រដ្ឋមន្ត្រីក្រសួងពាណិជ្ជកម្មស្នើឲ្យតំណាងក្រុមហ៊ុនចែកចាយប្រេងឥន្ធនៈ រក្សាតម្លៃលក់ខណៈតម្លៃប្រេងលើពិភពលោកឡើងថ្លៃវិញ
រដ្ឋមន្ត្រីក្រសួងពាណិជ្ជកម្ម លោក ស៊ុន ចាន់ថុល ស្នើឲ្យក្រុមហ៊ុនទាំងអស់ដែលកំពុងប្រតិបត្តិការចែកចាយលក់ប្រេងឥន្ធនៈនៅកម្ពុជារក្សាថ្លៃលក់រាយរបស់ខ្លួនឲ្យនៅដដែលសម្រាប់រយៈពេល ១០ថ្ងៃទៀត ខណៈដែលតម្លៃប្រេងនៅលើពិភពលោក បានឡើងថ្លៃប្រហែលជា ១៥% នាពេលថ្មីៗនេះ ។
កិច្ចប្រជុំលើកទី៥ នាថ្ងៃទី១១ ខែកុម្ភៈ ឆ្នាំ២០១៥ កន្លងមកនេះ មានការចូលរួមរវាងក្រសួងពាណិជ្ជកម្ម ក្រសួង សេដ្ឋកិច្ច និងហិរញ្ញវត្ថុ ក្រសួងរ៉ែនិងថាមពល និងតំណាងក្រុមហ៊ុន ចែកចាយប្រេងឥន្ធនៈធំៗដែលធ្វើប្រតិបត្តិការនៅកម្ពុជារួមមានក្រុមហ៊ុនសួគីម៉ិក SOKIMEX, តេលា(TELA), ភីភីធីកម្ពុជា(PTT) , កាល់តិច(CALTEX), ក្រុមហ៊ុនBVMP ( Bright Victory Mekong Petroleum), តូតាល់(TOTAL), និង ក្រុមហ៊ុន LHR។
នៅក្នុងជំនួបនោះ រដ្ឋមន្ត្រីក្រសួងពាណិជ្ជកម្មក៏បានស្នើឲ្យបង្កើតប្រកាសរួមមួយរវាងក្រសួងពាណិជ្ជកម្ម និង ក្រសួងរ៉ែនិងថាមពលដើម្បីធ្វើឲ្យប្រសើរឡើងដល់ការធ្វើសេចក្តីរាយការណ៍ពី សន្និធិបេ្រង ដែលតម្រូវឲ្យអ្នកចែកចាយប្រេងរក្សាឲ្យបានកម្រិតសមស្រប ក្នុងធានានូវកម្រិតសុវត្ថិភាពប្រេង ដែលរក្សាទុកគ្រប់គ្រាន់សម្រាប់ចែកចាយ ។
ឆ្លើយតបទៅនឹងការស្នើរបស់រដ្ឋមន្ត្រីក្រសួងពាណិជ្ជកម្មតំណាងក្រុមហ៊ុន SOKIMEX, TELA, PTT, BVMP, និង ក្រុមហ៊ុន LHR បានសម្រេចរក្សាតម្លៃប្រេង ឲ្យនៅដដែល ដោយឡែកក្រុមហ៊ុនCALTEX និងTOTAL នឹងបញ្ជាក់ពីស្ថានភាពថ្លៃលក់របស់ខ្លួន បន្ទាប់ពីទទួលបានការឯកភាព ពីថ្នាក់ដឹកនាំប្រចាំតំបន់របស់ខ្លួន ។
កាលពីព្រឹកថ្ងៃទី១០ ខែកុម្ភៈ ឆ្នាំ២០១៥កន្លងទៅនេះ សម្ដេចនាយករដ្ឋមន្ត្រី បានផ្ដល់អនុសាសន៍ទៅឲ្យរដ្ឋមន្ត្រីក្រសួងសេដ្ឋកិច្ចនិង ហិរញ្ញវត្ថុ លោក អូន ព័ន្ធមុនីរ័ត្ន ពិនិត្យទៅលើលទ្ធភាពបញ្ចេញថវិកាក្នុងការទិញប្រេងមករក្សាទុក ដើម្បីបម្រុងទុកនៅពេលប្រេងឡើងថ្លៃវិញ។
គួររម្លឹកថា នៅក្នុងផែនការបញ្ចុះតម្លៃប្រេងលក់រាយ នៅក្នុងស្រុកនេះ ក្រសួងពាណិជ្ជកម្ម ក្រសួងសេដ្ឋកិច្ច និងហិរញ្ញវត្ថុ រួមជាមួយស្ថាប័នក្រុមហ៊ុនប្រេងឥន្ធនៈនៅក្នុងស្រុកបានឯកភាព គ្នាធ្វើការជួបប្រជុំនៅទីស្ដីការក្រសួងពាណិជ្ជកម្មរៀងរាល់១០ ថ្ងៃម្ដងដើម្បី ពិនិត្យមើលតម្លៃប្រេងឥន្ធនៈ ហើយលទ្ធផលនៃកិច្ចប្រជុំ នឹងត្រូវផ្សព្វផ្សាយ ជាសាធារណៈតាមរយៈទូរទស្សន៍ វិទ្យុ សារព័ត៌មាន និងបណ្ដាញសង្គម ៕
អត្ថបទ ៖ ចាន់ សុខ នាង
