កម្ពុជាចំណាយលុយជាង ១,៤៦ពាន់លានដុល្លារអាមេរិកទិញប្រេងឥន្ធនៈ
តាមរបាយការណ៍របស់ក្រសួងពាណិជ្ជកម្មកម្ពុជា បង្ហាញថា នៅឆ្នាំ២០១៤ កន្លងមកនេះ កម្ពុជាបានចំណាយលុយប្រមាណជាង ១,៤៦ពាន់លានដុល្លារអាមេរិកដើម្បីទិញប្រេងឥន្ធនៈដើម្បីផ្គត់ផ្គង់នៅក្នុងស្រុកដែលចំនួននេះមានការធ្លាក់ចុះ ០,៦% បើធៀបទៅនឹងឆ្នាំ២០១៣ មាន ១,៤៧ពាន់លានដុល្លារអាមេរិក ។
តាមរបាយការណ៍របស់ក្រសួងពាណិជ្ជកម្ម ចេញផ្សាយនៅថ្ងៃនេះឲ្យដឹងថាបរិមាណនៃការនាំចូលប្រេងនៅក្នុងឆ្នាំ២០១៤នេះមានចំនួន ១,៥៥ លានតោនដែលចំនួននេះមានការកើនឡើងប្រមាណ ១,៣ % បើធៀបទៅនឹងឆ្នាំ២០១៣ ។
ស្របពេលដែលតម្លៃប្រេងនៅលើពិភពលោកកំពុងតែធ្លាក់ចុះ តម្លៃប្រេងនៅកម្ពុជាក៏បាននិងកំពុងតែធ្លាក់ចុះផងដែរ។ ទាក់ទងទៅនឹងការធ្លាក់ចុះនៃតម្លៃប្រេងនេះ ប្រមុខរាជរដ្ឋាភិបាលកម្ពុជាសម្តេចនាយករដ្ឋមន្ត្រី ហ៊ុន សែន ធ្លាប់បានអំពាវនាវទៅដល់បណ្ដាក្រុមហ៊ុនស្ថានីយប្រេងឥន្ធនៈនៅក្នុង ស្រុកឱ្យធ្វើការពិនិត្យឡើងវិញក្នុងការបញ្ចុះតម្លៃប្រេងបន្ថែមទៀត ខណៈដែលតម្លៃប្រេងនៅទីផ្សារពិភពលោកធ្លាក់ថ្លៃជាបន្តបន្ទាប់។
ជាការឆ្លើយតប រដ្ឋមន្ត្រីក្រសួងពាណិជ្ជកម្មលោក ស៊ុន ចាន់ថុល ក៏បានស្នើឱ្យអ្នកចែកចាយ ប្រេងឥន្ធនៈទាំងឡាយដែលជាម្ចាស់ស្ថានីយប្រេងឥន្ធនៈ និងអ្នកលក់រាយនៅក្នុងស្រុក ពិនិត្យលទ្ធភាពបញ្ចុះតម្លៃប្រេងរបស់ខ្លួនឱ្យស្របទៅនឹងថ្លៃប្រេង ពិភពលោក ហើយរៀបចំកិច្ចប្រជុំពិភាក្សារៀងរាល់ ១០ថ្ងៃម្ដងដើម្បីពិភាក្សាទៅស្ថានភាពតម្លៃប្រេងក្នុងការផ្សព្វ ផ្សាយជូនសាធារណៈជន ៕
អត្ថបទ៖ចាន់ សុខ នាង
