នាយករដ្ឋមន្រ្ដីអូស្រ្ដាលីទទួលស្គាល់កំហុសមិនបានពិគ្រោះយោបល់ជាមួយរដ្ឋមន្រ្ដីដទៃ
រដ្ឋមន្រ្ដី និងតំណាងរាស្រ្ដជាច្រើនក្នុងជួររដ្ឋាភិបាលអូស្រ្ដាលីកំពុងតែ នាំគ្នាប្រឹងនិយាយសម្រាលចំពោះបញ្ហាធ្ងន់មួយដែលជាផលនៃការសម្រេច ចិត្ដរបស់នាយករដ្ឋមន្រ្ដីអូស្រ្ដាលីក្នុងការផ្ដល់គោរមងារ Knighthood ទៅឲ្យព្រះអង្គម្ចាស់ Philip ដែលជាព្រះស្វាមីរបស់ព្រះមហាក្សត្រិយានីអង់គ្លេស។
លោកនាយករដ្ឋមន្រ្ដី Tony Abbott បានធ្វើឲ្យតំណាងរាស្រ្ដគណបក្សរបស់លោកជាច្រើនខឹងក្រោធខ្លាំងដោយសារលោកមិនបានធ្វើការពិគ្រោះយោបល់អំពីរឿងនេះជាមួយនឹងពួកគេ។
នាយករដ្ឋមន្រ្ដីអូស្រ្ដាលីទទួលស្គាល់កំហុសមិនបានពិគ្រោះយោបល់ជាមួយរដ្ឋមន្រ្ដីដទៃ (Credit: Getty Images)
ការសម្រេចចិត្ដតែម្នាក់ឯងរបស់លោក Tony Abbott បានធ្វើឲ្យមានប្រតិកម្មខ្លាំងពីបណ្ដាពួកអភិរក្សនិយម និងមិត្ដភក្ដិរបស់នាយករដ្ឋមន្រ្ដី។
លោក Andrew Bolt ដែលជាអ្នកធ្វើអត្ថាធិប្បាយតាមប្រព័ន្ធផ្សព្វផ្សាយ និងជាមិត្ដល្អដែលតែងតែចូលចិត្ដនាយករដ្ឋមន្រ្ដីនោះ ក៏ពេលឥឡូវនេះបានលើកឡើងថា ការសម្រេចចិត្ដរបស់នាយករដ្ឋមន្រ្ដីលើរឿងនេះ គឺជាភាពឆ្កួតលីលាមួយ ហើយអាចជាកត្ដានាំឲ្យលោក Tony Abbott បាត់បង់តួនាទីដឹកនាំ។
លោកនាយករដ្ឋមន្រ្ដីបានទទួលស្គាល់កំហុស ហើយក៏ព្រមទទួលយកនូវការរិះគន់ពីសហការីតំណាងរាស្រ្ដដទៃទៀតក្នុងជួររដ្ឋាភិបាលដែរ។ លោកបានសន្យាថា នឹងធ្វើការពិគ្រោះយោបល់ឲ្យបានច្រើនជាងមុនលើកិច្ចការផ្សេងៗ។
កាលពីម្សិលមិញរដ្ឋមន្រ្ដីក្រសួងអប់រំ រួមជាមួយនឹងរដ្ឋមន្រ្ដីក្រសួងកសិកម្មអូស្រ្ដាលីបាននិយាយថា រឿងនេះកន្លងផុតហើយដូច្នេះមិនគួរនាំគ្នាទុករឿងនេះក្នុងចិត្ដទៀតទេ។
រដ្ឋមន្រ្ដីទាំងពីររូបនេះបានសំដែងឲ្យឃើញនូវទំនុកចិត្ដរបស់ខ្លួនទៅលើការដឹកនាំរបស់នាយករដ្ឋមន្រ្ដីពួកគេ ហើយថារឿងនេះនឹងមិនជាកត្ដាប៉ះពាល់ដល់ប្រជាប្រិយភាពរបស់គណបក្សកាន់អំណាចនៅក្នុងការបោះឆ្នោតជាតិខាងមុខឡើយ៕ប្រភពៈ Radioaustralia
