ពេញមួយឆ្នាំ២០១៤ ស្មាតហ្វូន Android លក់ដាច់ជិត ១,៣ពាន់លានគ្រឿងខ្លាំងជាង iPhone ៥ដង
Android ឈ្នះ iOS និង Windows Phone នៅឆ្នាំ២០១៤ប្រភព៖ getanswer
របាយការណ៍ចេញដោយក្រុមហ៊ុនវិភាគ និងស្រាវជ្រាវចំណែកទីផ្សារ Strategy Analytics ឱ្យដឹងមកថា ក្នុងឆ្នាំ២០១៤ ស្មាតហ្វូន Android ក្ដោបក្ដាប់បានចំណែកទីផ្សារពិភពលោកច្រើនជាងគេ ក្នុងចំណោមទូរស័ព្ទ iPhone និងទូរស័ព្ទប្រើ Windows Phone ទាំងអស់។
ស្មាតហ្វូន Android លក់ដាច់រហូតដល់ទៅ ១,០៤២ពាន់លានគ្រឿង ខណៈដែល iPhone ដាច់បាន ១៩២,៧លានគ្រឿង ហើយទូរស័ព្ទប្រើ Windows Phone ដាច់បាន ៣៨,៨លានគ្រឿង។
របាយការណ៍ Strategy Analytics បង្ហាញឱ្យឃើញថា ក្នុងឆ្នាំ២០១៤ ការចែកចាយទូរស័ព្ទ Smartphone សរុបមាន ១,២៨៣ពាន់លានគ្រឿង កើនឡើងប្រហែល ៣០% ប្រៀបធៀបនឹងឆ្នាំ២០១៣។ ក្នុងនោះចំណែកទីផ្សារស្មាតហ្វូន Android ក៏មានការកើនឡើងផងដែរ គឺកើនពី ៧៩% ក្នុងឆ្នាំ២០១៣ ឡើងដល់ ៨១% ក្នុងឆ្នាំ២០១៤។
ប្រព័ន្ធប្រតិបត្តិការ iOS របស់ Apple ជាប់បានលេខ២ លើការចែកចាយ iPhone សរុបបាន ១៩២,៧លានគ្រឿងក្នុងឆ្នាំ២០១៤ កើនឡើងពី ១៥៣,៤លានគ្រឿងធៀបនឹងឆ្នាំចាស់។ បើគិតជាភាគរយ iOS ក្ដាប់បាន ១៥% ថយចុះបន្តិចធៀបនឹងឆ្នាំចាស់ដែលមាន ១៥,៥% (រូបក្រាប)។ ចំណែកស្មាតហ្វូនដំណើរការដោយ Windows Phone កាលពីឆ្នាំ២០១៤ លក់ដាច់បាន ៣៨,៨លានគ្រឿងកើនឡើងពី ៣៥,៨លានគ្រឿងដែលលក់បានឆ្នាំ២០១៣ និងគិតជាភាគរយបាន ៣% ថយចុះពី ៣,៦% ធៀបនឹងឆ្នាំចាស់៕
ប្រែសម្រួល៖ លី ឈៀន
ប្រភព៖ techspot
