បញ្ជូនខ្លួនស្រីស្រស់ដៃឆើតបន្លំលួចទូរស័ព្ទអ្នកលក់ទៅតុលាការ
ភ្នំពេញ ៖ កាលពីព្រឹកថ្ងៃទី៤ ខែធ្នូ ឆ្នាំ២០១៤ម្សិលមិញ មន្ដ្រីនគរបាល ព្រហ្មទណ្ឌខណ្ឌ៧មករាបានបញ្ជូនខ្លួនជន សង្ស័យជានារីម្នាក់ដែលមានរូបសម្ពស្ស សោភាដៃឆើតបន្លំយកទូរស័ព្ទរបស់អ្នកលក់នៅក្នុងផ្សារស៊ីធីម៉លជាន់ផ្ទាល់ដី ទៅកាន់សាលាដំបូងរាជធានីភ្នំពេញ ដើម្បីចាត់វិធានការតាមច្បាប់ ។
ជនសង្ស័យដែលត្រូវបញ្ជូនខ្លួនទៅ សាលាដំបូងខាងលើនេះឈ្មោះណន ស្រីពេជ្រ អាយុ២១ឆ្នាំ មានមុខរបរនិង ទីកន្លែងស្នាក់នៅមិនពិតប្រាកដ ។
បើតាមការបញ្ជាក់ឱ្យដឹងពីសមត្ថ កិច្ចបានឱ្យដឹងថា ជនសង្ស័យខាងលើនេះ ត្រូវបានប្រជាពលរដ្ឋនាំគ្នាព្រួតវ៉ៃ និង ឃាត់ខ្លួនបញ្ជូនឱ្យសមត្ថកិច្ច កាលពីវេលាម៉ោង១០ព្រឹក ថ្ងៃទី២ ខែធ្នូ ឆ្នាំ២០១៤ ឋិតនៅក្នុងផ្សារស៊ីធីម៉លជាន់ ផ្ទាល់ដី ស្ថិតនៅក្នុងសង្កាត់វាលវង់ ខណ្ឌ ៧មករា ។
សមត្ថកិច្ចបានបន្ដទៀតថា នៅមុន ពេលកើតហេតុ ជនសង្ស័យរូបនេះបាន ប្រើល្បិចធ្វើសកម្មភាពដើរមកធ្វើជារក ទិញទូរស័ព្ទដៃពីអ្នកលក់នៅជាន់ផ្ទាល់ដី នៃផ្សារស៊ីធីម៉ល ហើយក៏ឆ្លៀតឱកាស បន្លំលួចយកទូរស័ព្ទដៃពីអ្នកលក់ ហើយ ដើរគេចខ្លួន តែត្រូវបានម្ចាស់អ្នកលក់ ទូរស័ព្ទឃើញទាន់ ក៏តាមឃាត់ខ្លួនបាន ហើយក៏បង្កឱ្យមានភាពភ្ញាក់ផ្អើលដល់ ប្រជាពលរដ្ឋនៅក្បែរនោះ ចាប់បាននាំ គ្នាព្រួតវ៉ៃនិងទាត់ធាក់ទៅលើជនសង្ស័យ តែម្ដង ទើបយកទៅប្រគល់ឱ្យសមត្ថកិច្ច ដើម្បីចាត់វិធានការតាមច្បាប់ ៕
- ___________
- ប្រភពពីនគរវត្ត
