តើក្នុងកាបូបខ្មៅប្រធានាធិបតីអាមេរិកមានអ្វីជាអាថ៌កំបាំង បានជាដាក់ជាប់ខ្លួនជានិច្ច (មានវីដេអូ)?
កាបូបស្បែកពណ៌ខ្មៅដែលជំនួយការប្រធានាធិបតីសហរដ្ឋអាមេរិក ដាក់តាមខ្លួនជាប្រចាំពេលអមដំណើរគណៈប្រតិភូ។ កាបូបនេះផ្ទុកឯកសារ និងឧបករណ៍សម្ងាត់កម្រិតខ្ពស់ (top-secret) ដែលប្រធានាធិបតីប្រើប្រាស់សម្រាប់បញ្ជាកងទ័ពបាញ់គ្រាប់មីស៊ីលបរមាណូ នៅពេលដែលប្រធានាធិបតីនៅឆ្ងាយពីទីបញ្ជាការ ឧទាហរណ៍ពេលដែលលោក ឬលោកស្រីមិនមានវត្តមាននៅក្នុងសេតវិមាន។
កាបូបនេះត្រូវគេហៅតាមភាសាផ្លូវការថា nuclear Football យួរដោយដៃផ្ទាល់របស់ជំនួយការខាងវិស័យការពារជាតិ។ កាលណាមានហេតុការណ៍ចាំបាច់ ប្រធានាធិបតីសហរដ្ឋអាមេរិក ក្នុងនាមជាអគ្គបញ្ជាការកងទ័ព ស្ថិតនៅក្បែរគាត់គ្រប់ពេលវេលា ដូចនេះ ក្នុងកាលៈទេសៈចាំបាច់ ប្រធានាធិបតីគ្រាន់តែឲ្យគេយកកាបូបនោះទៅជូនគាត់ជាការស្រេច។
លោក Bill Gulley ជាអតីតនាយកទីចាត់ការនៃការិយាល័យការពារជាតិប្រចាំសេតវិមាន (the White House)។ លោកប្រាប់ថា នៅក្នុងកាបូបសម្ងាត់នោះផ្ទុកសំណុំឯកសារ និងវត្ថុចំនួនបួនប្រភេទ៖
១- សៀវភៅកម្រាស់ ៧៥ ទំព័រពណ៌ខ្មៅ។ សៀវភៅនេះ និយាយអំពីជំរើសផ្សេងៗ សម្រាប់ប្រធានាធិបតីចេញបញ្ជាឲ្យវាយប្រហារទៅបច្ចាមិត្តដោយប្រើអាវុធបរមាណូ ឬនុយក្លេអ៊ែរ (nuclear weapons)។ សៀវភៅនេះជាសៀវភៅពុម្ព បោះពុម្ពដោយប្រើទឹកថ្នាំពណ៌ខ្មៅ និងពណ៌ក្រហម។
២- សៀវភៅមួយក្បាលទៀត ពណ៌ខ្មៅ (Black Book) និយាយអំពីទីតាំង សម្រាប់ប្រធានាធិបតីសហរដ្ឋអាមេរិកយកធ្វើជាកន្លែងសុវត្ថិភាពសម្រាប់បំពេញការងារក្នុងពេលមានចម្បាំងរាំងជល់។
៣- ប្រអប់ផ្ទុកឯកសារសម្ងាត់ (manila folder)។ ប្រអប់នេះជាលក្ខណៈក្រដាសរឹងកម្រាស់ ១០ ទំព័រ រៀបរាប់អំពីវិធីគ្រប់គ្រងបញ្ជាប្រព័ន្ធចែកចាយព័ត៌មានក្នុងគ្រាអាសន្ន (Emergency Broadcast System)។
៤- លិបិក្រម (index) ឬហៅម្យ៉ាងទៀតថាជាបញ្ជីរាយលេខកូដសម្ងាត់៕
.
ប្រែសម្រួល៖ អន សំអាង
ប្រភព៖ Business Insider
