មន្ត្រីប៉េអឹមផ្ទៃប្រទេស: បើករថយន្តបុកអ្នកគ្រូក្រមុំជិតចូលរោងការម្នាក់ ស្លាប់
បាត់ដំបង៖ អ្នកគ្រូបង្រៀនវិទ្យាល័យអាយុ២៤ឆ្នាំម្នាក់ ដែលត្រៀមចូលរោងការ បានស្លាប់ភ្លាមៗក្នុងថ្លុកឈាម ដោយសាររថយន្តរបស់មន្ត្រីប៉េអឹមផ្ទៃប្រទេសមួយគ្រឿងបានបុកពីក្រោយ ខណៈពេលអ្នកគ្រូរូបនោះ កំពុងជិះម៉ូតូតែម្នាក់ឯងនៅលើផ្លូវមួយ ក្នុងស្រុកបវេល ខេត្តបាត់ដំបង។
ហេតុការណ៍បង្កឲ្យមានការភ្ញាក់ផ្អើលនេះ បានកើតឡើងនៅវេលាម៉ោង៤និង១០នាទីល្ងាចថ្ងៃទី០៣ ខែធ្នូ ឆ្នាំ២០១៤ នៅលើផ្លូវជាតិខាងត្បូងផ្សារបវេលចម្ងាយ៦០០ម៉ែត្រ ផ្លូវបំបែកទៅក្តុលតាហែន ស្ថិតក្នុងភូមិដាច់ព្រ័ត ឃុំបវេល ស្រុកបវេល ខេត្តបាត់ដំបង។
តាមប្រភពព័ត៌មានដែលទទួលបានពីកន្លែងកើតហេតុជនរងគ្រោះឈ្មោះ វ៉ាន់ ចាន់ថន ភេទស្រី អាយុ២២ឆ្នាំ ជាគ្រូបង្រៀនភាសាអង់គ្លេស មានទីលំនៅស្រុកថ្មគោល ខេត្តបាត់ដំបង ហើយជិតចូលរោងការនៅតែប៉ុន្មានខែខាងមុខនេះប៉ុណ្ណោះ នេះបើតាមស្តីគូដណ្តឹងដែលបានទៅទទួលយកសពនារីរងគ្រោះទាំងទឹកភ្នែកក្នុងក្តីអាឡោះអាល័យជាពន់ពេក។
ប្រភពដដែលបានបន្តថា មុនពេលកើតហេតុ គេឃើញរថយន្តកាំមរីពាក់ស្លាកលេខភ្នំពេញ២A-៤៤០៦ ដែលជារបស់មន្ត្រី កងរាជអាវុធហត្ថលើផ្ទៃប្រទេសឈ្មោះ អាន បាន អាយុ៤៧ឆ្នាំ បានបើកគ្នាក្នុងទិសដៅពីត្បូងទៅជើង ពេលដល់ចំណុចកើតហេតុខាងត្បូងផ្សារបវេលចម្ងាយ៦០០ម៉ែត្រ ផ្លូវបំបែកទៅក្តុលតាហែន ស្ថិតក្នុងភូមិដាច់ព្រ័ត ឃុំបវេល ស្រុកបវេល រថយន្តកាមារី បានបើកទៅបុកម៉ូតូហុងដា របស់អ្នកគ្រូពីក្រោយ បណ្តាលឲ្យនារីជាអ្នកបើកបរម៉ូតូខ្ទាតចេញពីម៉ូតូជាច្រើនម៉ែត្រទៅលើចិញ្ចើមថ្នល់បណ្តាលស្លាប់ភ្លាមៗមួយរំពេជ។រថយន្តបានបុកម៉ូតូអូសជាច្រើនរួចជ្រុលទៅបុកបង្គោលភ្លើងក្រឡាប់២ទៅបីត្រឡប់។បុរស២នាក់ដែលស្ថិតក្នុងរថយន្ត ក្នុងនោះរួមមានមន្ត្រីប៉េអឹមឈ្មោះ អាន បាន ផងដែរនោះ បានរងរបួសនិងត្រូវបានគេបញ្ជូនទៅមន្ទីរពេទ្យ។ បុរសម្នាក់ទៀតដែលជាអ្នកបើករថយន្ត និងរងគ្រោះនាពេលនោះផងដែរឈ្មោះ លឹម សៀង អាយុ៣៥ឆ្នាំ។ បុរសរងគ្រោះទាំង២ រស់នៅក្នុងឃុំក្តុលតាហែន ស្រុកបវេល ខេត្តបាត់ដំបង។
ក្រោយកើតហេតុសមត្ថកិច្ចមូលដ្ឋានបានសហការជាមួយជំនាញចុះធ្វើអន្ដរាគមន៍ វាស់វែងនិងយករថយន្ដនិងម៉ូតូជនរងគ្រោះទៅរក្សាទុកនៅទុកធអិការដ្ឋាននគបាលស្រុកបវេល ដើម្បីរង់ចាំដោះស្រាយនៅពេលក្រោយ។ចំណែកសាកសពជនរងគ្រោះត្រូវបានក្រុមគ្រួសារចាត់ចែងយកទៅធ្វើបុណ្យតាមប្រពៃណី៕
នារីរងគ្រោះស្លាប់នៅនឹងកន្លែងកើតហេតុ
ប្រភពពី Free Press Magazine
