គ្រួសារមានជម្លោះដីធ្លីជាមួយក្រុមហ៊ុន ឃុន សៀរ សុំជួបឧកញ៉ាផ្ទាល់
ភ្នំពេញៈ ជនជាប់ចោទស្ថិតឃុំក្នុងពន្ធនាគារព្រៃសពីរនាក់ ជាឪពុកនិងកូនស្រី រងបណ្តឹងពីក្រុមហ៊ុន ឃុន សៀរ ទាក់ទងនឹងជម្លោះផ្ទះសម្បែង ត្រូវបាននាំមកកាន់តុលាការសាកសួរបន្ថែម ហើយទាមទារសុំជួបតទល់ជាមួយឧកញ៉ា ឃុន សៀរ ជាម្ចាស់ពាក្យបណ្តឹងដែលបានអវត្តមានកាលពីម្សិលមិញ។
លោក ជូង ជូងី មេធាវីលោក លី ស៊្រាខេង និងកូនស្រី លី ស៊ាវមិញ បានឲ្យដឹងថា ចៅក្រមស៊ើបសួរ លោក លី លីបម៉េង បានកោះហៅភាគីបណ្តឹងទាំងសងខាង មកសាកសួរតទល់មុខគ្នា នៅសាលាដំបូងរាជធានីភ្នំពេញ ដោយដើមបណ្តឹងជាឧកញ៉ា ឃុន សៀរ និងចុងចោទជាកូនក្តីលោក ប៉ុន្តែមិនបានឃើញឧកញ៉ារូបនោះមកទេ ដោយលេចវត្តមានលោក មេធាវី ណាច ទ្រី មកជំនួស។
លោកថា៖ «កូនក្តីខ្ញុំទាមទារឲ្យដើមបណ្តឹងលោកឧកញ៉ា ឃុន សៀរ មកតទល់នៅតុលាការ ព្រោះគាត់ជាដើមបណ្តឹងលើរឿងក្តីនេះ។ ខ្ញុំបានបដិសេធលើដំណើរការនៃនីតិវិធីមួយនេះ»។
លោក លី លីបម៉េង ចៅក្រមស៊ើបសួរមិនបាននិយាយពីនីតិវិធីហៅដើមបណ្តឹងផ្ទាល់មកសាកសួរទេ។
លោកថ្លែងថា លោកបានកោះហៅភាគីទាំងពីរមកសាកសួរតទល់គ្នា លើបទចោទប្រើហិង្សាលើអ្នកកាន់កាប់អចលនវត្ថុដោយស្របច្បាប់ តាមមាត្រា ២៥៣ នៃច្បាប់ភូមិបាល ហើយឧកញ៉ា ឃុន សៀរ បានទាមទារសំណង ៥០០០ ដុល្លារក្នុងបណ្តឹង។ លោកនិយាយថា៖ «យើងនៅមិនទាន់បញ្ចប់ការស៊ើបអង្កេតនៅឡើយទេ»។
លោក លី ស្រ៊ាខេង និងកូនស្រី លី ស៊ាវមិញ ត្រូវចាប់ខ្លួននៅថ្ងៃ ទី១៨ ខែវិច្ឆិកា ជាក្រុមគ្រួសារដែលធ្លាប់រងការបោះពស់ចូលផ្ទះ ប៉ងដុតផ្ទះ បំពុលសត្វ និងរងការប្រើហិង្សាពីសំណាក់ ក្រុមយុវជនមិនស្គាល់ មុខដែលពួកគេគិតថា ជាការប៉ុនប៉ងឲ្យពួកគេចេញពីដីដែលរស់នៅជាង ៣០ ឆ្នាំមកហើយ។
ម្តាយនិងកូនប្រុស បានកំពុងរស់នៅគេចខ្លួនពីការតាមចាប់តាំងពីពេលចាប់ប្តីនិងកូនស្រីមក ហើយក្រុមគ្រួសារនេះបានដាក់តម្លៃលក់ផ្ទះពួកគេនៅ សង្កាត់បឹងកក់១ ខណ្ឌទួលគោក ដែលក្រុមហ៊ុន ឃុន សៀរ ចង់បានក្នុងតម្លៃ ២៥ ម៉ឺនដុល្លារ ប៉ុន្តែក្រុមហ៊ុន ហ៊ានឲ្យត្រឹមក្រោម ១០ ម៉ឺនដុល្លារប៉ុណ្ណោះ។
អ្នកស្រី លោ តេរេសា ជាក្មួយស្រីលោក លី ស៊្រាខេង ដែលបានមកតុលាការម្សិលមិញ បាននិយាយប្រាប់អ្នកកាសែតថា មិនដែលមានជំនួបផ្ទាល់មាត់ ជាមួយលោក ឧកញ៉ា ឃុន សៀរ ជាមួយក្រុមគ្រួសារនេះឡើយ ហើយមានតែកូនចៅរបស់ឧកញ៉ា ធ្វើឲ្យក្រុមគ្រួសារនេះ មិនដឹងថា តើក្រុមហ៊ុននឹងផ្តល់តម្លៃប៉ុន្មានដល់ផ្ទះពួកគេ ប៉ុន្តែមានឧកញ៉ាម្នាក់ផ្សេងទៀត ឈ្មោះ ប៉ែន លឹម បានឲ្យកូនចៅទៅជួបលោក ស៊្រា ខេង នៅពន្ធនាគារដោយសន្យាផ្តល់ដី ៥០ ហិកតា និងលុយ ៥ ម៉ឺនដុល្លារដល់គ្រួសារនេះ។
អ្នកស្រីថា៖ «តើឲ្យពួកគាត់យកដីហ្នឹងធ្វើអី បើនៅដល់កំពង់ធំ គាត់មិនយកទេ ហើយមិនមែនឧកញ៉ា ឃុន សៀរ ចេញមុខផ្ទាល់ទៀត។ យើងសុំតែដោះលែងដើម្បីឲ្យគាត់បានជួបគ្រួសារ។ ផ្ទះគាត់រស់នៅតាំងពីកូនមិនទាន់កើត ឥឡូវកូនទាំងពីរធំហើយ។ ផ្ទះហ្នឹងថ្លៃជាង ១ លានដុល្លារ តែគាត់សុំតែ ២៥ ម៉ឺនដុល្លារប៉ុណ្ណោះ»។
តំណាងក្រុមហ៊ុនលោក យឹម លាង មិនអាចសុំការបំភ្លឺបានទេ កាលពីម្សិលមិញ។ លោកមេធាវី ជូង ជូងី ឲ្យដឹងថា កាលពីថ្ងៃ ទី២៨ វិច្ឆិកា លោកបានដាក់ពាក្យស្នើឲ្យតុលាការពិចារណាលើករណីសុំនៅក្រៅឃុំរបស់កូនក្តីទាំងពីរនាក់របស់ខ្លួន៕
ប្រភពពី ភ្នំពេញប៉ុស្តិ៍
