រដ្ឋសភាគ្រោងកោះហៅលោក ខៀវ កាញារីទ្ធ សាកសួរពីការផ្សព្វផ្សាយគ្រឿងស្រវឹង
មន្ត្រីជាន់ខ្ពស់នៃរដ្ឋសភានៅថ្ងៃព្រហស្បតិ៍នេះ ឲ្យដឹងថាគណៈកម្មការទី៥នៃរដ្ឋសភានឹងកោះហៅរដ្ឋមន្ត្រីក្រសួងព័ត៌មាន លោក ខៀវ កាញារីទ្ធ មកសាកសួរទាក់ទងនឹងការដែលបណ្តាញទូរទស្សន៍ និងវិទ្យុនៅតែបន្តផ្សព្វផ្សាយគ្រឿងស្រវឹង ។
ក្នុងសន្និសីទព័ត៌មានប្រចាំខែនៅវិមានរដ្ឋសភា នៅព្រឹកថ្ងៃទី១២ ខែធ្នូនេះ ប្រធានគណៈកម្មការកិច្ចការបរទេស លោក ឈាង វុន ថ្លែងថាលោកនឹងអញ្ជើញរដ្ឋមន្ត្រីក្រសួងព័ត៌មាន មកសាកសួរពាក់ព័ន្ធការផ្សព្វផ្សាយគ្រឿងស្រវឹង ដោយលោកនឹងស្នើឲ្យលោក ខៀវ កាញារីទ្ធ ពិចារណាឡើងវិញក្នុងការបើកឲ្យមានការផ្សព្វផ្សាយគ្រឿងស្រវឹងជាច្រើន លើប្រព័ន្ធផ្សព្វផ្សាយបែបនេះ ។ លោកថា «អស្ចារ្យផ្សាយស្រាបៀរ ខ្ញុំអង្គុយ១០នាទីនៅមុខទូរទស្សន៍មួយ ផ្សាយស្រាហ្នឹងមិនតិចជាង៨នាទីទេ កម្មវិធី១០នាទី ផ្សាយស្រាប្រហែល៨នាទី ខ្ញុំអង្គុយវាស់ ស្រាហ្នឹង៨នាទី ធ្ងន់ធ្ងរមែនទែន ខ្ញុំយល់ហើយនេះជាចំណូលរបស់ប្រព័ន្ធផ្សព្វផ្សាយ ប៉ុន្តែចំណូលរបស់យើងឲ្យគិតពីសេចក្តីស្លាប់របស់អ្នកផ្សេង» ។
ទោះជាយ៉ាងណា លោកមិនទាន់កំណត់ពេលវេលាជាក់ណាមួយក្នុងការកោះហៅនេះនៅឡើយទេ ។ ប៉ុន្តែលោកស្នើឲ្យស្ថានីយទូរទស្សន៍កាត់បន្ថយការផ្សព្វផ្សាយគ្រឿង ស្រវឹង ហើយប្រជាពលរដ្ឋរួមគ្នាកាត់បន្ថយការសេពគ្រឿងស្រវឹង ។
ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព លោក យង់ គិមអេង យល់ថាជារឿងល្អដែលមន្ត្រីនៃរដ្ឋសភា ចេះបារម្ភពីបញ្ហាសុខភាពរបស់ប្រជាពលរដ្ឋ និងជាការពញ្ញាក់ស្មារតីថា រដ្ឋសភាកំពុងឃ្លាំមើលពីការអនុវត្តច្បាប់ ។ ប៉ុន្តែលោកថា រដ្ឋាភិបាលគួរតែមិនឲ្យមានការផ្សាយគ្រឿងស្រវឹងតែម្តង។ លោកបញ្ជាក់ថា «ការផ្សាយហ្នឹង ជាពិសេសយើងឃើញ សកម្មភាពផឹកស៊ីនៅប្រទេសផ្សេងៗគេមិនដែលផ្សាយទេ ប៉ុន្តែប្រទេសកម្ពុជាយើងផ្សាយពេញទឹកពេញដី ។ ហើយម្យ៉ាងវិញទៀត រូបភាពនៃការផ្សាយទៀតសោត មិនត្រឹមតែដើម្បីលើកទឹកចិត្តផឹកស្រាទេ ប៉ុន្តែហាក់បីដូចជាលើកកំពស់គ្រឿងស្រវឹងខ្ពស់ហួសហេតុ រហូតដល់មានកាន់ដបស្រាហោះកាត់វិមានឯករាជ្យទៅទៀត» ។
លោក យង់ គិមអេង បន្ថែមថាការផ្សព្វផ្សាយគ្រឿងស្រវឹង បានជះឥទ្ធិពលយ៉ាងខ្លាំងដល់សង្គម ដែលធ្វើឲ្យយុវវ័យសេពគ្រឿងស្រវឹង និងជាចំណែកមួយបង្កឲ្យមានគ្រោះថ្នាក់ចរាចរណ៍ ។
VOD មិនអាចទាក់ទងរដ្ឋមន្ត្រីក្រសួងព័ត៌មានលោក ខៀវ កាញារីទ្ធ បាននៅឡើយទេ ។
ប៉ុន្តែក្រសួងព័ត៌មាន កាលពីថ្ងៃទី១ ខែតុលា ណែនាំថាចាប់ពីថ្ងៃទី១ ខែមករា ឆ្នាំ២០១៥ នៅរាល់ម៉ោង៦ដល់ម៉ោង៨យប់ គឺពុំអនុញ្ញាតឲ្យផ្សាយពាណិជ្ជកម្មគ្រឿងស្រវឹងជាដាច់ខាត ទោះជាការផ្សាយពាណិជ្ជកម្មគ្រឿងស្រវឹងនោះភ្ជាប់ជាមួយកម្មវិធី ព័ត៌មាន ការប្រគុំតន្ត្រី ការប្រកួតកីឡា ការកម្សាន្តបទចម្រៀងខារ៉ាអូខេ ដែលឧបត្ថម្ភដោយក្រុមហ៊ុនផលិត ឬចែកចាយគ្រឿងស្រវឹងក៏ដោយ ។
ចំណែកសេចក្តីព្រាងច្បាប់ថ្មី ស្តីពីចរាចរណ៍ផ្លូវគោកដែលរដ្ឋសភាអនុម័ត នាពេលថ្មីៗបានដំឡើងការពិន័យជាប្រាក់ចាប់ពី៨០០ ០០០រៀល ដល់៤ ០០០ ០០០រៀល សម្រាប់អ្នកបើកបរដែលមានជាតិស្រវឹង ៕ ប្រភពៈ VOD
