Apple កំពុងបង្កើតសេវាកម្ម Apple Search ប្រជែងនឹង Google
ក្រុមហ៊ុន Apple និង Google បានប្រកួតប្រជែងគ្នាចាប់តាំងពី Google បានប្រឡូកចូលជំនួញស្មាតហ្វូនដោយអភិវឌ្ឍប្រព័ន្ធប្រតិបត្តិការ Android ចំណែក Apple សម្ពោធចេញ iPhone ក្នុងខែមិថុនា ឆ្នាំ២០០៧ ចំណែក Google ចេញប្រព័ន្ធប្រតិបត្តិការ Android ក្នុងខែកញ្ញា ឆ្នាំ២០០៨។
យោងតាមរបាយការណ៍ថ្មីៗនេះឱ្យដឹងមកថា ក្រុមហ៊ុន Apple អាចមានគម្រោងប្រឡូកចូលអាជីវកម្មស្វែងរុករក ប្រជែងនឹង search engine របស់ក្រុមហ៊ុន Google ខណៈដែលជំនួញនេះកំពុងរកចំណូលចូលក្រុមហ៊ុនយ៉ាងច្រើន។ សារព័ត៌មាន Cult of Mac បានរកឃើញបញ្ជីមុខតំណែងរបស់Apple ដែលក្រុមហ៊ុនកំពុងស្វែងរកវិស្វករដើម្បីធ្វើការពាក់ព័ន្ធ ‘Apple Search’។
នៅក្នុងសេចក្ដីបញ្ជាក់ចំពោះមុខតំណែងឱ្យដឹងថា ការងាររបស់បុគ្គលិកនឹងតម្រូវឱ្យមើលការខុសត្រូវ ក៏ដូចជាអភិវឌ្ឍ “search platform ដើម្បីគាំទ្រការស្វែងរកពីមនុស្សរាល់រយលានអ្នក” ហើយបុគ្គលិកអាចនឹងត្រូវសិក្សាបែកចែកការអភិវឌ្ឍ Apple Search ដើម្បីគាំទ្រទាំងនៅលើកុំព្យូទ័រ និងទូរស័ព្ទ។
កន្លងមក មានក្រុមហ៊ុនជាច្រើនបានខិតខំបង្កើតសេវាកម្មស្វែងរុករកប្រជែងជាមួយក្រុមហ៊ុន Google ក្នុងនោះមានដូចជា Yahoo! របស់ Yahoo, Bing របស់ Microsoft និង Ask.com។ ដូច្នេះប្រសិន Apple ក៏មានបំណងប្រឡូកចូលជំនួញ Search engine នេះដែរ នោះពិតជារឿងគួរឱ្យចាប់អារម្មណ៍ហើយ។ បើ Apple ចេញ Apple Search មែន តើអាចជោគជ័យកម្រិតណា?
ប្រែសម្រួល៖ លី ឈៀន
ប្រភព៖ cultofmac
