ឱសថដ៏ថ្មីសន្លាងសម្រាប់ព្យាបាលជំងឺរលាកថ្លើមប្រភេទសេ មួយគ្រាប់ថ្លៃជាងមួយពាន់ដុល្លារ !
គណៈកម្មការត្រួតពិនិត្យឱសថនៅសហរដ្ឋអាមេរិកបានអនុម័តឲ្យដាក់លក់នូវឱសថព្យាបាលជំងឺរលាក និងក្រិនថ្លើមប្រភេទសេហើយ ហើយឱសថនេះអាចព្យាបាលជំងឺក្រិនថ្លើមនេះឲ្យជាសះស្បើយតែម្ដង ដោយមិនបាច់ចំណាយពេលព្យាបាលយូរអង្វែង និងមិនបាច់ប្រើវិធីចាក់អ្វីទាំងអស់ គឺលេបជារៀងរាល់ថ្ងៃ។
ប៉ុន្តែបញ្ហាចោទនៅត្រង់ថាឱសថនេះ ក្នុងដំណាក់កាលចេញលក់ដំបូងនេះ គឺតម្លៃរបស់វាមិនធម្មតាទេ មួយគ្រាប់ថ្លៃរហូតដល់ទៅ ១១២៥ ដុល្លារ ហើយក្រុមហ៊ុនផលិតឱសថនេះ ត្រូវមជ្ឈដ្ឋានទូទៅរិះគន់ចំពោះតម្លៃដែលថ្លៃហួសហេតុ។
គណៈកម្មការត្រួតពិនិត្យចំណីអាហារនិងឱសថ ឲ្យដឹងកាលពីយប់មិញថាគណៈកម្មការបានសម្រេចអនុញ្ញាតឲ្យក្រុមហ៊ុន Gilead Sciences ដាក់លក់ឱសថឈ្មោះ Harvoni នៅលើទីផ្សារ ហើយ។ វិធីព្យាបាលដោយប្រើឱសថនេះ គឺអ្នកជំងឺត្រូវលេបឱសថនេះប្រចាំថ្ងៃ ហើយចែកចេញជាវិធីព្យាបាលពីរប្រភេទ គឺ ១-ប្រើវិធីព្យាបាលរយៈពេល ១២ សប្ដាហ៍ អស់តម្លៃ ៩៤៥០០ ដុល្លារ (ជាងប្រាំបួនម៉ឺនបួនពាន់) និង ២-ព្យាបាលដោយលេបឱសថនេះរយៈពេល ៨សប្ដាហ៍ ត្រូវចំណាយប្រាក់អស់ ៦៣០០០ ដុល្លារ (ប្រាំមួយម៉ឺនបីពាន់ដុល្លារ) (នេះជាតម្លៃលក់នៅសហរដ្ឋអាមេរិក)។
សូមបញ្ជាក់ថាឱសថរបស់ក្រុមហ៊ុន Gilead Sciences ពិតជាពូកែណាស់សម្រាប់ព្យាបាលជំងឺរលាកថ្លើម ឬក្រិនថ្លើមប្រភេទសេ (C) ប៉ុន្តែអ្នកព្យាបាលកន្លងមកខ្លាចរអារឿងតម្លៃ ព្រោះវាថ្លៃជ្រុលពេក សុទ្ធតែមួយគ្រាប់ៗ ជាងមួយពាន់ដុល្លារ។ កាលពីឆ្នាំ២០១៣ ក្រុមហ៊ុនក៏បានផលិតនិងដាក់លក់ឱសថ Sovaldi ម្ដងហើយ ហើយថ្លៃព្យាបាលរយៈពេល ១២ សប្ដាហ៍រហូតដល់ទៅ ៨៤០០០ ដុល្លារ (ប្រាំបីម៉ឺនបួនពាន់)៕
ប្រែសម្រួលៈ អន សំអាង
ប្រភព៖ Associated Press - CBS News – Fox News – USA Today
