ហេតុអ្វីនៅសុខៗលោកអូបាម៉ា ចង់ធ្វើតេស្ដ DNA ប្រជាជនអាមេរិកជាង ១លាននាក់?
យោងតាមការចុះផ្សាយសារព័ត៌មាន Reuters ថ្ងៃនេះបានឱ្យដឹងថា សហរដ្ឋអាមេរិកបានលើកសំណើធ្វើការវិភាគហ្សែនេទិក ឬហ្សែន (DNA) ទៅលើប្រជាជនអាមេរិកជាង ១លាននាក់ដែលជាការស្ម័គ្រចិត្តជាផ្នែកមួយនៃគំនិតផ្ដួចផ្ដើមដើម្បីស្វែងយល់ពីជំងឺមនុស្ស និងបង្កើតវ៉ាក់សាំងទប់ស្កាត់។
ជាអ្នកផ្ដួចផ្ដើមគម្រោងនេះ ប្រធានាធិបតីអាមេរិកលោក បារ៉ាក់ អូបាម៉ា បានប្រកាសសំណើនេះកាលពីថ្ងៃសុក្រចុងសប្ដាហ៍កន្លងមក ហើយអ្នកស្ម័គ្រចិត្តដែលគ្រោងជ្រើសរើស មានក្រុមមនុស្សមានសុខភាពល្អ និងក្រុមមនុស្សឈឺ ស្ត្រី និងបុរស ក្រុមក្មេងៗ និងចាស់ៗ។
គម្រោងនៃការធ្វើតេស្ដ DNA មនុស្សជាង ១លាននាក់នេះ គឺត្រូវបានគេមើលឃើញថា នឹងអាចទទួលបានទិន្នន័យពីរបៀបនៃការព្យាបាលជំងឺកើតលើមនុស្សផ្សេងៗគ្នា ហើយគោលដៅដំបូងនៃគំនិតផ្ដួចផ្ដើមនេះគឺផ្ដោតទៅលើជំងឺមហារីក។
លោក អូបាម៉ា បានដាក់សំណើសុំកញ្ចប់ថវិកាប្រមាណ ២១៥លានដុល្លារនៅឆ្នាំ២០១៦ សម្រាប់អនុវត្តគម្រោងនេះ៕
