សូមប្រុងប្រយ័ត្ន! មានតេនញ៉ាមួយប្រភេទអាចជ្រៀតចូលដល់ក្នុងខួរក្បាល!
ចំណីអាហារដែលផ្ទុកពពួកបរាសិតប្រភេទខ្លះដូចជា ៖ ដង្កូវ – ព្រូន – តេនញ៉ា។ល។ ដែលមនុស្សយើងបរិភោគដោយមិនបានដឹងមុន។ កាលពីឆ្នាំ២០០៩ បុរសម្នាក់មានដើមកំណើតជាជនជាតិចិន បានទៅពិនិត្យសុខភាពនៅមន្ទីរពេទ្យ ដោយសារអាការៈឈឺក្បាលជាប្រចាំ។ មុនដំបូង វេជ្ជបណ្ឌិតស្មានថាលោកកើត «ជំងឺរបេង – tuberculosis»។
អ្វីដែលគ្រូពេទ្យភ្ញាក់ផ្អើល គឺនៅពេលដែលគេបានយកអ្នកជំងឺរូបនោះទៅស្កេនក្បាល ឃើញតេនញ៉ាមួយក្បាលធំ និងរស់រវើកនៅក្នុងខួរក្បាល។ បណ្ឌិត Effrossyni Gkrania-Klotsas ឲ្យដឹងថាតេនញ៉ានោះបានរំកិលខ្លួនពីជ្រុងម្ខាងនៃខួរក្បាលទៅជ្រុងម្ខាងទៀត ដោយមិនមានប៉ះពាល់អ្វីនៅក្នុងខួរក្បាលគួរឲ្យកត់សម្គាល់សោះ។ ដុកទ័របានឲ្យឈ្មោះជំងឺនេះថា Spirometra erinaceieuropaei ហើយមិនអាចរកថ្នាំអ្វីសម្រាប់ជំរុះតេនញ៉ានោះចេញពីខួរក្បាលបានទេ គឺមានតែវិធីវះកាត់ខួរក្បាលតែមួយមុខគត់។ តេនញ៉ានោះបានបណ្ដាលឲ្យអ្នកជំងឺកើតអាការៈក្រញង់ដៃក្រញង់ជើង និងទន់សរសៃជើង។
តាមពិត តេនញ៉ាឬដង្កូវសំប៉ែតឈ្មោះ Spirometra នេះត្រូវគេឃើញមានតែនៅក្នុងពោះវៀនសត្វឆ្កែ និងពោះវៀនសត្វឆ្មាប៉ុណ្ណោះ។ បរាសិតប្រភេទនេះអាចឆ្លងចូលក្នុងខ្លួនមនុស្ស ពេលមនុស្សហែលទឹកស្រះ ទឹកត្រពាំង ដែលមានពងរបស់វា ហើយវាអាចជ្រៀតចូលក្នុងមាត់របស់មនុស្ស។ តាមការស្រង់ស្ថិតិអ្នកជំងឺដែលមានតេនញ៉ា Sparganosis ឆ្លងចូលក្នុងខ្លួន ចាប់តាំងពីឆ្នាំ១៩៥៣ រៀងមកគឺមានចំនួន ៣០០ នាក់៕
ប្រែសម្រួល ៖ អន សំអាង
ប្រភព៖ CNN
