អ្នកទិញផ្ទះបុរី ៩៩៩ កំពុងបារម្ភ
ភ្នំពេញៈ សកម្មភាពសាងសង់នៅតាមការដ្ឋានបុរី ៩៩៩ មួយចំនួននៅភ្នំពេញមិនសូវជាមានសកម្មភាព ហើយការដ្ឋានដែលជាគម្រោងធំរបស់ក្រុមហ៊ុននៅជិតមន្ទីរពេទ្យរុស្ស៊ី កាលពីថ្ងៃម្សិលមិញ ផ្អាកដំណើរការទាំងស្រុង ខណៈអាជ្ញាធរកំពុងតាមចាប់ខ្លួនម្ចាស់ក្រុមហ៊ុន គឺលោក ថោង សារ៉ាត់ ដែលពាក់ព័ន្ធនឹងអំពើឃាតកម្ម។
មកដល់ពេលនេះអតិថិជនដែលបានទិញផ្ទះនៅបុរី ៩៩៩ លើកឡើងពីការបារម្ភអំពីស្ថានភាពរបស់ក្រុមហ៊ុនមួយនេះ។
លោក ថោង សារ៉ាត់ ដែលត្រូវនគរបាលក្រុងភ្នំពេញចោទថា ជាជនមេខ្លោងនៅពីក្រោយអំពើឃាតកម្មលើ ឧកញ៉ា អ៊ឹង ម៉េងជឺ កំពុងរត់គេចខ្លួន។
អតិថិជនម្នាក់ដែលបានទិញបន្ទប់ខុនដូមួយ យូនីត នៅក្នុងគម្រោងអភិវឌ្ឍន៍លំនៅឋានរបស់ក្រុមហ៊ុនមានជ័យ ៩៩៩ ស្ថិតតាមបណ្តោយផ្លូវលេខ ៥៩២ ជិតវិទ្យាល័យឥន្ទ្រទេវី បាននិយាយសុំមិនបញ្ចេញឈ្មោះថា លោកមានការព្រួយបារម្ភយ៉ាងខ្លាំងនៅពេលលោកបានដឹងថា លោក ថោង សារ៉ាត់ ដែលជាប្រធានក្រុមហ៊ុនបុរី ៩៩៩ ត្រូវបានសមត្ថកិច្ចកំពុងតាមចាប់ខ្លួន។
លោកបានបន្តថា លោកបានទិញបន្ទប់១នៅក្នុងគម្រោងខាងលើក្នុងតម្លៃជាង ៣០ ០០០ ដុល្លារអាមេរិកតាមរយៈការបង់រំលស់ ដោយរហូតមកដល់ពេលនេះ លោកបានបង់ប្រាក់ទៅឲ្យក្រុមហ៊ុនជាង ១០ ០០០ ដុល្លារហើយ។
លោកបន្តថា៖ «ខ្ញុំកំពុងព្រួយបារម្ភ ព្រោះខ្ញុំបានឮគេប្រាប់ថា ចាប់តាំងពីថ្ងៃត្រង់មក (ថ្ងៃព្រហស្បតិ៍) សកម្មភាពរបស់កម្មករនៅការដ្ឋានខុនដូដែលខ្ញុំបានទិញមានភាពស្ងប់ស្ងាត់មិនមានធ្វើអ្វីនោះទេ ខណៈកាលពីព្រឹកកម្មករធ្វើការធម្មតា»។ ខ្ញុំសង្ឃឹមថា ក្រុមហ៊ុននឹងធ្វើការសាងសង់បញ្ចប់គម្រោងរបស់ខ្លួនទៅតាមកិច្ចសន្យា»។
អតិថិជនរូបនេះអះអាងថា ជារៀងរាល់ចុងខែលោកត្រូវបង់ប្រាក់ទៅឲ្យក្រុមហ៊ុនជាង ៦០០ ដុល្លារ ហើយសម្រាប់ការបង់ប្រាក់ខែនេះលោកមិនទាន់ដឹងថា នឹងត្រូវធ្វើដូចម្តេចនោះទេ ដោយត្រូវរង់ចាំមើលថា តើការសាងសង់របស់ក្រុមហ៊ុននឹងបន្ត ឬយ៉ាងណា?
អ្នកទិញវីឡាមួយរូបផ្សេងទៀតនៅតាមបណ្ដោយមហាវិថីសហព័ន្ធ រុស្ស៊ី ពីក្រុមហ៊ុននេះដែលកំពុងរស់នៅទីនោះចាប់តាំងពីខែ តុលា បានឲ្យដឹងថា អ្នកស្រីកំពុងរង់ចាំមើលអ្វីនឹងកើតឡើង។
អ្នកស្រីថ្លែងថា៖ «អតិថិជនភាគច្រើនដែលបានទិញវីឡានៅទីនេះជាអ្នកមានមុខមាត់ ខ្ញុំគិតថា នឹងមិនមានបញ្ហាជាមួយពួកយើងទេ។ ប៉ុន្តែយើងនៅតែរង់ចាំមើលទន្ទឹមនឹងម្ចាស់កំពុងជាប់ពាក់ព័ន្ធនឹងអំពើឃាតកម្ម»។
ភ្នាក់ងារលក់របស់ក្រុមហ៊ុនបានប្រាប់ភ្នំពេញប៉ុស្ដិ៍កាលពីថ្ងៃ ព្រហស្បតិ៍ ក្នុងលក្ខខណ្ឌមិនបញ្ចេញឈ្មោះថា ក្រុមហ៊ុនកំពុងប្រតិបត្តិការជាធម្មតា និងនៅតែទទួលការបង់ប្រាក់ពីអតិថិជនជាប្រក្រតី។ ប៉ុន្តែអ្នកស្រីបន្តថា មានអតិថិជនខ្លះស្នើសុំពន្យារពេលបង់ប្រាក់៖ «បើអ្នកទិញមិនបង់ប្រាក់ឲ្យពួកយើង គម្រោងសាងសង់នេះនឹងមានដំណើរការយឺត។ បញ្ហា ការចាប់ខ្លួនគឺជារឿងបុគ្គល វាមិនមែនជាបញ្ហារបស់ក្រុមហ៊ុននោះទេ»។
លោក ប៉ូ អ៊ាវគង់ អគ្គនាយកអចលនទ្រព្យអាស៊ី ជាភ្នាក់ងារអចលនទ្រព្យដែលបានជួបជាមួយអតិថិជនរបស់បុរី ៩៩៩ លើកឡើងពីការបារម្ភច្រើនអំពីបញ្ហាថ្មីៗនេះ។
លោកបន្តថា៖ «នឹងមានផលប៉ះពាល់លើទំនុកចិត្តរបស់អតិថិជន»។
លោកលើកឡើងថា ប៉ុន្តែអតិថិជនមិនគួរបារម្ភទេបើក្រុមហ៊ុននេះគោរពតាមច្បាប់ដែលតម្រូវឲ្យដាក់ប្រាក់កក់នៅធនាគារជាតិនៃកម្ពុជាសម្រាប់គម្រោងអភិវឌ្ឍន៍ណាមួយនោះ។
ប្រកាសចេញកាលពីខែកក្កដា ឆ្នាំ២០០៨ តម្រូវឲ្យក្រុមហ៊ុនអភិវឌ្ឍន៍ត្រូវដាក់ប្រាក់កក់២ភាគរយនៃថវិកាគម្រោងរបស់ពួកគេនៅធនាគារកណ្ដាល។
មូលនិធិនេះមានបំណងដើម្បីសងទៅដល់អ្នកទិញប្រសិនបើគម្រោងការដួលរលំ។
បច្ចុប្បន្នក្រុមហ៊ុនអភិវឌ្ឍន៍លំនៅឋានមានជ័យ ៩៩៩ កំពុងដាក់លក់លំនៅឋានចំនួន ១២ គម្រោងនៅលើទីផ្សារ ដោយគម្រោងមួយចំនួនជាសំណង់ផ្ទះ ល្វែង-វីឡា និងមួយចំនួនទៀតជាអគារស្នាក់នៅរួមខុនដូ។ គម្រោងដែលកំពុងដំណើរការសាងសង់នាពេលនេះ រួមមានដូចជា ខុនដូ ស្ថិតនៅតំបន់ស្ទឹងមានជ័យ បឹងត្របែក និងទួលគោកជាដើម៕PB
____________________
ប្រភពព័ត៌មានពី៖ ខ្មែរប៉ុស្តិ៍
ប្រភពព័ត៌មានពី៖ ខ្មែរប៉ុស្តិ៍
