ភាពអស្ចារ្យទាំង ១៦ ដែលលោកអ្នកមិនបានដឹងពីលំនៅឋានដ៏ស្កឹមស្កៃរបស់មហាសេដ្ឋី Bill Gates!
ជាមួយនឹងទ្រព្យសម្បត្តិប្រមាណ ៨០ ពាន់លានដុល្លារ មហាសេដ្ឋី Bill Gates ត្រូវបានគេចាត់ទុកថា ជាមហាសេដ្ឋីមានជាងគេបំផុតនៅលើពិភពលោក។ ទឹកប្រាក់ដ៏ច្រើនសន្ធឹកសន្ធាប់នេះ ពិតជាធ្វើឲ្យប្រិយមិត្តចាប់អារម្មណ៍ជាមិនខាន។
បើមានប្រាក់ច្រើនបែបនេះ នោះលំនៅឋានស្កឹមស្កៃស្ថាបនិករបស់ក្រុមហ៊ុន Microsoft វ័យ ៥៩ ឆ្នាំរូបនេះក៏មិនធម្មតាដែរមើល៍ទៅ! TheBNEWS នឹងនាំលោកអ្នកឲ្យស្គាល់កាន់តែច្បាស់ថា តើលំនៅឋានរបស់មហាសេដ្ឋីខាងលើមានអ្វីពិសេសខ្លះ ខុសពីលំនៅឋានរបស់មនុស្សទូទៅ?
១) ស្ថិតនៅមាត់បឹង Washington នៅទីក្រុងវ៉ាស៊ីនតោន យោងតាមគេហទំព័រ kingcounty.gov បានឲ្យដឹងថា លំនៅឋានរបស់លោក Bill Gates មានតម្លៃរហូតដល់ ១២៣,៥៤ លានដុល្លារ។ លោកបានទិញដីឡូនៅទីនេះក្នុងតម្លៃ ២ លានដុល្លារកាលពីឆ្នាំ ១៩៨៨។ ក្នុងមួយឆ្នាំៗ លោកបានបង់ពន្ធជូនរដ្ឋប្រមាណ ១ លានដុល្លារលើការកាន់កាប់អចលនទ្រព្យរបស់លោក។
២) ប្រភេទឈើព្រៃដើមធំ និង ខ្ពស់ (Douglas fir trees) ដែលមានអាយុកាលប្រមាណ ៥០០ឆ្នាំត្រូវបានយកមកសាងសង់ធ្វើជាគ្រឿងសង្ហារិមនៅក្នុងលំនៅឋានរបស់លោក ជាមួយកម្មករសាងសង់សរុប ៣០០ នាក់។
៣) លំនៅឋានរបស់លោកមានបំពាក់ប្រព័ន្ធបច្ចេកវិទ្យាដោយស្វ័យប្រវត្តិ ( sensor System) នៅពេញលំនៅឋានដើម្បីបើកភ្លើង បន្ថយ ឬ បង្កើនសីតុណ្ហភាព និង មានឧបករណ៍រំពងសំឡេងបង្កប់ខ្លួនទៀតផង។ បើអ្នកចូល ឬ ចាក់ចេញនៅកន្លែងណា វានឹងបិទបើកដោយស្វ័យប្រវត្តិនៅកន្លែងនោះ។
៤) លំនៅឋាននេះត្រូវបានសាងសង់ព័ទ្ធជុំវិញទៅដោយដើមឈើមានលក្ខណៈធម្មជាតិដើម្បីកាត់បន្ថយកំដៅ និង រក្សាសីតុណ្ហភាពនៅជុំវិញលំនៅឋាន។
៥) នៅតាមជញ្ជាំងលំនៅឋានទាំងមូលមានបំពាក់ផ្ទាំងស្គ្រីនកុំព្យូទ័រតម្លៃសរុបប្រមាណ ៨ សែនដុល្លារ និង ឌីវ៉ាយ (Devices) តម្លៃ ១៥០ ០០០ដុល្លារ។ ការបំពាក់ស្គ្រីនកុំព្យូទ័រនេះអាចឲ្យភ្ញៀវដែលចូលទៅលេងអាចប្តូររូបភាព ឬ រូបគំនូរសិល្បៈផ្សេងៗនៅតាមជញ្ជាំងតាមចិត្តចង់ដោយគ្រាន់តែចុច ប៊ូតុងតែប៉ុណ្ណោះ។
៦) អាងហែលទឹកដ៏ទំនើបបំពាក់ទៅដោយប្រព័ន្ធតន្ត្រីនៅក្រោមទឹក ជាមួយនឹងបន្ទប់ទឹកដ៏ទំនើបៗមានវត្តមាននៅក្នុងលំនៅឋានដ៏ធំស្កឹមស្កៃនេះ។
៧) មានបន្ទប់(trampoline room) សម្រាប់លេងកម្សាន្ត និង ការហាត់ប្រាណ បន្ទប់ដេកសំដិលខ្លួន និង បន្ទប់សម្រាប់ស្ទឹមខ្លួន ដែលខណ្ឌចែករវាងបុរស និង ស្ត្រី។
៨) លំនៅឋាននេះ មានបន្ទប់ទទួលភ្ញៀវដែលអាចចូលរួមពិសារអាហាររហូតដល់ ១៥០ ទៅ ២០០នាក់ និង អាចរៀបចំពិធីជប់លៀងផ្សេងៗ បំពាក់ទៅដោយវីដេអូស្គ្រីនដ៏ធំអមជាមួយទៀតផង។
៩) លំនៅឋាននេះមានបន្ទប់គេងសរុបចំនួន ២៤ បន្ទប់ ក្នុងនោះ ១០ បន្ទប់ មានបន្ទប់ទឹកអមនៅជាមួយ។
១០) ក្រៅពីបន្ទប់ទទួលភ្ញៀវដ៏ធំ លំនៅឋានមួយនេះមានបន្ទប់ចម្អិនអាហារសរុបទាំងអស់ចំនួន៦ ដែលស្ថិតនៅទីតាំងផ្សេងៗគ្នានៅ ក្នុងគេហដ្ឋាននេះ។
១១) កាន់តែអស្ចារ្យជាងនេះទៅទៀត នៅក្នុងលំនៅឋានរបស់មហាសេដ្ឋីរូបនេះមានបណ្ណាល័យដ៏ធំមួយទៀត ជាមួយនឹងស្នាដៃនិពន្ធសរសេរដោយដៃផ្ទាល់របស់លោក Codex Leicester តាំងពីសតវត្សទី ១៦ ដែលលោកបានចំណាយប្រាក់ទិញរហូតដល់ ៣០,៨ លានដុល្លារក្នុងការលក់ដេញថ្លៃមួយនៅឆ្នាំ ១៩៩៤។
១២) នេះមិនគ្រប់គ្រាន់ឡើយ ត្បិតអីលំនៅឋានមួយនេះក៏មានរោងភាពយន្តមួយដែលអាចអនុញ្ញាតឲ្យភ្ញៀវបានចូលរួមទស្សនាភាពយន្តរហូតដល់ ២០ នាក់។
១៣) មានចំណតរថយន្តជាច្រើនបានសាងសង់ឡើងនៅជុំវិញលំនៅឋានរបស់លោក ដែលអាចដាក់រថយន្តបានរហូតដល់ ២៣ គ្រឿង។
១៤) លោក Bill Gates ចូលចិត្តដើមឈើម្យ៉ាងដែលហៅថា “Maple Tree” ។ វាត្រូវបានដាំលំអនៅអមនឹងផ្លូវរថយន្ត បំពាក់ដោយភ្លើងអគ្គិសនី២៤ ម៉ោងលើ ២៤ ម៉ោង ក្រោមការត្រួតពិនិត្យដោយប្រព័ន្ធកុំព្យូទ័រសម្រាប់បាញ់ទឹក ឬ ស្រោចទឹកដោយស្វ័យប្រវត្តិ។
១៥) ក្រៅពីនេះនៅមានជ្រោះសិប្បនិម្មិតមួយទៀតដែលមានចិញ្ចឹមត្រី សូម៉ុង(salmon) និង ត្រីសមុទ្រជាច្រើនទៀត។
១៦) ងាកទៅមើលឆ្នេរខ្សាច់នៅខាងមុខលំនៅឋានរបស់លោកវិញត្រូវបាននាំយកមកពីឆ្នេរសមុទ្រតំបន់ខារ៉ាប៊ីននៅអាមេរិកកណ្តាលដែលជាតំបន់មានឆ្នេរខ្សាច់ល្អៗ និង ស្រស់ស្អាតសម្រាប់លោកលេងកម្សាន្តជាមួយគ្រួសារ៕
ប្រែសម្រួល៖ ខេវិន
