នាយករដ្ឋមន្ត្រី ថាសកម្មជនតវ៉ាដីធ្លីជាប់គុក ព្រោះចង់បានពានរង្វាន់
ភ្នំពេញៈ លោក ហ៊ុន សែន កាលពីព្រឹកមិញ បានធ្វើការចំអកដល់ស្ត្រីសកម្មជនដីធ្លីជាប់ពន្ធនាគារ ទោះនិយាយមិនចំឈ្មោះ ប៉ុន្តែសំដៅទៅលើក្រុមអ្នកតវ៉ាដីធ្លីនៅបឹងកក់ កំពុងឃុំខ្លួនជាប់ទោសរហូតដល់១ឆ្នាំ ដែលលោកថា ពួកគេធ្វើអ្វីៗដើម្បីឲ្យបានជាប់ពន្ធនាគារ ហើយក្រោយមកដើម្បីទទួលមេដាយពីក្រៅប្រទេស តែប៉ុណ្ណោះ។
លោកនាយករដ្ឋមន្ត្រី ក្នុងពិធីចែកសញ្ញាប័ត្រនិស្សិតសាកលវិទ្យាល័យជាតិគ្រប់គ្រង បានថ្លែងដូច្នេះថា៖ «ជាប់គុកវាមិនដែលស្រួលទេ។ សូមអំពាវនាវកុំឲ្យសាកល្បងជាមួយគុក។ មានពេលមួយនោះ វាថាជាប់គុក ដើម្បីឲ្យទៅយកមេដាយនៅវ៉ាស៊ីងតោននោះទេ។ ព្រោះវាចង់ជាប់គុក ចឹងដាក់ឲ្យបង្គ្រប់កិច្ច ទៅយកមេដាយនៅវ៉ាស៊ីងតោនទៅ»។
លោកបន្តថា៖ «ថ្ងៃមុនឯកឧត្តម សម រង្ស៊ី គួយ ប៊ុនរឿន អេង ឆៃអ៊ាង ចូលទៅក្នុងបន្ទប់ (ខ្ញុំ) ហើយថា ម៉េចហើយសម្តេច បានជាដាក់គុក? (ខ្ញុំថា) តុលាការគេដាក់ អាណាគេដឹង។ ហើយ (ខ្ញុំថា) ម្នាក់នោះ គេជាប់គុក ហើយចេញពីគុក បានទៅយកមេដាយ នៅវ៉ាស៊ីងតោន នេះគឺគាត់ចង់ជាប់គុកដើម្បី ទៅយកមេដាយទេ បានជាគាត់ប្រឹងធ្វើម៉្លេះ។ បើគាត់ធ្វើធម្មតា មិនជាប់គុក ចឹងគាត់ត្រូវបង្កើតស្ថានការណ៍ បទល្មើសស្អី ដែលអាចជាប់គុកបាន ឲ្យតែបានគុក គឺគាត់ក្លាយជាវីរនារីហើយ។ ចឹងជូនតាមសំណើទៅ តែអាហ្នឹងរឿងតុលាការទេ ខ្ញុំអត់ដឹងទេ»។
គួរបញ្ជាក់ថា អ្នកស្រី ទេព វន្នី អ្នកដឹកនាំការតវ៉ាដ៏ល្បីឈ្មោះ ដើម្បីការពារការរំលោភដីធ្លី ផ្ទះសម្បែងរបស់ពលរដ្ឋនៅតំបន់បឹងកក់ និងសព្វថ្ងៃកំពុងជាប់ពន្ធនាគារជាមួយស្ត្រីបឹងកក់ផ្សេងទៀត គឺជាម្ចាស់ជ័យលាភីពានរង្វាន់ Global Leadership award កាលពីខែមេសា ឆ្នាំ២០១៣ របស់អង្គការVital Voices មានមូលដ្ឋាននៅសហរដ្ឋអាមេរិក។
នៅឆ្នាំនោះផងដែរ អ្នកស្រី វន្នី ក៏បានទទួលពានរង្វាន់សិទ្ធិមនុស្សមួយទៀត លើខ្សែភាពយន្តឯកសារ (Movies that Matter Film Festival) នៅក្រុងឡាអេ ប្រទេសហូឡង់។
ប្រភពពី ភ្នំពេញប៉ុស្តិ៍
