បុគ្គលិកចំការអំពៅជនជាតិចិន បើកឡានក្រឡាប់ចូលទឹកស្រះ លង់ស្លាប់ទាំង ៣នាក់
ខេត្តព្រះវិហារ ៖ គ្រោះថ្នាក់ចរាចរមួយ បានកើតទ្បើង នៅចំណុចផ្លូវកោង ចូលទៅចំការអំពៅ កាលពីវេលាម៉ោង ១រសៀល ថ្ងៃទី០៨ ខែវិច្ឆិកា ឆ្នាំ២០១៤ ស្ថិតនៅភូមិពោធិ៍ទាប ឃុំម្លូរព្រៃ២ ស្រុកឆែប ជាប់ព្រំប្រទល់ ស្រុកត្បែងមានជ័យខេត្តព្រះវិហារ បណ្តាលអោយជនជាតិចិន ៣នាក់ ជាបុគ្គលិកក្រុមហ៊ុនចំការអំពៅ បានស្លាប់បាត់បង់ជីវិត ដោយសារក្រឡាប់រថយន្ដ ចូលស្រះទឹកជ្រៅ ហើយសមត្ថកិច្ច ដែលបានចូលរួម ចុះទៅអង្កេតដល់កន្លែងកើតហេតុ បានអោយដឹងថា គ្រោះថ្នាក់ចរាចរដ៏អាក្រក់នេះ បណ្ដាលមកពី តៃកុងរថយន្ដ មានការធ្វេសប្រហែសបើកបរក្នុងល្បឿនលឿន នៅចំណុចផ្លូវកោងខ្លាំង។
គ្រោះថ្នាក់នេះ បណ្តាលអោយអ្នកជិះ ក្នុងរថយន្ដចំនួន ៣នាក់ លង់ទឹកស្លាប់ទាំងអស់គ្នា ដោយសារនៅដាច់ឆ្ងាយពីភូមិ គ្មានអ្នកណាជួយសង្គ្រោះ ទាន់ពេលវេលា។ សពជនជាតិចិនទាំង ៣នាក់ ត្រូវបានដឹកតាមរថយន្ដបែន យកមកតម្កល់ទុក នៅវត្តប្រាសាទគោកបេង ក្នុងសង្កាត់កំពង់ប្រណាក ក្រុងព្រះវិហារ កាលពីវេលាម៉ោង ៤រសៀលថ្ងៃទី០៨ ខែវិច្ឆិកា ឆ្នាំ២០១៤ ហើយបន្ទាប់មក នៅថ្ងៃដដែល មានជនជាតិចិន ១ក្រុម ជាបុគ្គលិកក្រុមហ៊ុន ចំការអំពៅ រួមទាំងអ្នកបកប្រែភាសាចិនម្នាក់ បាននាំគ្នាមក ពិនិត្យមើលសាកសព ហើយបានចាក់ថ្នាំបារ៉ត និងក្លាសេទឹកកកកុំអោយ សាកសពស្អុយរលួយ។
តាមសំដីអ្នកបកប្រែភាសាចិន បាននិយាយថា គ្រោះថ្នាក់ក្រឡាប់រថយន្ដ ចូលក្នុងស្រះទឹកនេះ មកពីស្ដ្រីជនជាតិចិន ជាអ្នកបើកបររថយន្ដ ហើយប្ដីរបស់គាត់ និងបុគ្គលិកម្នាក់ទៀត រួមដំណើរជាមួយគ្នា សង្ស័យងងុយដេក ទុកអោយប្រពន្ធ ជាអ្នកបើកបរជំនួសវិញ ព្រោះនៅពេលស្រង់រថយន្ដ ចេញពីទឹកស្រះ គេឃើញស្ដ្រីជនជាតិចិន ជាអ្នកកាន់ចង្កូតរថយន្ដ ម៉ាកហ្វ៉ត ២បាំង ពណ៌ស ខូចខាតធ្ងន់ធ្ងរបែកកញ្ចក់ខ្ទេចខ្ទីរ រីឯសពជនរងគ្រោះទាំង ៣នាក់ មិនទាន់ស្គាល់ឈ្មោះនោះទេ៕
ប្រភពពី វត្តភ្នំ
