ក្រុមហ៊ុនមួយនៅប្រទេសស៊ុយអែតបញ្ចូលបន្ទះឈីបក្នុងស្បែកដៃបុគ្គលិកសម្រាប់បើកសោ
ថ្មីៗនេះការិយាល័យការងារមួយកន្លែងនៅមណ្ឌល Epicenter ក្នុងប្រទេសស៊ុយអែតបានបង្កើតភាពភ្ញាក់ផ្អើលជាមួយបច្ចេកវិទ្យាថ្មីដោយតម្រូវឱ្យបុគ្គលិកចាក់បញ្ចូលបន្ទះឈីបតូច (microchip) នៅក្នុងស្បែកប្រអប់ដៃរបស់បុគ្គលិក។
បន្ទះឈីបនេះគឺបំពាក់ជាមួយបច្ចេកវិទ្យាកំណត់អត្តសញ្ញាណរលកវិទ្យុដែលហៅកាត់ថា RFID (radio frequency identification) អាចឱ្យអ្នកប្រើ បើកសោទ្វា ផ្លាស់ប្ដូរ (swap) នូវព័ត៌មានអំពីទំនាក់ទំនង (contact details) ឬប្រើម៉ាស៊ីនហ្វូតូ (photocopier) ដោយគ្រាន់តែដាក់ដៃស្កេនប៉ុណ្ណោះ មិនចាំបាច់ប្រើលេខ Passscode ឡើយ។
ការប្រើបន្ទះឈីបបច្ចេកវិទ្យា RFID នេះ គឺស្មើនឹងលោកអ្នកបានកំណត់លេខកូដអត្តសញ្ញាណ (Identification Card) សម្រាប់ខ្លួនឯងមួយជាក់លាក់ ដើម្បីភ្ជាប់ (access) លើឧបករណ៍អេឡិចត្រូនិកផ្សេងៗ។ ក្រៅពីប្រើជាមួយទ្វាការិយាល័យ ជាមួយម៉ាស៊ីនហ្វូតូ បុគ្គលិកការិយាល័យ ថែមទាំងអាចប្រើសម្រាប់បើក ឬចាក់សោលើស្មាតហ្វូន និងកុំព្យូទ័រផងដែរ។
ដំណើរការចាក់បញ្ចូលបន្ទះឈីបនេះគឺរៀបចំឡើងដោយលោក Hannes Sjoblad ដែលលោកបានប្រាប់សារព័ត៌មាន BBC ថា៖ «ឥឡូវនេះពួកយើងបានធ្វើអន្តរកម្មជាមួយបច្ចេកវិទ្យាគ្រប់ពេលវេលា»។ «ការប្រើប្រាស់ PIN code និង password សព្វថ្ងៃអាចជាការស្មុគស្មាញបន្តិច។ តែបើប្រើតែដៃជំនួសវិញ តើមិនងាយទេឬ?»
បុគ្គលិកម្នាក់ Rory Cellan-Jones ស្ម័គ្រចិត្តទទួលយកការចាក់បញ្ចូលឈីបនៅក្នុងដៃ ដែលអាចប្រើប្រាស់បានច្រើនមុខលើសពីការបើកសោការិយាល័យទៅទៀត ដូចជាការប្រើប្រាស់ជាមួយស្មាតហ្វូន កុំព្យូទ័រ ក៏ដូចជាប្រើសម្រាប់ចាក់សោកុង។
នៅពេលឆាប់ៗខាងមុខ មនុស្សប្រមាណ ៧០០នាក់ទៀតត្រូវគេរំពឹងថា នឹងមានឱកាសអាចប្រើបច្ចេកវិទ្យាបន្ទះឈីបទំនើបនេះ។ វានឹងអាចដំណើរការលើមុខងារ ឬសេវាកម្មផ្សេងៗក្រៅពីអាចបើកទ្វារ និងប្រើម៉ាស៊ីនហ្វូតូ គឺថែមទាំងអាចប្រើសម្រាប់បង់ប្រាក់ញុំាកាហ្វេដោយប្រើដៃបានទៀតផង៕
ប្រែសម្រួល៖ លី ឈៀន
ប្រភព៖ bbc, reuters, cnet
