ឥឡូវនេះ Gmail អាចផ្ទេរលុយឱ្យគ្នាបានទៀត!
ការផ្ទេរប្រាក់ និងទទួលប្រាក់ពេលនេះពិតជាទំនើប និងផ្ដល់លក្ខណៈងាយស្រួលបំផុតសម្រាប់លោកអ្នកដែលប្រើប្រាស់សេវាកម្ម Gmail របស់ Google។ ក្រុមហ៊ុនស្វែងរកដ៏ធំកាលពីពេលថ្មីៗនេះ ទើបបានប្រកាសដាក់ឱ្យដំណើរការមុខងារពិសេសផ្ទេរប្រាក់តាម Gmail សម្រាប់អ្នកប្រើប្រាស់សេវាកម្មអ៊ីមែលរបស់ខ្លួននៅក្នុងប្រទេសអង់គ្លេស។ ដូច្នេះអ្នកប្រើនឹងអាចផ្ញើប្រាក់ពីគណនី Google Wallet ចូលទៅគណនីធនាគាររបស់ភាគីម្ខាងទៀតបានយ៉ាងងាយ។
សេវាកម្មពិសេសនេះ នឹងផ្ដល់ភាពងាយស្រួលសម្រាប់លោកអ្នកដែលកំពុងប្រើស្មាតហ្វូន/ថេប្លេត Android អាចផ្ទេរ និងទទួលប្រាក់ឱ្យគ្នាបានដើម្បីទិញកម្មវិធី (app) ពី Play Store។ ចាប់តាំងពី Google បានប្រកាសមុខងារ Send Money in Gmail នេះ អាចឱ្យអ្នកប្រើធ្វើការផ្ទេរ និងទទួលប្រាក់តាម Gmail បានកាលពីឆ្នាំ២០១៤ មក ឥឡូវនេះ ក្រុមហ៊ុនបង្ហាញបច្ចុប្បន្នភាពថ្មីនេះ ដើម្បីដំណើរការបានសម្រាប់អ្នកប្រើ Gmail នៅអង់គ្លេស។
មុខងារទំនើប Send Money ពេលនេះ អាចដំណើរការបានសម្រាប់តែប្រជាជនអង់គ្លេស អាយុចាប់ពី ១៨ឆ្នាំប៉ុណ្ណោះ។ ដូច្នេះប្រជាជនអង់គ្លេសនឹងឃើញប៊ូតុង Attach Money នៅលើគណនី Gmail របស់ខ្លួន។ ក្រោយពីចុចលើប៊ូតុង Attach Money អ្នកនឹងឃើញប្រអប់ដើម្បីកំណត់ចំនួនទឹកប្រាក់ដែលចង់ផ្ទេរពីគណនី Google Wallet រួចហើយចុចលើប៊ូតុង Attach ជាការស្រេច។ ចំណែកភាគីទទួលប្រាក់ ត្រូវចុចលើប៊ូតុង Claim money ដើម្បីយល់ព្រម។
សូមបញ្ជាក់ថា កាលពីឆ្នាំ២០១៤ កន្លងទៅ ក្រុមហ៊ុន Google បានច្របាច់បញ្ចូលប្រព័ន្ធចាយប្រាក់តាមទូរស័ព្ទដៃ Google Wallet ជាមួយសេវាកម្ម Gmail ដើម្បីផ្ដល់សុវត្ថិភាពខ្ពស់ ក្នុងការផ្ទេរប្រាក់ឱ្យមិត្តភ័ក្ដិ ឬក្រុមគ្រួសារដោយផ្ទាល់តាម Gmail៕
ប្រែសម្រួល៖ លី ឈៀន
ប្រភព៖ http://googlecommerce.blogspot.co.uk
