អាមេរិកបង្ហាញវីដេអូធ្វើតេស្តមីស៊ីលរបស់ខ្លួនកាន់តែទំនើបជាងមុន ទុកប្រើប្រាស់ប្រឆាំងនឹងនាវាចម្បាំងសត្រូវ
សហរដ្ឋអាមេរិកបានធ្វើតេស្តដោយជោគជ័យលើមីស៊ីល (TLAM) ជំនាន់ថ្មី បន្ទាប់ពីបានអភិវឌ្ឍជាបន្តបន្ទាប់ដែលខ្លួនបានអះអាងថា មានសមត្ថភាពខ្ពស់វាយប្រហារលើគ្រប់សមរភូមិជើងទឹក។ នេះបើយោងតាមការឲ្យដឹងពីវិទ្យាស្ថានកងទ័ពជើងទឹកអាមេរិក (USNI) ដែលបានបង្ហាញខ្សែវីដេអូនៃការធ្វើតេស្តបាញ់មីស៊ីលខាងលើនេះ។
ដោយបានសាកល្បងធ្វើតេស្តនៅថ្ងៃទី ២៧ ខែ មករាកន្លងទៅនេះនៅកោះ San Niolas រដ្ឋ California ការធ្វើតេស្តមីស៊ីលខាងលើ បានបាញ់ចេញពីយន្តហោះចម្បាំង Boeing F/A-18E/F Super Hornet ដោយជោគជ័យលើនាវាដឹកទំនិញដែលត្រូវបានដាក់ធ្វើជាគោលដៅ។
តាមពិតទៅមីស៊ីលTLAMs ត្រូវបានផលិតឡើងតាំងពីទសវត្សទី៧០ មកម្ល៉េះនៅក្នុងជូរកងទ័ពជើងទឹករបស់ខ្លួន ប៉ុន្តែការអភិវឌ្ឍចុងក្រោយលើមីស៊ីលនេះនឹងកាន់តែមានប្រសិទ្ធភាពជាងមុនដើម្បីវាយប្រហារប្រឆាំងទៅនឹងនាវាចម្បាំងរបស់សត្រូវ ដោយហេតុថា វាអាចបាញ់ទម្លុះជ្រៀតចូលដល់ផ្នែកខាងក្នុងនៃនាវាចម្បាំងរបស់ទាំងនោះដូចជា នាវាដឹកជញ្ជូនរថក្រោះជាដើម។ វាមានសមត្ថភាពអាចបាញ់បានរហូតដល់ចម្ងាយអតិបរិមា ១ ៨៥២ គីឡូម៉ែត្រ។
យ៉ាងណាមិញ នេះមិនទាន់គ្រប់គ្រាន់នោះឡើយសម្រាប់មហិច្ឆតារបស់កងទ័ពជើងទឹកអាមេរិក ត្បិតអីខ្លួននឹងអភិវឌ្ឍបន្ថែមឲ្យមីស៊ីលប្រភេទនេះបាញ់បានកាន់តែឆ្ងាយជាងមុន និង មានសមត្ថភាពខ្ពស់ជាងនេះដើម្បីពង្រឹងវិស័យកងទ័ពរបស់ខ្លួន៕
ប្រែសម្រួល៖ ខេវិន
ប្រភព៖ Businessinsider
