លាឈប់ពីអាជីពវិស្វករមកបើកអាជីវកម្មផ្ទាល់ខ្លួនរំពឹងថា អាចរកប្រាក់ចំណេញបាន៨ពាន់ដុល្លារក្នុងមួយខែ
អតីតវិស្វករសំណង់វ័យ ៣២ឆ្នាំដែលបានបញ្ចប់ការសិក្សាថ្នាក់បរិញ្ញាបត្រមកពីប្រទេសវៀតណាមបានសម្រេចចិត្តបើកអាជីវកម្មផ្ទាល់ខ្លួន ដោយមើលឃើញពីសក្ដានុពលនៃតម្រូវការរបស់អតិថិជនមានការកើនឡើងនៅឆ្នាំ២០១៥ នេះ។ ការបើកអាជីវកម្មដោយចំណាយដើមទុនរាប់ម៉ឺនដុល្លារនេះ លោករំពឹងថា នឹងអាចរកប្រាក់ចំណេញបាន ៨ពាន់ដុល្លារអាមេរិកក្នុងមួយខែបន្ទាប់ពីរយៈពេល៦ខែដំបូងនៃការដាក់ឱ្យដំណើរការអាជីវកម្មនេះ ។
លោក អ៊ុក ម៉ាឡែន បានក្លាយជាម្ចាស់អាជីវកម្មមួយដ៏ថ្មីសន្លាងនៅក្នុងរាជធានីភ្នំពេញ បន្ទាប់ពីលក់បោះបង់មួយរយៈនូវអាជីពជាវិស្វករសំណង់ធ្វើការនៅតាមក្រុមហ៊ុន មកបើកអាជីវកម្មផ្ទាល់ខ្លួនដោយលោកមានសុទិដ្ឋិនិយមថា អាជីវកម្មថ្មីដែលលោកដាក់ឈ្មោះថា ArtCambo Advertising & Decoration អាចរកប្រាក់ចំណេញបានច្រើនជាងការងារនៅតាមក្រុមហ៊ុន ។
លោក អ៊ុក ម៉ាឡែន មានស្រុកកំណើតនៅខេត្តកណ្ដាល ហើយបានផ្លាស់មកនៅរាជធានីភ្នំពេញបន្ទាប់ពីបានរៀបអាពាហ៍ពិពាហ៍នៅឆ្នាំ២០១១ ។ ក្នុងវ័យសិក្សា លោករៀននៅវិទ្យាល័យជា ស៊ីមព្រែកអញ្ចាញ ក្រោយពីបញ្ចប់សញ្ញាបត្រមធ្យមសិក្សាទុតិយភូមិ លោកបានជាប់អាហារូបករណ៍ទៅសិក្សាថ្នាក់បរិញ្ញាបត្រវិស្វករសំណង់នៅប្រទេសវៀតណាម រយៈពេល៦ឆ្នាំ ហើយបានបញ្ចប់ដោយជោគជ័យនៅឆ្នាំ២០០៩ ។
ការងារដំបូងបង្អស់របស់លោកគឺធ្វើជាវិស្វករសំណង់នៅកំពង់ផែក្រុងព្រះសីហនុ ។ លោកមានប្រសាសន៍ថា៖ «ផ្នែកវិស្វករ ពេលខ្ញុំចូលធ្វើការដំបូងនៅកំពង់សោមបាន ៣៥០ដុល្លារអាមេរិក ដោយយើងមានការផ្គត់ផ្គង់ផ្នែកចំណីអាហារនិងការស្នាក់នៅៗកន្លែងការងារ » ។ ធ្វើការនៅទីនោះបានរយៈពេល៥ ឆ្នាំ លោកបានផ្លាស់មកធ្វើការនៅរាជធានីភ្នំពេញវិញដោយទទួលប្រាក់ខែទ្វេដង។
ការសម្រេចចិត្តបើអាជីវកម្មផ្ទាល់ខ្លួនទាក់ទងទៅនឹងការផ្ដល់សេវាធ្វើស្លាកយីហោ បោះពុម្ព sticker, banner ទាំងខ្នាតធំនិងតូច និងការតំឡើងដេគ័រនៅតាមផ្ទះ ហាង ក្លឹប សណ្ឋាគារជាដើមនេះ បានចំណាយដើមទុនរាប់ម៉ឺនដុល្លារអាមេរិក ក៏ព្រោះតែលោកបានមើលឃើញពីតម្រូវការអត្ថិភាពរបស់អតិថិជននៅពេលធ្វើសមាហរណកម្មសេដ្ឋកិច្ចអាស៊ាននៅចុងឆ្នាំ២០១៥នេះ ។
លោក ម៉ាឡែន មានប្រសាសន៍ដូច្នេះថា៖«តាមពិតទៅយើងឃើញឱកាស! ប្រទេសយើងនៅឆ្នាំ២០១៥ យើងនឹងធ្វើសមាហរណកម្មបញ្ចូលគ្នា អញ្ចឹងយើងឃើញមានក្រុមហ៊ុនបរទេសមួយចំនួនមករកស៊ីនៅស្រុកយើងហើយក្រុមហ៊ុនទាំងអស់សូម្បីតែរកស៊ីតូចតាចក៏គេត្រូវការស្លាកយីហោ ដើម្បីឱ្យគេដឹងថាក្រុមហ៊ុនខ្លួន ឬស្ថាប័នខ្លួនរកស៊ីអី និងឈ្មោះអី ។ នៅពេលយើងធ្វើហើយភ្លាម វាទទួលបានកម្រៃភ្លាមៗ មិនចំណាយពេលយូរ » ។
លោកម៉ាឡែនមិនមានបទពិសោធន៍ធ្វើអាជីវកម្មពីមុនមកទេ ប៉ុន្តែនៅក្នុងការបើកអាជីវកម្មដោយហ៊ានប្រថុយចំណាយទុនរាប់ម៉ឺនដុល្លារនេះ លោកមិនភាពភ័យខ្លាចប្រឈមទៅនឹងភាពបរាជ័យឡើយ ព្រោះថាលោកបានមើលឃើញពីតម្រូវការជាក់ច្បាស់ ហើយមានជំនឿជាក់លើខ្លួនឯងក្នុងការគ្រប់គ្រងអាជីវកម្មប្រភេទនេះ។ លោកថ្លែងដូច្នេះថា ៖«ខ្ញុំមិនធ្លាប់ទេពីមុនមក! ការបើកអាជីវកម្មអ្វីដែលសំខាន់គឺមិនត្រូវមានភ័យខ្លាចហើយជឿជាក់លើកខ្លួនឯង ត្រូវធ្វើយ៉ាងឱ្យអាជីវកម្មមានភាពរឹងមាំខ្លាំងឡើង »។
អាជីវកម្មអាតខេមបូ (ArtCambo) មិនត្រឹមតែមានតម្រូវផ្នែកសេវាកម្មនេះតែប៉ុណ្ណោះទេ ថែមទាំងផ្ដល់ឱកាសការងារសម្រាប់អ្នកមានជំនាញផ្នែកកាន់ម៉ាស៊ីនបោះពុម្ព និងជាងតុទូ តំឡើងដេគ័រថែមទៀតផងដោយបច្ចុប្បន្ននេះArtCamboក៏កំពុងត្រូវការបុគ្គលិកបន្ថែមផងដែរ ។
អាជីវកម្មអាតខេមបូទើបតែបើកមិនទាន់បានរយៈពេល២ខែនៅឡើងនោះទេប៉ុន្តែអាចរកប្រាក់ចំណេញបានច្រើន ។ លោកម៉ាឡែនថ្លែងដូច្នេះថា៖«នៅខែដំបូងយើងចំណេញសុទ្ធបាន៨រយដុល្លារជាង ហើយនៅពាក់កណ្ដាលខែមករាត្រឹមថ្ងៃទី២១នេះខ្ញុំបូកត្រួសៗទៅវាចូល១ពាន់ដុល្លារជាងដែរ ដូច្នេះបន្ទាប់ពីចប់៦ខែដំបូងសន្ទុះយើងនៅក្នុងខែថ្មីអាចរកប្រាក់ចំណេញបាន៨ពាន់ដុល្លារអាមេរិកក្នុងមួយខែ» ។
លោក អ៊ុក ម៉ាឡែន បញ្ជាក់ថែមទៀតថាទោះបីលោកបើកអាជីវកម្មផ្ទាល់ខ្លួនក្ដី ប៉ុន្តែអាជីពជាវិស្វករសំណង់លោកមិនបោះបង់ឡើយ នៅពេលមានតម្រូវការ លោកនៅបន្តអាជីពនេះដដែល៕
អត្ថបទ៖ ចាន់ សុខ នាង
