកតែកូនស្រីថ្លោសឡើងទ្រលក់ៗ (healthy baby) ចំណែកកូនប្រុស ត្រូវបានទុកនៅនឹងនារីស៊ីឈ្នួលពពោះ ឲ្យគ្នារ៉ាប់រងបីបាច់កូននោះតែម្នាក់ឯង ចំណែកខ្លួនឯងជាឪពុកម្ដាយបង្កើត ដោះដៃយករួចខ្លួន ហើយវិលទៅស្រុករបស់ខ្លួនវិញ។ នារីស៊ីឈ្នួលនោះអាយុ ២១ ឆ្នាំឈ្មោះ Pattaramon Chanbua។
ក្រោយមកទៀត មានករណីបុរសជនជាតិជប៉ុនម្នាក់ ជួលនារីថៃជាច្រើននាក់ឲ្យពពោះបង្កើតកូនឲ្យខ្លួន ហើយប្រសូត្របានទារកមិនចេះតិច រហូតដល់រាប់សិបនាក់។ លើកចុងក្រោយនេះ ជាករណីធ្ងន់ធ្ងរខ្លាំង ដល់ថ្នាក់គេឲ្យឈ្មោះថា «រោងចក្រផលិតទារក – baby factory»៕
នាង Pattaramon Chanbua ដែលស៊ីឈ្នួលពពោះ និងទារកដែលឪពុកម្ដាយបង្កើតទុកចោល (ប្រភព៖ BBC)
កំណត់សម្គាល់៖ ការស៊ីឈ្នួលពពោះដូចបានជម្រាបជូនពីខាងដើម គឺជាបច្ចេកទេសបង្កកំណើតមិនតាមក្រិត្យក្រមធម្មជាតិ ១០០% ទេ។ ដំបូង វេជ្ជបណ្ឌិតជំនាញ យកមេជីវិតម្ដាយ (ហៅតាមភាសាបារាំងថា «អូវុល – ovum») និងមេជីវិតឪពុក (sperm) ទៅដាក់ក្នុងកែវមួយ ដើម្បីឲ្យវាបង្កកំណើត។ លុះពេលមេជីវិតញី និងមេជីវិតឈ្មោលរលាយចូលគ្នាហើយ វេជ្ជបណ្ឌិតបូមយកសារធាតុនេះ ទៅចាក់បញ្ចូលក្នុងស្បូនរបស់ស្ត្រីដែលស៊ីឈ្នួលពពោះជំនួសគេ។ ដូចនេះ កូននោះមិនមែនជាកូនអ្នកស៊ីឈ្នួលទេ គឺកូនអ្នកផ្សេង គ្រាន់តែគេជួលឲ្យពពោះជំនួស។ មូលហេតុសំខាន់ដែលនាំឲ្យកើតអំពើជួលនិងស៊ីឈ្នួលបែបនេះ ព្រោះនារីនៅបស្ចិមប្រទេសខ្លះខ្ជិលពពោះកូន។
ប្រែសម្រួល ៖ អន សំអាង
ប្រភព៖ BBC
