មេទាហានអាមេរិកចាញ់ល្បិចស្រីស្អាតចិន បញ្ចេញឯកសារសម្ងាត់ប្រាប់គេខ្ទេច! ឥឡូវកំពុងជាប់ពន្ធនាគារ
អតីតបុគ្គលិកជាប់កិច្ចសន្យា (contractor) របស់ក្រសួងការពារជាតិអាមេរិក ត្រូវបានតុលាការផ្ដន្ទាទោសឲ្យជាប់ពន្ធនាគារ ៨៧ ខែ (ជាង ៧ ឆ្នាំ) និងបីឆ្នាំទៀតត្រូវព្យួរ ពីបទបញ្ជូនព័ត៌មានសម្ងាត់ទៅឲ្យស្រីស្នេហ៍របស់លោក ជាជនជាតិចិន អាយុ២៧ ឆ្នាំ។ ខាងក្រោមនេះជាដំណើរដើមទង និងធាតុផ្សំនៃបទល្មើស ដែលនាំឲ្យតុលាការចាប់ពិរុទ្ធបាន។ នេះមិនមែនជាព័ត៌មានទាន់ហេតុការណ៍ទេ ប៉ុន្តែជាបទយកការណ៍។
លោកបឹនចាមឹនបាយសូប (Benjamin Bishop) អាយុ ៥៩ ឆ្នាំ បានធ្វើការនៅក្នុងអង្គភាពចារកម្មប្រចាំរដ្ឋហាវ៉ៃ (Hawaii)។ យោងតាមបទចោទប្រកាន់ លោកបានបញ្ជូនទៅឲ្យសង្សាររបស់លោក នូវព័ត៌មានសម្ងាត់អំពីកម្មវិធីអាវុធបរមាណូរបស់សហរដ្ឋអាមេរិក ក៏ដូចជាផែនការណ៍យុទ្ធសាស្ត្រសង្គ្រាម។ លោក Bishop បានសារភាពទទួលពិរុទ្ធ ហើយបានឲ្យដឹងថាលោកបានបញ្ជូនឯកសារសម្ងាត់ផ្សេងៗ ទៅឲ្យសង្សារដែលជាជនជាតិចិននោះមែន។ លោកនិងនាង មានទំនាក់ទំនងគ្នាស៊ីជម្រៅ (អាចបានខ្លួន បានប្រាណគ្នា)។
លោក Bishop បានស្គាល់គ្នាដំបូងនៅក្នុងសន្និសីទមួយស្ដីពីវិស័យយោធាអន្តរជាតិ។ ចាប់ពីពេលនោះមក អ្នកទាំងពីរបានរក្សាទំនាក់ទំនងនេះជិតស្និទ្ធ ឈានដល់ក្លាយជាសង្សារនឹងគ្នា។ នាងម្នាក់នោះបានទទូចសុំព័ត៌មានសម្ងាត់ផ្នែកយោធារបស់រដ្ឋាភិបាលអាមេរិក រហូតដល់លោកយល់ព្រម ហើយបានបញ្ជូនឯកសារនានាតាមអ៊ីមែល (e-mail)។ យោងតាមពាក្យបណ្ដឹងនោះ នាងដែលជាគូស្នេហ៍លោក Bishop មិនមែនមានវត្តមាននៅក្នុងអង្គសន្និសីទនោះដោយចៃដន្យនោះទេ ប្រាកដជាត្រូវគេរៀបចំទុកមុន ដើម្បីឲ្យអ្នកទាំងពីរបានជួបប្រសព្វគ្នា ហើយបន្តទំនាក់ទំនងគ្នាជាបន្តទៀត។
នៅពេលដែលសកម្មភាពបែបនេះត្រូវបែកការណ៍ លោក Bishop ត្រូវបានចាប់ខ្លួននៅថ្ងៃទី១៨ ខែមីនា ឆ្នាំ២០១៣ នៅឯបញ្ជាការដ្ឋានរបស់កងទ័ពសហរដ្ឋអាមេរិកប្រចាំតំបន់ប៉ាស៊ីហ្វិក នៃរដ្ឋហាវ៉ៃ (Hawaii) ហើយរំលងបានប៉ុន្មានថ្ងៃ លោកត្រូវបាននាំឡើងតុលាការ។ សង្សាររបស់លោកដែលជាជនជាតិចិន មិនត្រូវបានតុលាការប្រកាសសមាសភាព ឬអត្តសញ្ញាណទេ គ្រាន់តែគេដឹងថានាងស្ថិតនៅសហរដ្ឋអាមេរិក និងកាន់ទិដ្ឋាការ (visa) ជានិស្សិតទៅរៀននៅសហរដ្ឋអាមេរិក។
សូមបញ្ជាក់ថាលោក Bishop ជាមន្ត្រីជាប់កិច្ចសន្យាស៊ីវិល។ ក្រៅពីនេះ លោកក៏ធ្លាប់មានឋានន្តរសក្ដិជាវរសេនិយទោ ក្នុងជួរកងទ័ពជើងទឹក ហើយបច្ចុប្បន្ន បានចូលនិវត្ត។ មកទល់នឹងពេលនេះ គេនៅមិនទាន់ដឹងថាមូលហេតុអ្វីបានជានិស្សិតចិន ដែលត្រូវជាសង្សាររបស់លោក Bishop ចង់បានឯកសារពាក់ព័ន្ធនឹងវិស័យការពារជាតិរបស់សហរដ្ឋអាមេរិក យកទៅធ្វើអ្វី? ឬមួយក៏នាងជាភ្នាក់ងារចារកម្ម ដែលរដ្ឋាភិបាលចិនបញ្ជូនឲ្យស៊ើបការណ៍? ក្រសួងយុត្តិធម៌សហរដ្ឋអាមេរិកជឿថាលោក Bishop បានប្រព្រឹត្តល្មើសច្បាប់។ ដោយឡែក ចំពោះសង្សាររបស់លោក គឺក្រសួងមិនបានចោទប្រកាន់តាមផ្លូវតុលាការ ថាបានប្រព្រឹត្តបទល្មើសអ្វីនោះទេ។ ពាក្យបណ្ដឹងដែលប្ដឹងលោក Bishop គ្រាន់តែគូសបង្ហាញថា «ទង្វើរបស់នារីម្នាក់នោះ គឺចូលលក្ខណៈចារកម្មហើយ»៕
សង្សារលោក Bishop ដែលហៅក្រៅថានាងលីលី (Lily)
ប្រែសម្រួល ៖ អន សំអាង
ប្រភព៖ dailymail.co.uk - cbsnews.com
