ផ្លែប៉ោមពីរម៉ាករបស់សហរដ្ឋអាមេរិកសង្ស័យមានផ្ទុកបាក់តេរី
អាជ្ញាធរម៉ាឡេស៊ីបានបញ្ឈប់ការនាំចូលផ្លែប៉ោមពីរម៉ាកពីរដ្ឋកាលីហ្វ័រញ៉ាសហរដ្ឋអាមេរិកដោយសារមានការព្រួយបារម្ភ និងសង្ស័យថា ផ្លែប៉ោមទាំងនោះមានផ្ទុកបាក់តេរីម្យ៉ាងឈ្មោះ Listeriosis ខណៈប្រទេសហ្វីលីពីនក៏បានប្រកាសប្រមូលពីទីផ្សារវិញផងដែរ។
ការប្រកាសផ្អាកការនាំចូលនេះត្រូវបានធ្វើឡើងបន្ទាប់ពីរដ្ឋមន្ត្រីក្រសួងកសិកម្មម៉ាឡេស៊ីលោក Sabri Yaakob បានទទួលសេចក្ដីជូនដំណឹងពីអាជ្ញាធរសហរដ្ឋអាមេរិកថា ប៉ោមស្ថិតនៅក្រោមម៉ាក Gala និង Granny Smith ដែលនាំចេញពីកាលីហ្វ័រញ៉ាត្រូវបានសង្ស័យថា មានផ្ទុកបាក់តេរីប៉ះពាល់ដល់សុខភាព។
អាជ្ញាធរម៉ាឡេស៊ីបានកំណត់ក្រុមហ៊ុននាំចូលផ្លែប៉ោមនេះបានហើយ ហើយបានជូនសេចក្ដីណែនាំឱ្យក្រុមហ៊ុននេះប្រមូលផ្លែប៉ោមពីទីផ្សារមកវិញជាបន្ទាន់។
ដោយឡែក អាជ្ញាធររបស់ប្រទេសសិង្ហបុរីវិញ បានចេញមុខប្រកាសថា ប្រទេសខ្លួនមិនបាននាំចូលផ្លែប៉ោមពីរម៉ាកខាងលើដែលសង្ស័យថាមានផ្ទុកបាក់តេរីនោះទេ ស្របពេលដែលនៅហ្វីលីពីន បានប្រកាសឱ្យក្រុមហ៊ុននាំចូលប្រមូលផ្លែប៉ោមម៉ាកខាងលើពីទីផ្សារមកវិញផងដែរ។
នៅប្រទេសថៃវិញ អាជ្ញាធរបានចាប់បានកប៉ាល់ដឹកប៉ោមពីសហរដ្ឋអាមេរិកដែលប្រមូលផងលកាលពីឆ្នាំ២០១៤ នាំចូលប្រទេសថៃ ហើយកប៉ាល់នោះកំពុងស្ថិតនៅក្នុងការត្រួតពិនិត្យរបស់សមត្ថកិច្ចជំនាញថៃស្រាវជ្រាវរកសារធាតុបាក់តេរី មានផលប៉ះពាល់ដល់សុខភាពអ្នកបរិភោគ៕
ប្រភព៖ http://www.straitstimes.com/
