គម្រោងសាងសង់ផ្លូវអាកាសល្បឿនលឿនពីរង្វង់មូលកាំកូស៊ីធីឆ្ពោះទៅប្រលានយន្តហោះដំណើរការយ៉ាងម៉េចហើយ?
ក្រុមហ៊ុនដ៏ធំមួយរបស់ចិនបន្តជជែកពិភាក្សាពីគម្រោងសាងសង់ផ្លូវអាកាសល្បឿនលឿនពីរង្វង់មូលកាំកូស៊ី ធី ឆ្ពោះទៅប្រលានយន្តហោះអន្តរជាតិភ្នំពេញ ដើម្បីកាត់បន្ថយការកកស្ទះចរាចរណ៍ដែលកំពុងតែកើតមាននាពេលបច្ចុប្បន្ន។
តាមការបញ្ជាក់របស់សាលារាជធានីភ្នំពេញនៅថ្ងៃនេះ ឱ្យដឹងថា កិច្ចប្រជុំរវាងលោក អៀង អូននី និង លោក ត្រាក់ ថៃសៀង អភិបាលរងរាជធានីភ្នំពេញជាមួយ នឹងក្រុមហ៊ុនចិន Henan Provincial Communication Planning Survey & Design Institute Ci.,Ltd ស្ដីពីគម្រោងធ្វើឡើងតាមរយៈរូបមន្តសាងសង់ អាជីវកម្មផ្ទេរ (B.O.T)នេះ នឹងត្រូវសិក្សាលម្អិតលើបញ្ហា ៣សំខាន់ៗបន្ថែមទៀតរួមមាន កត្តាបច្ចេកទេស សង្គមកិច្ច និងកត្តាសេដ្ឋកិច្ច ព្រោះដោយសារគម្រោងនេះមានទ្រង់ទ្រាយធំ។
ក្រៅពីគម្រោងសាងសង់ផ្លូវអាកាសដែលមានល្បឿនលឿន កន្លងមកក្រុមហ៊ុនខាងលើក៏មានផែនការមេអភិវឌ្ឍន៍ផ្លូវល្បឿនលឿននៅកម្ពុជាសំខាន់ពីរផងដែរ មួយចាប់ពីទីក្រុងភ្នំពេញឆ្ពោះទៅក្រុងព្រះសីហនុ ហើយមួយទៀតចេញពីទីក្រុងភ្នំពេញឆ្ពោះទៅទីក្រុងហូជីមិញរបស់វៀតណាមដែលផ្លូវល្បឿនលឿនទាំងពីរនេះ នឹងចំណាយប្រាក់ ៩ ពាន់លានដុល្លារ ហើយរំពឹងថា នឹងត្រូវបញ្ចប់ត្រឹម ឆ្នាំ២០៣០។
កាលពីពេលកន្លងមក ក្រុមហ៊ុនវាយតម្លៃ គម្រោងគមនាគមន៍ និង វិទ្យាស្ថានរចនាប្លង់ខេត្តហឺណាន ប្រទេសចិន(HPCPSDI) ក៏បានលើកសំណើគម្រោងវិនិយោគចំនួន៣ មកខាងកម្ពុជាផងដែរ ដោយគម្រោងទាំងបីនោះរួមមាន គម្រោងសាងសង់ផ្លូវល្បឿនលឿនក្នុងរាជធានីភ្នំពេញ គម្រោងសាងសង់ស្ពានកោះដាច់តាមរូបមន្តសាងសង់-អាជីវកម្ម-ផ្ទេរ និង គម្រោងជួសជុលកែលម្អផ្លូវលេខ៩៥ នៅខេត្តព្រះវិហារ។
ជាមួយការកកស្ទះចរាចរណ៍ក្នុងរាជធានីភ្នំពេញ ទីភ្នាក់ងារសហប្រតិបត្តិការអន្តរជាតិជប៉ុន (JICA)មានគម្រោងសាងសង់ប្រព័ន្ធផ្លូវដែកចំនួនពីរខ្សែពីប្រលាន យន្តហោះអន្តរជាតិភ្នំពេញមកកណ្តាលទីក្រុងពីលិចទៅកើតនិងពីកើត ទៅលិចដែលអាចដាក់អ្នកធ្វើដំណើរប្រមាណពី ៧២ ៥០០នាក់ទៅ ៨១ ៦០០នាក់ ក្នុងទឹកប្រាក់ប្រមាណ ១ ៣៥៥លានដុល្លារ (១ពាន់៣រយហាសិបប្រាំលានដុល្លារ)។ គម្រោងនេះនឹងត្រូវចាប់ផ្តើមប្រតិបត្តិការនៅក្នុងឆ្នាំ២០២៣ ៕
អត្ថបទ ៖ ចាន់ សុខ នាង
