​ខាងក្រោម​នេះ​ជា​អត្ថបទ​នៅ​លើ​ទំព័រ​សារព័ត៌មាន​របស់​ប្រទេស​រុស្ស៊ី​ដូចជា៖ The Moscow Times , Rossiyskaya Gazeta និង​ទីភ្នាក់ងារ​ព័ត៌មាន​រុស្ស៊ី TASSស្ដីពី​សមិទ្ធផល​ដ៏​ថ្មី​សន្លាង ដែល​អ្នក​វិទ្យាសាស្ត្រ​រុស្ស៊ី​សម្រេច​បាន​កាលពី​ពេល​ថ្មីៗ​បំផុត​នេះ មាន​សេចក្ដី​ដូច​ខាង​ក្រោម។

អ្នក​វិទ្យាសាស្ត្រ​រុស្ស៊ី​បាន​ស្រាវជ្រាវ​ឃើញ​វិធី​​បង្កាត់​​សត្វ​គោ​សិប្បនិម្មិត​ដ៏​អស្ចារ្យ​មួយ​ប្រភេទ ដែល​អាច​រស់​បាន និង​រីក​ធំធាត់​ជានិច្ច​និរន្ត ដោយ​មិន​ចាំបាច់​ស៊ី​ចំណី​អាហារ​ក្នុង​រយៈ​ពេល​យូរ​អង្វែង។ ដូចនេះ ក្នុង​រដូវ​ធ្លាក់​ទឹកកក ដែល​ខ្សត់​ស្មៅ ឬ​គ្មាន​ស្មៅ ក៏​គោ​នេះ​អាច​ចិញ្ចឹមជីវិត និង​រីក​ធំធាត់ ដោយ​មិន​ចាំ​បាច់​ស៊ី​ចំណី​អាហារ​អ្វី​ទាំង​អស់។

គោ​ប្រភេទ​នេះ​ត្រូវ​គេ​ឲ្យ​ឈ្មោះ​ថា Aita។ លទ្ធផល​បង្កាត់​ពូជ​គោ Aita ជា​សមិទ្ធផល​នៃ​ការ​ស្រាវជ្រាវ​រយៈ​ពេល ១៥ ឆ្នាំ​កន្លង​មក​ហើយ។ នេះ​បើ​យោង​តាម​សារព័ត៌មាន Rossiyskaya Gazeta ជាសារព័ត៌មាន​​​រដ្ឋ​របស់​ប្រទេស​រុស្ស៊ី។

អ្នក​បង្កាត់​ពូជ​គោ Aita ប្រាប់​សារព័ត៌មាន Rossiyskaya Gazeta ថា​គោ​ប្រភេទ​នេះ ស្រួល​ចិញ្ចឹម​ណាស់ ព្រោះ​របៀប​ចិញ្ចឹម​ជីវិត​របស់​វា ខុស​ពី​គោ​ទូទៅ។ ចំណី​អាហារ​អ្វី​ក៏​វា​ស៊ី​បាន រហូត​ដល់​ថ្នាក់​សូម្បី​តែ​កម្ទេចកម្ទី​ដែល​កប់​នៅ​ពី​ក្រោម​ទឹកកក ឬ​ព្រឹល ក៏​គោ​នេះ​ស៊ី​ជា​ចំណី​ជំនួស​ស្មៅ​បាន។ មូលហេតុ​ដែល​គោ​នេះ​អាច​រស់​ក្នុង​ស្ថានភាព​លំបាក​ខ្លាំង និង​អាច​អត់​អាហារ​រយៈ​ពេល​យូរ​អង្វែង ដោយ​សារ​វា​មាន​ក្រពេញ​ខ្លាញ់​ពិសេស​ម្យ៉ាង ដែល​វា​អាច​ស្រូប​យក​មក​បំប៉ន​ខ្លួន​វា។

ដូចនេះ វិធី​ចិញ្ចឹម​ជីវិត​របស់​វា ដូចគ្នា​នឹង​សត្វ​អូដ្ឋ​នៅ​អាហ្វ្រិក។ រដ្ឋ​មន្ត្រី​ក្រសួង​កសិកម្ម​រុស្ស៊ី លោក Nikolai Fyodorov ​ឲ្យ​ដឹង​ថា ​ចាប់​ពី​ពេល​នេះ​ទៅ​ទល់​ឆ្នាំ២០២០ រដ្ឋាភិបាល​គ្រោង​ផ្ដល់​កញ្ចប់​ថវិកា ១៨០ លាន​ដុល្លារ សម្រាប់​ឧបត្ថម្ភ​ផែនការណ៍​បង្កាត់​ពូជ​គោ Aita ក៏​ដូច​ជា​កម្មវិធី​បង្កាត់​ពូជ​សត្វ​ដទៃ​ទៀត តាម​វិទ្យាសាស្ត្រ​ទំនើប៕

ប្រែ​សម្រួល ៖ អន សំអាង

ប្រភព៖​ The Moscow Times , Rossiiskaya Gazeta