ក្រុមហ៊ុន Amgen Inc ដែល​ជា​សហគ្រាស​ផលិត​ឱសថ បាន​ឲ្យ​ដឹង​ថា​ក្រុមហ៊ុន​បាន​ផលិត​រួចរាល់​ជា​ស្ថាពរ​នូវ​ឱសថ​ព្យាបាល​ជំងឺ​មហារីក​ឈាម ដែល​គ្រោង​ដាក់​លក់​នៅ​លើ​ទីផ្សារ​ក្នុង​តម្លៃ ១៧៨ ០០០ (ជាង ១៧ ម៉ឺន​ដុល្លារ​អាមេរិក)។ តម្លៃ​នេះ​ស្ថិត​ក្នុង​ចំណោម​ឱសថ​ដែល​ថ្លៃ​ជាង​គេ​ក្នុង​ពិភពលោក​សម្រាប់​ពេល​បច្ចុប្បន្ន ចំពោះ​ឱសថ​ព្យាបាល​ជំងឺ​មហារីក។

អ្នក​នាំ​ពាក្យ​របស់​ក្រុមហ៊ុន Amgen គឺ​លោក​ដានីញ៉ែលបឺត្រាន់ (Danielle Bertrand) មាន​ប្រសាសន៍​ថា​តម្លៃ​ឱសថ​ជា​ប្រភេទ​ថ្នាំ​ចាក់​តាម​សរសៃ (infused medicine) ដែល​មាន​ឈ្មោះ​ថា «ប្ល៊ីនគីតូ – Blincyto» ជា​សេវា​កញ្ចប់​ដែល​មាន​កម្មវិធី​ព្យាបាល​ពីរ​បូក​បញ្ចូល​គ្នា ហើយ​ក្នុង​មួយ​កម្មវិធី​ថ្លៃ ៨៩ ០០០ ដុល្លារ​អាមេរិក (ប្រាំបី​ម៉ឺន​ប្រាំបួន​ពាន់)។

នៅ​ក្នុង​សារ​អេឡិកត្រូនិក​មួយ ក្រុមហ៊ុន​បាន​បញ្ជាក់​ថា ៖ ក្រុមហ៊ុន​ជឿ​ជាក់​ថា​តម្លៃ​លក់​ចេញ​នេះ អាស្រ័យ​ដោយ​សារ​បច្ចេកវិទ្យា និង​ប្រសិទ្ធភាព​ឱសថ និង​ក្រៅ​ពី​នេះ ក្រុមហ៊ុន​ក៏​បាន​គិត​គូរ​ទៅ​ដល់​កត្តា​សេដ្ឋកិច្ច និង​កត្តា​មនុស្ស​ធម៌ ដើម្បី​ជួយ​ស្រោចស្រង់​ជីវិត​មនុស្ស ឲ្យ​ចាក​ផុត​ពី​ជំងឺ​ដ៏​កាច​សាហាវ​នេះ។

សូម​បញ្ជាក់​ថា ​និយតករ​សហរដ្ឋ​អាមេរិក បាន​អនុម័ត​យល់​ព្រម​ឲ្យ​ក្រុមហ៊ុន​ដាក់​លក់​ឱសថ Blincyto នេះ​សម្រាប់​ព្យាបាល​ជំងឺ​មហារីក​ឈាម​ដែល​ហៅ​តាម​ភាសា​បច្ចេកទេស «acute lyphoblastic leukemia» កាល​ពី​ថ្ងៃ​ទី ០៣ ខែ​ធ្នូ ឆ្នាំ២០១៤ ពោល​គឺ​មុន​កាល​កំណត់​ពិត​ប្រាកដ​ដល់​ទៅ​ប្រាំ​ខែ​ឯណោះ៕

តើ​ជំងឺ​មហារីក​ឈាម​ជា​អ្វី?

កំណត់​សម្គាល់ ៖ ​ជំងឺ​មហារីក​ឈាម​មាន​ច្រើន​ប្រភេទ ហើយ​មូលហេតុ​ពិត​ប្រាកដ​ដែល​នាំ​ឲ្យ​កើត​ជំងឺ​នេះ​ នៅ​មិន​ទាន់​ត្រូវ​គេ​ស្រាវជ្រាវ​ឃើញ​នៅ​ឡើយ​ទេ។ គេ​បាន​ត្រឹម​ស្រាវ​ជ្រាវ​ឃើញ​ថា​មហារីក​ឈាម​បណ្ដាល​មក​ពី​ខួរឆ្អឹង​ខ្នង (bone marrow) បញ្ចេញ​គ្រាប់​ឈាម​ដែល​មិន​ទាន់​គ្រប់​អាយុ ឬ​គ្រាប់​ឈាម​ដែល​មិន​ទាន់​ពេញ​រូប​ពេញ​រាង ឲ្យ​រត់​ចូល​ទោ​ក្នុង​សរសៃ​ឈាម​។ នេះ​ហើយ​ជា​ចំណាប់​ផ្ដើម​នៃ​ជំងឺ​មហារីក​ឈាម។ រោគ​សញ្ញា​នៃ​ជំងឺ​មហារីក​ឈាម​មាន​ដូច​ជា​ស្លេកស្លាំង (ទោះ​បី​ស្បែក​ស​ក៏​មិន​មែន​ស​ដូច​មនុស្ស​មាន​សុខភាព​ល្អ​ដែរ​ទេ គឺ​ស​ស្លេក​ហាក់​ដូច​ជា​គ្មាន​ឈាម​ក្នុង​ខ្លួន) – ម្ហេតៗ – ក្ដៅ​ខ្លួន​ស្ទេញៗ ព្រោះ​ក្នុង​សរសៃ​ឈាម សម្បូរ​គ្រាប់​ឈាម​ស​ច្រើន​ពេក ពោល​គឺ​គ្រាប់​ឈាម​ស​ដែល​ខុស​ប្រក្រតី។

​ប្រែ​សម្រួល ៖ អន សំអាង

ប្រភព៖​ Reuters